Read turkana Luka 14 Bible Online

Luka 14 - turkana bible

Luka 14

¹Akolongit apei a Sabato, tolot Yesu akimuj anawi a ekapolon a eche a Ngiparisayo, nakaneni eteete ngitunga Yesu lokojokon.

²Bu itwaan ni abuto ngakejen ka ngakan nia Yesu.

³Sodi kingit Yesu Ngiketatamak a etal ka Ngiparisayo tama, “Echamakina alotal yok itojokio itwaan akolongit na a Sabato, kori emam?”

⁴Nakaneni kililinga kesi tachakin chek. Toting Yesu itwaan ngini kitangalek, ani erumor kimiek ngesi tolot.

⁵ Sodi tolimok Yesu kesi tama, “Ngae anikus nyiriuni lokookeng kori emong keng alokare na echakakinor neni akolongit na a Sabato?”

⁶Nakaneni emam akiroit atachakis kesi Yesu kanguna.

⁷Kingolik Yesu eger lo aseuneta ngipeyok ngiche ngikicholongo luajokak sodi tolimok kesi daang a ngakitadapet tama:

⁸“Ani kinyarauni iyong itwaan nakuuta, wara nyiiboikin lowae loajokon kainyo epedori ayakau itwaan iche ni epolot ni kidwangit iyong ni enyaraunitae,

⁹sodi na ebunio lo kirumunit esi daang, dio kitolimok iyong tama, ‘Tonyou kimiek lo kiboikin nege.’ Nakaneni kirumete iyong ngileech sodi min kiboikin lowae lo ipasakinitae,

¹⁰nakaneni ani kirumunio iyong, kape dio kiboikin ni ipasakinitae, sodi ani ebuni lokirumunit iyong tama, ‘Bua niajokon nege lopae kang’, ianyuni iyong arimatoi alopeyok aluche kadaang kotere nguna.

¹¹ Kainyo itwaan daang ni itopolouno, itiditeunio, ani ni itiditeuna, itopolounio.”

¹²Tolimok Yesu lo erumunit ngesi tama, “Naidorokinio iyong akimuj na apaaran kori na a ebong, kuria nyiirum talopae kon kori talokaatokon kori ngiyenet kon kori ngikudunyet kon lu ebarito, kainyo kirumunete kesi dang iyong, sodi tatachakis nakolong isubea iyong kesi.

¹³Ani idorokini iyong akimuj, kirum ngikebootok ka ngikechodok ka ngikangwalak ta ngimuduk.

¹⁴Sodi kitopiar iyong kainyo emam kesi ibore kiinakinete iyong. Kitachi iyong Akuj akolongit ngina eyaruneta ngitunga luajokak anakitu.”

¹⁵Ani iirari ipei a ngitunga alu ebooyete imujete ka Yesu ngakiro nguna, tolimok Yesu tama, “Elakarosi noi ngulu iboikinosi kimuja Anapolou a Akuj!”

¹⁶Nakaneni abu Yesu tolimok ngesi tama, “Ayei kolong itwaan ni edorokini akimuj nakaalan, tanyarau ngitunga lukaalak nakimuj.

¹⁷Na anangea esaa ngolo a akimuj, tomea ngesi ekasuban etich keng tanyarau ngitunga lu epeyounitoe tama, ‘Potu kainyo asubakin ibore daang arumor!’

¹⁸Nakaneni tolomakis daang alimuunun a ngapei-pei atamar nyikilosi! Tolimok lo ekingaren ekasuban etich ngolo tama, ‘Agielit ayong amana, asaki atolot engolik. Abala ayong iyong kimiekinae atolot.’

¹⁹Tolim nabo loche tama, ‘Agielit ayong ngimongin ngitomon lupalem itaate, alosi ayong atoroea akitare, abala ayong iyong kimiekinae atolot.’

²⁰Sodi loche tolimok tama, ‘Aringa been ayong eutari, kotere ngakiro nguna nyapedori ayong alosit.’

²¹Nakaneni tobongo ekasuban etich ngolo dio alimokin ekapolon keng ngakiro nguna daang. Abu ekapolon a awi kangina tongo noi tolimok ekasuban etich keng tama, ‘Tonyou atipei kirimok ngirotin daang ka kiding ngakais a ere kalo, sodi toriku nege ngikebootok ka ngikechodok ka ngimuduk ta ngikangwalak.’

²²Na arumorea ekasuban etich ngolo nguna daang, tolimok ekapolon keng tama, ‘Ekapolon, asubak ayong daang kona ibaar iyong, nakaneni eringa nege elolom.’

²³Sodi tolimok ekapolon ekasuban etich tama, ‘Kape lorotin a ngadakarin ka ngirotin lukaadingak, toriku ngitunga pot kilelebunor akai kang.

²⁴Kalimokinit ayong esi atamar, emam tani ipei kangulu epeyounitoe ni epedori akiir akimuj kang!’ ”

²⁵Alosi asepich a ngitunga ka Yesu aapei. Sodi torei Yesu tolimok kesi tama,

²⁶“Itwaan cha daang ni ebuni nikang nyeliwor ngesi erukitos kang mati kaminaki ngesi ayong noi kidwang apakeng ka itiokeng ka aberu keng ka ngide keng ka talokaato keng ka tanakaato keng ta akiyar keng a ilope.

²⁷ Itwaan cha daang ni nyiwoki apir keng a ilope sodi bu kewapak ayong, nyeliwor ngesi erukitos kang jik.

²⁸“Ani keyei ipei kus ni esaki akiduk akai nakooyen a epem, iboikin ngesi ekingaren dio kimaru etiae a ngaropiyae a na edukere, toyen keya ngaropiyae na itemokino arumorea etich.

²⁹Ani pekikok neni, ipiyori ngesi arumor akai nasek adukokin ngateak. Elomakinete ngitunga daang lu iteete ngesi akianar ngesi.

³⁰Sodi tamasi, ‘Esiakini kolong itwaan en akiduk, nakaneni epiyo arumor etich keng!’

³¹Ani kerotoki ekapolon ka ajore a ngitunga ngabunge ngatomon tasak akitojwore ekapolon lo ebunit akitojuore ngesi erikit ajore a ngitunga ngabunge ngatomwon-arei, iboikin ngesi mono kitam kepedori ngesi ejie ka ekapolon loche ngolo.

³²Ani pekepedori, emeari ngitunga kisiriamiasi ekapolon loche eringa elona kingita ibore ni esaki ngesi kainakin kisileta.”

³³Torumo Yesu na eruoro ebala, “Aloger alopei kangolo, emam tani ipei anikus ni eliwor erukitos kang mati kipoto ibore ni etingit ngesi.

³⁴“Ejok amakat, nakaneni ani kepener amakat, emam kona itababaruunio nabo.

³⁵Nyejoikina imorikinio ka ngalup kori ka ngasike, echakario. Ani keya ngaki, kiira robo!”