Read turkana Luka 13 Bible Online

Luka 13 - turkana bible

Luka 13

¹Esaa ngolo ayakasi ngitunga neni lu alimokinete Yesu eger lo aarea Pilato ngitunga a Galilaya na alemikinitotor kesi Akuj ngakipeyos.

²Tatachak Yesu kesi tama, “Esibit esi keroko noi ngitunga lua Galilaya ngulu ani aarere loger ngolo a? Itamito esi atamar idodiunito nguna atamar eroko kesi noi idwangito ngitunga luche daang a Galilaya a?

³Meere kongina! Kalimokinit ayong esi atamar ani pekilunga ngasechesea kus, itoakete tani esi daang loger kech.

⁴Ani bo ngitunga lutomon ka ngikan-kauni lu adakakin aita a akai alo Siloam taar? Esibit esi idodiunito nguna atamar eroko kesi noi idwangito ngitunga luche daang lu ibooyete alo Yerusalem a?

⁵Meere kongina! Kalimokinit ayong esi atamar ani pekilunga esi ngasechesea kus, itoakete tani esi loger kech.”

⁶Nakaneni abu Yesu tolimok kesi a ngakitadapet tama: “Ayei emeyen lo arupunit alomana a itwaan. Abu ngesi tolot asakar ngameyena lomeyen, nakaneni nyeriamuna tani apei.

⁷Sodi tolimok ngesi eketeon a amana tama, ‘Toyen kona, abuneene ayong nege a ngikaru a nguuni asaki ngameyena lomeyen logo, nakaneni nyeriamuna ayong ngameyena tani ngakidio. Totubo! Nyo erupunitor kane ijujuea ngakipi analup pas?’

⁸Sodi tatachak eketeon a amana kangina ngesi tama, ‘Ekapolon, kimiek mono ekaru logo bon, aboki ayong adui naten keng sodi atobukok ngasike.

⁹Ani kekoniu emeyen ngameyena ekaru lo moi, ejok robo, ani kemam, totub iyong ngesi.’ ”

¹⁰Akolongit apei na a Sabato etatami Yesu ngitunga anakai a Atuk.

¹¹Ayei aberu neni na ebapit Ekipe lo etedeakakinit ngesi ngikaru ngitomon ka ngikan-kauni, akudokina egur keng peapedori ngesi aruar torikin tani wadio.

¹²Na engolikinea Yesu ngesi, abu tanyara ngesi tama, “Aberu, kilachakin iyong alodeke alo ideaka iyong, ijoker!”

¹³Sodi kidokok Yesu ngakan keng kidiama keng, atipei torikin tojoker, nabo kipuruu Akuj.

¹⁴ Nakaneni abu ekapolon a akai a Atuk tongo, kainyo etojoki Yesu itwaan akolongit na a Sabato, dio tolimok luche tama, “Eyakasi ngirwa ngikan-kapei lu echamit ngoni kisubea etich, ejoikinit ipote ngirwa ngulu kitojok, meere akolongit na a Sabato!”

¹⁵Tatachak Ekapolon ngesi tama, “Etige esi ngikamodeanak! Abe erai bo epedori itwaan daang anikus akipudun emong kori esikiria keng ananok, sodi kitwara akitamat akolongit na a Sabato.

¹⁶Eyei tokona ne aberu na erai ales a Aburaam na eenit Esiitan ngikaru ngitomon ka ngikan-kauni, nyejoikinit elachakinio ngiriko keng akolongit na a Sabato a?”

¹⁷Na alimunio Yesu kongina, kiruma ngimoe keng daang ngileech. Nakaneni talakaros ngitunga kainyo asubi Yesu ngakiro naajokak na asubi ngesi.

¹⁸Kingit Yesu tama, “Ikoni Apolou a Akuj ai? Isikwaanio ka nyo?

¹⁹Ikoni ne. Elemuni itwaan echokit a ekoropus sodi kitak mana keng, ani erupuni, topoloor noi toliwor ekitoe, pot ngikieny toduko ngakais naten keng.”

²⁰Nabo kingit Yesu tama, “Nyo tokona esikwaanea ayong Apolou a Akuj?

²¹Ikoni ne. Ikoni ekitoe lo itubui ngamugati lo alemuni aberu sodi kimorik ka ngakiria anadepe, tanang ebui wadaang.”

²²Abu Yesu tolot kitor lorerea ta ngadakarin itatami ngitunga na alosio Yerusalem.

²³Kingit itwaan iche Yesu tama, “Ekapolon, ngitunga ngidikidio make kesi epedorete ayuun a?” Tatachak Yesu kesi tama,

²⁴“Kirichakinos esi ngikulepek akitor lokidor lokaadingan, kainyo kalimokinit ayong esi atamar, ngitunga ngikaalak etamarete atolomasi tooma, nakaneni nyepedorete.

²⁵Enyouni elope a awi sodi togol ekidor, iwaasi esi anikalapatan tolomakis akidongodong ekidor ibaasi, ‘Ekapolon, tangaarae sua atolomutu!’ Etachuni ngesi tama, ‘Nyayeni ayong ni iponitotor esi!’

²⁶Sodi itachakinete esi ngesi tamasi, ‘Kimuji kolong sua nabo atamaase ka iyong aapei, itatami iyong alore kosi.’

²⁷Elimuni nabo tama, ‘Nyayeni ayong ni iponitotor esi, kotosi anikang, esi ngitunga lu isubete naaronok!’

²⁸Ikalounete esi noi tokiricha ngikel kus, naingolikineta esi Aburaam ka Isaka ka Yakobo ta ngikadwarak daang Anapolou a Akuj, ani esi kitochakar nikalapatan!

²⁹Epote ngitunga alowaitin kadaang a akwap sodi kiboikinos kimuja Anapolou a Akuj.

³⁰ Nakaneni lu ingarenikinete lu tokona isidiyete, ani ngulu tokona ingarenete, isidiyorosi.”

³¹Esaa ngolo dio pot Ngiparisayo ngiche nia Yesu tolimokis ngesi tamasi, “Ejoikinit iyong torotok kane toten wache, kainyo esaki Erode akiar iyong.”

³²Tatachak Yesu kesi tama, “Kapesi tolimokisi itwaan ni ikoni kwee ngini kona, ‘Etwaranakini ayong ngipean nabo etangalenokini ngidekesinei dang akolongit naga ta moi, ani akolongit na a ngauni atorumo etich kang.’

³³Nakaneni ejoikinit akolongit na alosi ka moi ta akolongit nache kayaaye, nyejoikinit ekadwaran a Akuj eario a wache mati ere a Yerusalem bon.

³⁴“Etige ngitunga a Yerusalem lu iarete ngikadwarak a Akuj, nabo kimasa a ngamoru ngimeanara lu ameuni Akuj nikus! Ngiai ngirwa asakea ayong akilogakin ngakan kang lotunga kus daang loger lo iudakinea akukut ngitak keng tooma nabeben keng, nakaneni nyechamuna esi asubi ayong kongina!

³⁵ Kemiekinea tokona ayong esi Akai kus. Kalimokinit ayong esi ngakiro na iteni atamar, nyikingolikinete esi ayong nabo tanang akolongit apei na itamareta, ‘Epiarit Akuj ngolo ebunit a ekiro a Ekapolon.’ ”