Read turkana Luka 12 Bible Online

Luka 12 - turkana bible

Luka 12

¹Tochununos ngitunga lukaalak noi nia Yesu kidingidingakinos tolomakis akichakachaka. Esaa ngolo tolimok Yesu ngirukitos keng tama, “Tochoikinos anakiro a naaronok a Ngiparisayo ana ikote ekitoe lo itubui ngamugati, Ibore ngini ngesi amodeanut.

²Emam ibore ni erapap ni nyileereuni, kori emam ibore ni idaitae ni nyetakanuni.

³ Ngakiro na ilimunete esi anaribu iirarete ngitunga anakicha, nabo nguna ingaingaasi esi igolito ngidorin a ngakais, ikeunio Anatuk.

⁴“Ngipaalon kang, kalimokinit esi atamar nyiikear lu earete akwaan bon nakaneni emam ibore iche aronon esubakinete.

⁵Kedodikini ayong esi ngini ejoikinit esi ikerete, tokera Akuj na epedori akiar nabo eyei agogongu na epedorea achakakin nanam na a akim. Ngesi kalimokinitor esi ngakiro na iteni dir atamar tokera ngesi!

⁶“Egielio tanangolengor ngikan a atongkol. Nakaneni nyimuriakinit Akuj tani ipei kech.

⁷Imarunitae tani ngitim daang a ngakies kus. Nakaneni nyieam. Ijokak esi noi idwangito tani ngikieny ngulu lukaalak!

⁸“Kalimokinit esi atamar, itwaan cha daang ni elimor alotunga atamar ngesi itwaan kang, elimori Lokookeng a Itwaan ngesi dang alongaren ngimalaikae a Akuj,

⁹nakaneni itwaan cha daang ni epegi alotunga atamar meere ngesi itwaan kang, epegi Lokookeng a Itwaan dang ngesi alongaren ngimalaikae a Akuj atamar nyayeni.

¹⁰ “Itwaan daang ni elimuni naaronok imenyi Lokookeng a Itwaan, erimakinio, nakaneni ngini imenyi Etau a Akuj nyerimakinio jik.

¹¹“Nakirumuneta kesi esi kitorikut nakais na Atuk, kori lokapolok, kori lokarikok, kuriasi nyeeriab ngakiro ngitai kus atamar anukiro ilimunete esi kori ilimunete kwaai.

¹² Kainyo Etau a Akuj ngesi kitatami esi esaa ngolo ngakiro na ilimunete.”

¹³Abu itwaan anasepich a ngitunga tolimok Yesu tama, “Eketataman tolimok lokaatokang atamar katotiakak ayong ngibaren epewae lukolong kiisikinea sua apakosi.”

¹⁴Tatachak Yesu ngesi tama, “Ekile, ngae kainakini ayong apolou na eriraa kori na katiakanakinea esi luarei ngibaren?”

¹⁵Sodi tolimok ngesi ngitunga daang tama, “Kiyokos, nabo tochoikisi ngakiro a amonis, kainyo meere nalalau a ngiboro alu etingit itwaan ngesi eyei akiyar keng, tani kebarit ngesi kwaani.”

¹⁶Sodi tolimok Yesu kesi ngakitadapet nugu tama: “Ayei kolong ekabaran lo ayei amana na ekoneene tobwang noi ngimomwa luajokak.

¹⁷Abu kisiak akitam bon tama, ‘Emam ayong ekeru loapolon lo ewaakini ngimomwa kang daang. Ekokini ai?’

¹⁸Tolim bon tama, ‘Abwangi ngikerui kang sodi atoduk luapolok lu ewaakini ngimomwa kang ka ngiboro luche daang.

¹⁹Ani erumor, atolimokin ayong elope atamar, Ee rocha ekeny ajokon! Eyei tokona ayong ibore niajokon daang ni asaki alokaru alukaalak. Eboikin jik eanga, emuj, atamat, nabo atalakar!’

²⁰Sodi tolimok Akuj ngesi tama, ‘Ibangaana iyong! Nakwaare a akolongit kana elemario etau kon, ngae tokona etingi ngiboro daang lu ingadaarit iyong kotere akiyar kon?’ ”

²¹Ani ekisidi tolim Yesu tama, “Ikote neni ngulu iweito ebari kech kitaraut eka ngawat kech make, nakaneni nyebarito kesi alongaren Akuj.”

²²Tolimok Yesu ngirukitos keng tama, “Ngakiro nugu ngesi kalimokinitor esi atamar, kuriasi nyiiriabasi kotere akimuj na isakete esi toyareta, kori kotere ngiworui lu isakete esi akinap.

²³Kainyo akiyar kus ejok idwangit tani akimuj, nabo akwaan kus ejok idwangit tani ngiworui.

²⁴Kingolikisi ngikuruka: nyitaate kesi kori nyelemete, emam kesi ngikerui, Akuj alope itani kesi! Kichoikinitae esi noi idwangito tani ngikieny!

²⁵Ngae anikus keriabakin epedori akiatakin ngirwa ngiche loboyor keng?

²⁶Nakaneni na nyipedoreta tani ngakiro na nyegogong nguna, nyo nabo itameta ibore niche dang?

²⁷Kingolikisi eger lo erupeta ngatur na amoni: emam etich lo esubanakinosi kesi kori nyedonyonokinosi ngiworui kech. Nakaneni kalimokinit ayong esi atamar, tani Solomon dang, lo arai ekabaran noi, peayakasi ngiworui lukesuparak lu ekote ngatur nugu.

²⁸ Akuj alope ngesi isiki nginyia lu a amoni, nginyia lu elibito tokona ani moi tongopiasi, sodi kinomae alokeno. Etia eger lo epedori ngesi akisik esi ai? Etige esi ngitunga lu inupito wadiochichi!

²⁹“Tokona, nyiiriabasi ibaasi ekoe nyo kinyami kori nyo kimasi. (

³⁰Kainyo esakete ngibukui lu nyerai Ngiyaudi ngiboro lu daang). Eyeni Apakus atamar isakete esi ngiboro lugu daang.

³¹Nakaneni tasaka apolou keng aloboyor kus, sodi kiinakini ngesi esi ngiboro lugu daang.

³²“Nyieam esi ngitunga lukidio! Kainyo esaki Apakus ainakin esi Apolou keng.

³³Togielasi ibore kus daang ni itingito esi, ani erumor nakis ngikebootok ngaropiyae. Tosubakisi ngichuei lu nyengorotokete. Kiwaa ebari kus anadis, ni nyediteunea tani wadiochichi, kainyo emam ekokolan eapiari nikech, nabo emam ngakimam inyasunete kesi.

³⁴Kainyo epete ngitai kus ni eyei ebari kus.

³⁵“Kiboikinos isubakina kotere daang na esubakinosi, ienito ngiworui kus nabo kinokakis ngataae kus,

³⁶ikote ngikasubak etich lu idarito ekapolon kech, ebonguni anakuuta. Ani ebuni ngesi idongodongokini, tangakis kesi ngesi ekidor atipei na edolunio.

³⁷Elakarosi noi ngikasubak etich lu erukauni ekapolon kech ibooyete irichuna na ebongunio ngesi! Kalimokinit esi atamar, enapi ngesi eworu lokoret akimuj, kisiboik kesi kwap tokorak akimuj.

³⁸Elakarosi kesi noi na erukaunea ngesi idarito irichuna, tani kedolu ngesi kiding akwaar kori ekisidi!

³⁹Nabo toyena atamar arai toyeni elope a awi esaa lo ebunio ekokolan, kechoiki ngesi kidaru ekokolan nyeebwang akai keng.

⁴⁰ Tani esi dang, kiboikinos irichuna kainyo ebuni Lokookeng a Itwaan esaa lo nyitamitotor esi atamar ebuni ngesi.”

⁴¹Kingit Petero Yesu tama, “Ekapolon, kilimokinit iyong sua make akitadapet naga kori ilimokinit iyong ngitunga daang?”

⁴²Tatachak Ekapolon tama, “Ngae tokona erai ekasuban etich lokooson lo emunoi? Ngesi ngolo alimoki ekapolon atamar topolok etich daang a awi, nabo nanak ngikasubak etich luche akimuj kech esaa lo echamitere.

⁴³Elakar noi ekasuban etich ngolo na ebongunio ekapolon ngolo nawi toriam ngesi iwapit nguna!

⁴⁴Kalimokinit ngakiro na iteni dir atamar elimokini ekapolon ngolo ekasuban etich ngolo atamar topolok ebari keng daang.

⁴⁵Nakaneni ani ketama ekasuban etich ngolo elope kori kengop ekapolon keng, eloka ngirwa ebongunio, elomakini akibungare ngikasubak etich luche, ngikiliok ka ngaberu, nabo kimuj, tamat, kilewa dang.

⁴⁶Ebonguni ekapolon a ekasuban etich kangolo akolongit ache a esaa alo nyeyenea ngesi atamar ebuni. Iteli ekapolon ngolo ngesi tapak ngaarei, kikwaanikinos ngesi ka lu nyerai ngikanupak.

⁴⁷“Nakaneni ekasuban etich lo eyeni na echamit ekapolon keng sodi nyiiboikin ngesi irichakina tosub nguna, idesio lokojokon.

⁴⁸Nakaneni lo nyeyeni nguna echamit ekapolon keng, nabo tosub ibore ni echamit ekapolon keng idesea ngesi, idesio loge. Itwaan ni einakinio nakaalak ejoikinit idodiuni nakaalak, itwaan ni einakinio nakaalak noi, ejoikinit idodiuni nakaalak noi.

⁴⁹“Abu ayong ayau akim akwap, esibit cha tonokunite akim ngina!

⁵⁰Eyei akibatisare na ejoikinit ayong kebatisao, nakaneni kariabete ayong ngakiro nguna etau tanang ni erumorotor nguna!

⁵¹Itamito esi atamar abuni ayong nakwap ayaun ekisil a? Mam, meere ekisil ayaunit pearai atiaka.

⁵²Akisiakin tokona jik, etiakasi ngitunga ngikan anawi a apei, eremokin nguuni ngiarei, eremokin ngiarei nguuni.

⁵³ Eremokinosi taapa ngide kech, nabo eremokin ngide dang taapakech, nabo eremokinosi taito tanakookech, nabo eremokinosi tanakookech taito kech, eremokinosi taata ngaterak kech, eremokinosi ngaterak taata kech.”

⁵⁴Tolimok Yesu nabo asepich a ngitunga tama, “Naianyungareta esi edou ilirakin too, itamarete esi atipei dikino akiru erami, dio kikok neni.

⁵⁵Na ekutunea ekuwam lo akamu, tamasi esi, ibooyi akwap torirau, dio kikok neni.

⁵⁶Esi ngikamodeanak! Ingolikinete esi akwap ka adis, sodi todwara eger kech, nyo tokona peiyeneta esi eger a ngirwa kalu?

⁵⁷“Nyoni peitiakuneta esi ngikulepek na itemokino esi isubete?

⁵⁸Ani esaki itwaan akititakin iyong kitoriko nitubet ekies, topupokinos eringa esaa lo kititakinere iyong nyenanga. Ani pekikok neni, kirikori ngesi iyong lokatubon ngakiro, dio kitorikok iyong ekatubon ngakiro ngasigerea nakiinikinete iyong lojela.

⁵⁹Kalimokinit ayong iyong atamar nyilomuni iyong kaneni jik, mati kitach amicha kon kisunyak pil.”