Read turkana Luka 11 Bible Online

Luka 11 - turkana bible

Luka 11

¹Akolongit apei elipit Yesu awache. Ani erumori, abu epei a ngirukitos a Yesu tolimok ngesi tama, “Ekapolon, kitatamae sua akilip loger lokolong etatamea Yoana ngirukitos keng.”

²Tolimok Yesu kesi tama, “Ejoikinit esi ilipete kona: ‘Apa: Ekiro kon kipuroe. Apolou kon bu.

³Nakinae ngirwa daang akimuj kosi na itemokino.

⁴Torimakinae ngasechesea kosi, kona kirimanakinea sua daang lu kisechanakinete sua. Nyikilomak sua nakiningo nakaagongon.’ ”

⁵Sodi tolimok Yesu ngirukitos keng tama, “Kori eyei ipei kus ni elosi ni eyei lopae keng nakwaare dio tolimok ngesi tama, ‘Ekone, nakinae ayong ngamugati kon ngauni ataar amicha.

⁶Abu lopae kang lo erai ekaloton nawi kang, nakaneni emam ayong akimuj na iinakini ngesi!’

⁷Ani bo ketachu lopae kon alotooma akai tama, ‘Nyikichan ayong! Agol tete ayong ekidor, kiper ayong ka ngide kang, emam robo tokona ayong kona anyouni kainak iyong idiobore.’

⁸Iteni dir, kalimokinit ayong iyong atamar tani pekenyou ngesi sodi kiinak iyong amugati ani eraakar lopae kon, nakaneni enyouni ngesi kiinak iyong ibore daang ni isaki, ani nyikitimio iyong adupakin anyarit ngesi.

⁹Nakaneni kalimokinit ayong esi abala: Kilipas nakaneni kiinakinio, tasaka nakaneni ianyunete, kidongodongo nakaneni kingaario esi.

¹⁰Kainyo itwaan daang ni ilipa einakinio, ani ngini esaki eanyuni, nakaneni engaario ekidor kotere ngini idongidongi.

¹¹Eyei epei anikus taapa, lo einakini ikoku keng emun nailipea ngesi ekolia a?

¹²Kori einakini ngesi ekuutan na ilipea ngesi abeeye a?

¹³Tani iyenete esi luaronok ainakin ngide kus ibore niajokon, nyepedori Apakus lo eyei nadis ainakin Etau keng ngulu ilipasi a?”

¹⁴Nakaneni etwarakini Yesu ngipean lu etengerito itwaan akiruorikin, na apudoreta ngipean, tolomak itwaan ngini ekiruor, tatala asepich a ngitunga ngakiro nguna,

¹⁵ nakaneni tolimut ngiche tamasi, “Erai Belesebul ekapolon a ngipean itaanyunit ngesi agogongu na itwarakinea ngipean.”

¹⁶Asakete ngitunga ngiche akilok ngesi sodi tolimokis atamar tosubak akitoodikinet nakaililon toyeneta atamar ebunit ngesi ani a Akuj.

¹⁷Nakaneni ayeni Yesu na etamete kesi tolimok tama, “Akwap na etiakatiakatar ngitunga tojwoto make, inyasun akwap ngina, ani ketiakatiakasi ngitunga a awi aapei, ialarosi kesi.

¹⁸Ani ketiakatiaka Apolou a Esiitan tojwoto ngajorei keng make, ikokini Apolou keng erubakini ai? Ibaasi esi etwaranakini ayong ngipean kotere agogongu na aanyuni ani a Belesebul.

¹⁹Ani ketwaranakini ayong kona, ikwaanakinete ngirukitos kus itwaranakinete ai? Idodiunito ngirukitos kus atamar isechito esi jik!

²⁰Ani kerai akan a Akuj etwaranakinea ayong ngipean, idodiunit ibore ngini atamar abu Apolou a Akuj nikus.

²¹“Naiyokio ekile lokajwon awi keng etingit ngiboro keng daang lu ejie, mam ibore elemari ngiboro keng.

²²Nakaneni ani na ebunio ekile lokajwon noi kitijik nabo kidwang ngesi, echunari ngakwaaras daang na igieno ngolo idwangi ngesi, sodi totiakatiaka ngiboro lu engatari ngesi.

²³ “Itwaan daang ni nyibakit alowae kang, karemokino ayong, nabo itwaan ni nyekengarakinit ayong akichun, ialarit ngesi.

²⁴“Naepudorea Ekipe anitwaan, tolot kitor nariet esaki ni iangarea. Ani pekeanyu ngesi ni iboikin, elimuni tama, ‘Abongori kai nangoon alomit!’

²⁵Sodi ebongori ngesi toriam itwaan ikoni akai na epiaritae keseger.

²⁶Sodi tolot toriku ngipean ngiche ngikan-kaarei luaronok noi lu idwangito ngesi, sodi pot kiboikinos nitwaan. Nakaneni ani ekisidi, eroner itwaan ngini noi kidwang nikolong ngorot.”

²⁷Na alimunio Yesu kongina, abu aberu kikea etoil keng alokiding asepich a ngitunga tolimok ngesi tama, “Elakara noi aberu nakolong kidouni iyong, sodi kitanak!”

²⁸Nakaneni tatachak Yesu tama, “Iteni dir, elakarosi noi lu iirarete akiroit a Akuj sodi tonupa!”

²⁹Na eriamitor asepich a ngitunga Yesu, kianua ngesi tama, “Abe eroko ngitunga a ngirwa kalu noi! Esakete kesi kidodikinae akitoodikinet nakaililon, nakaneni emam akitoodikinet ache nakaililon na idodikinio kesi mati nakolong a Ekadwaran a Akuj Yona.

³⁰Loger lokolong araakar ekadwaran Yona akitoodikinet a ngitunga a akwap a Ninewi, loger lopei ngolo, Lokookeng a Itwaan dang eliwor akitoodikinet a ngitunga a ngirwa kalu.

³¹Akolongit na a eriras, enyouni akapolon a akwap a Cheba sodi kirira ngitunga lu a ngirwa kalu, kainyo anyouni kolong ngesi anakwap keng tolot erot lokooyen noi ebunit akiirar ngakitatamet na aosou a ekapolon Solomon, nakaneni kalimokinit ayong esi atamar eyei ibore nege ni epolot ni idwangit tani Solomon.

³² Akolongit na eriras, enyounete ngitunga a Ninewi kirirata esi, kainyo alungete kesi ngasechesea kech nakolong eirareta Yona itatami kesi ngakiro a Akuj, nakaneni kalimokinit ayong esi atamar eyei ibore nege ni epolot ni idwangit tani Yona!

³³“Emam itwaan ni inokakini ataa sodi kiwaa, kori tobuburik atubwa, iwaakinio ni ikeuna sodi kiteeto ngitunga na elomareta tooma kai.

³⁴Ikote ngakonyen kus ataa a akwaan, ani kejokak ngakonyen kus, eyei akicha nakwaan daang, nakaneni ani keroko ngakonyen kus, eyei aribu nakwaan daang.

³⁵Tochoikinos sodi toliwor akicha eyei tooma kus, meere aribu.

³⁶ Nakaneni ani keyei akicha nakwaan daang, emam aribu eyei tani edit, echai wadaang ikoni ataa na echai anikus.”

³⁷Na arumorea Yesu ekiruor, abu Eparisayot tolimok ngesi atamar asaki emuja ka ngesi, sodi toloma kai kiboikin kimuj.

³⁸Abu Eparisayot toriangakin na engolikinea Yesu imuji eringa nyilotara ngakan.

³⁹Sodi tolimok Ekapolon Yesu ngesi tama, “Tokona, ikote esi Ngiparisayo ekopo ka atubwa na ilasio nikalapatan bon nakaneni tooma kus ileleba ademanu ka aronis.

⁴⁰Ngikamodeanak! Meere Akuj na asubi nikalapatan ngesi asubi tooma dang a?

⁴¹Nakaneni nakisi ngiboro lu eya tooma ngikopoi kus ka ngatubwae ngikebootok sodi toseger ibore daang anikus.

⁴² “Oitiakoi! Abe etioko nginyas lu ianyunete esi Ngiparisayo! Ilemanakinete esi Akuj alemikinet apei anatomon a ngikito alu itoboboote akimuj, nakaneni nyirichakinito esi akitiriyan ngakiro niajokon nabo nyiminasi esi Akuj. Ejoikinit esi isubete ngakiro nugu daang peijamuarito ngache.

⁴³“Oitiakoi! Abe etioko nginyas ianyunete esi Ngiparisayo. Iminasi esi akiboyonokin lokicholongo luajokak anakais a Atuk, nabo kimalae a arimatoi ani egieleta ngitunga ngiboro.

⁴⁴Oitiakoi! Abe etioko nginyas ianyunete esi. Ikote esi ngalielin na nyileerete, eloose ngitunga alokidiama peeyenete.”

⁴⁵Abu epei a ngiketatamak a etal tolimok ngesi tama, “Eketataman, na ilimunio iyong kongina, kimor iyong tani sua dang!”

⁴⁶Tatachak Yesu tama, “Oitiakoi! Abe etioko nginyas ianyunete esi dang ngiketatamak a etal! Ikote esi ngitunga, lu isiwokito luche ngiegosio lu apotiok lu nyedakun tarai nyisakete esi ngikulepek akingarakin kesi akiwok ngiegosio ngulu.

⁴⁷Oitiakoi! Abe etioko nginyas ianyunete esi! Iboka esi ngalielin naajokak kotere ngikadwarak a Akuj kus, ngikadwarak a Akuj lu aarete taapaakus.

⁴⁸Nakaneni idodiunit ibore ngini atamar ichamut esi na asubete taapaakus, kainyo aarete kesi ngikadwarak a Akuj, sodi toboka esi ngalielin kech.

⁴⁹Kotere nguna abu Akuj Nakooson tolim tama, ‘Ameari ngikadwarak kang ka ngimeanara nikech, earete ngiche, toboliatar ngiche.’

⁵⁰Nakaneni ngitunga a ngirwa kalu irirao kotere ni aareta ngikadwarak daang a Akuj napei kolong asubakinere akwap,

⁵¹ akisiakin anaaret a Abel tanang aaret a Sekaria, lokolong aarakinio kiding akai a Akuj ka ekeno lo ipeyonokinere Akuj. Ee robo, kalimokinit ayong esi ngakiro na iteni atamar, irirao ngitunga a ngirwa kalu kotere nguna daang!

⁵²“Oitiakoi! Abe etioko nginyas ianyunete esi ngiketatamak a etal. Iwaa esi engaet lo elomarere naosou. Nyilomarete bo tani esi ngikulepek, nakaneni iratakis esi tani ngulu esakete alomar!”

⁵³Ani erotokini Yesu kaneni, apot ngiketatamak a etal ka Ngiparisayo tolomakis akisuruor ngesi niaronon noi nabo kingita ngesi ngakiro nakaalak noi.

⁵⁴Alokito kesi ngesi esakete aripun keya ngakiro naaronok na epedori ngesi alimun.