Read turkana Luka 15 Bible Online

Luka 15 - turkana bible

Luka 15

¹Akolongit apei na alooso ngiketubukok echur ka ngikasechak ngiche akiirar ngakiro a Yesu,

²tolomakis Ngiparisayo ka ngiketatamak a etal akingununguno tamasi, “Ekoe! Abe epeyonito bo itwaan en ka ngikasechak nabo imujete ka kesi!”

³ Tolimok Yesu kesi ngakitadapet nugu tama:

⁴“Abala ayong esi a! Ani keya itwaan ngamesekin amiat apei, tachakar amesek apei, ikokini ngesi ai? Imiekini ngesi ngatomwon-kan-koomwon ka ngakan-koomwon anachokor sodi tolot tasaka na achakara tanang eanyuni.

⁵Ani na aanyunea, elakar ngesi noi toriongak loseget keng.

⁶Na enangea ngesi nawi keng tanyarau ngipaalon keng ka ngikudunyet keng wapei tama, ‘Potu atalakaros ka ayong aapei, kotere ni aanyunea ayong amesek kang na achakara!’

⁷Aloger alopei kangolo, kalimokinit atamar emini alakara nadis kotere itwaan ipei nikasechan ni elungi akisech keng, kidwang luche lutomwon-kan-koomwon ka ngikan-koomwon lu etenooko, nakaneni nyesakete kesi akilung akisech kech.

⁸“Kori ikokini aberu na atingit ngaropiyae ngatomon na echakaror apei ai? Inokakini ngesi ataa topia akai, sodi tolomak akisak wadaang lokojokon tanang eanyuni.

⁹Na aanyunea, tanyara ngipaalon keng ka ngikudunyet keng wapei tama, ‘Atalakaros ka ayong aapei kainyo aanyu aropiyat natete achakara!’

¹⁰Aloger alopei kangolo, kalimokinit ayong esi atamar, elakarosi ngimalaikae a Akuj kotere itwaan ipei nikasechan ni elungi akisech keng.”

¹¹Tolim Yesu tama, “Ayei kolong ekile lo ayakasi ngide lusapa ngiarei.

¹²Tolimok loochi ngesi tama, ‘Apa, totiakakinae tokona ayong ngibaren epewae lu cha kitiakakini.’ Sodi totiakak itwaan ngini ngide luarei ngulu ngibaren keng.

¹³Nakaneni adaunet a ngirwa a ngidikidio, tochunak loochi ngolo ngibaren lu atiakakinio daang, towot akwap ache naalonon, na anangea nakwap ngina kirika ngibaren keng a elomit ka eboyor loaronon.

¹⁴Na erikarea ngibaren daang, tolom eron a akoro nakwap ngina, sodi tongopik ngesi ibore enyami,

¹⁵tolot ngesi akisub etich a itwaan a iche a akwap kangina, toriko itwaan ngini mana keng akisiyok ngiputiro.

¹⁶Kimuu ngesi akinyam ngapocho a ngimare na anyamete ngiputiro nakaneni emam itwaan ainakini ngesi tani ngadikidio.

¹⁷Ani ekisidi kitama ngesi tama, ‘Imujete ngikasubak etich lu eya nawi ka apakang akimuj kimwoko, sodi topiyanut, nakaneni kaarit ayong akoro kane!

¹⁸Anyouni ayong atolot nika apakang atolimok atama: “Apa, asechit ayong ani a Akuj ka iyong.

¹⁹Nyikinyar nabo ayong ikoku kon, kitosubunae ayong ekasuban etich kon.”’

²⁰Tonyou ngesi tolot nika a apakeng. “Ani eroko elona, kingolik apakeng ngesi, kisieni, kikomak kisiriamia kimala niajokon.

²¹Tolimok edia ngolo apakeng tama, ‘Apa, asechit ayong ani a Akuj ka iyong, nyejoikinit iyong kinyarae ayong lokookon nabo.’

²²Nakaneni tolimok apakeng ngikasubak etich keng tama, ‘Kapesi atipei yautu eworu loajokon kitanapa. Kiwaakisi ekababaat lokimoin keng sodi kitanapa ngamuk.

²³Taramut itaok niatuman ataarakisi, sodi atanyama atalakaros!

²⁴Kainyo ikoni lokookang lo itwaan nikolong abu totoan, nakaneni ayaru tokona, kori itwaan nikolong abu tongop, nakaneni atakanuu tokona.’ Sodi tolomakis kesi akimuj talakaros.

²⁵“Esaa lopei ngolo, ayei edia loapolon mana. Ani ebonguni na aapuunea nawi, abu kiira ngitunga eeosi kidongaate.

²⁶Sodi tanyara ngesi ekasuban etich epei kingit tama, ‘Anukiro nu?’

²⁷Tatachak ekasuban etich ngesi tama, ‘Lokaatokon abongu nawi, dio tama apakon taara itaok niatuman, kainyo abongu ngesi niajokon emam ngache naaronok.’

²⁸Tongo edia loapolon noi towou alomar tooma nawi, sodi topud apakeng nikalapatan kimaima ngesi tama, ‘Tolom kare tooma nawi.’

²⁹Tatachak ngesi apakeng tama, ‘Toyen kona, ngikaru lukaalak lu daang asub ayong etich kon loger a ekedalan kon, nakaneni nyengero ayong akiwap ngakiro kon daang. Nyo kiinak iyong ayong? Mam tani nia ikale kiinak atanyama ka ngipaalon kang!

³⁰Nakaneni lokookon logo abu ngesi kisunyak ngibaren kon daang namalae, ani tokona ebonguni ngesi nawi, dio taarak iyong ngesi itaok niatuman!’

³¹Sodi tatachak apakeng ngesi tama, ‘Lokooku, ngirwa daang kirukit ngoni, nabo ibore daang ni atingit ayong erai ikon.

³²Nakaneni ejoikinit ngoni kipeyoe tokona atalakaros, kainyo ekoni lokaatokon itwaan niatoanit, nakaneni ayaru ngesi tokona, achakara ngesi, nakaneni atakanuu tokona.’ ”