Read turkana Luka 16 Bible Online

Luka 16 - turkana bible

Luka 16

¹Tolimok Yesu ngirukitos keng tama, “Ayei itwaan nikabaran, nabo ayei ngesi ekaweikinan etich keng. Tolimokinae ekabaran tamarae eboliar ekaweikinan etich ngaropiyae keng,

²sodi tanyarau ekapolon ngesi kingit tama, ‘Anukiro nugu na apupi ayong atamar isubi iyong? Kidodikinae chene ayong ekimar a ngiboro kang daang kainyo nyeringa nabo iyong iliwor ekasuban etich kang.’

³Sodi kitama ekaweikinan etich ngolo tama, ‘Kalachakini tokona ayong ekapolon alotich kang, ekokini ayong ai? Meere ayong itwaan nia ngikilinga ni apedori akitare nabo ketimit ayong akilipanar.

⁴Nakaneni ayeni tokona ayong na asubakini! Asaki ayong aanyun ngipaalon lu moi ketepeyonete ayong anawiyei kech nakalachakinere ayong alotich alo aweikinit.’

⁵Tanyarau ngesi ngitunga daang lu emichat ngesi ngaropiyae a ekapolon keng. Tanyaraunu angapeipei kingit lo a ekingaren tama, ‘Ngai ngaropiyae kimichat iyong ekapolon kang?’

⁶Tatachak tama, ‘Alemarit ayong ngamoti amiat apei a akimiet.’ Tolimok ekaweikinan etich ngolo tama, ‘Ekimar a ngaropiyae kon logo, kiboikin kwap kigirak ngatomwon-kan.’

⁷Sodi kingit loche tama, ‘Ngai ngaropiyae kimichatae iyong?’ Tatachak tama, ‘Ngichuei abunget apei a ngakanoi.’ Tolimok ekaweikinan a etich ngolo tama, ‘Ekimar a ngaropiyae kon lo, kiboikin sodi kigirak ngamiae ngakan-kauni!’

⁸Abu ekapolon kipuruu ekaweikinan etich loaronon ngolo kotere asubi nguna eosokinit, kainyo ngitunga a akwap eosok noi ana esubete idwangito ngulu eraakasi ngika Akuj lu eya nakicha.”

⁹Nabo tolim Yesu tama, “Nakaneni kalimokinit atamar: toelokinos a ebari a akwap alo ianyut esi. Ani kedaun ngibaren kus anakwapea kanu, kipeyounio esi anakais ana ibooyere jik.

¹⁰Itwaan cha daang ni irichuni nadikidio, irichuni tani nakaalak: itwaan cha daang ni nyirichuni nadikidio, nyirichuni tani nakaalak.

¹¹Ani tokona pekirichuna iyong ani itingitor ebari a akwap, ngae kijokokini iyong ebari lo a iteni?

¹²Ani pekirichunit iyong ibore a itwaan a niche, ngae kiinakini iyong ni erai ikon a ilope?

¹³ “Emam ekasuban etich lo eliwor ekedalan a ngikapolok a ngiarei, eremokin epei sodi tominak loche, kori epupi ngakiro a epei dio kimenya na aloche. Nyipedorete esi akiwap Akuj ta ebari kus.”

¹⁴Na eirareta Ngiparisayo ngakiro nguna daang, apot tokienatar Yesu, kainyo aminasi kesi ngaropiyae noi.

¹⁵ Tolimok Yesu kesi tama, “Iraakasi esi ngitunga lu itojokasi make anakonyen a ngitunga, nakaneni eyeni Akuj ngitai kus, kainyo ibore ni itamete ngitunga ebaasi ejok, erono ani a Akuj.

¹⁶“Etatamio kolong etal a Musa ka ngagiran a ngikadwarak a Akuj tanang ngirwa lukolong a Yoana Ekebatisan. Napei alorwa kangulu jik, itatamio Ngakiro Naajokak a Apolou a Akuj nabo esaki itwaan daang alomar Napolou ngina a ekileenu keng.

¹⁷ Nakaneni ebeben adis ka akwap angopiar, idwangit etal tani lodiochichi noi lo ikoni akemer ikisario.

¹⁸ “Itwaan daang ni elaki aberu keng, sodi kiut aberu ache, aliwor ekaloman asechaki aberu keng. Ekile lo iusi aberu nakolong alak lokile keng, erai ekaloman.

¹⁹“Ayei kolong itwaan ni abarit, tanapite ngiworui lukaanikak esiritoe, kibooye ejakaana, elakara ngirwa daang.

²⁰Ayei neni dang ekebootonit lo anyaritae Losaro. Erikarito ngesi ngajemei akwaan daang korot, arikununio ngesi lokidor a itwaan anikabaran kangini.

²¹Eitanit ngesi akinyam akimuj na achakuunun alomeesa a ekabaran kangolo. Aponeenete tani ngingokwo akime ngajemei keng.

²²Abu ekebootonit ngolo totoan, sodi yaasi ngimalaikae ngesi kiboikin diyete Aburaam, anadis. Abu ekabaran dang totoan, sodi tomurae.

²³Ariaba ngesi noi lokojokon ani ayakasi ngikatoak. Nakaneni kingolia ngesi kidiama taanyunga Aburaam anialonan noi, ka Losaro irudakina diyete keng.

²⁴Sodi tolomak anyarit ebala, ‘Apa Aburaam, kisieni kare ayong! Tomeu Losaro kilumok ekimoin keng nakipi ngadi, sodi kitililim angajep kang, kainyo kapipilikinit ayong noi akim na!’

²⁵Nakaneni abu Aburaam tolimok ngesi tama, ‘Lokooku, toyen atamar ibooyi kolong iyong niajokon iriamunit ibore daang, toriamunete Losaro ibore daang niaronon, ejakaana tokona ngesi kanege, nakaneni iyei iyong lochan iriaba.

²⁶Kanguna kadaang, eyei nege aaut nakooyen na iriwokina kiding yok, sodi ngulu esakete atamar kirotokini kane apotu nikus, nyepedorete, kori lu esakete aponere kaina nikosi ne, nyepedorete.’

²⁷Tatachak ekabaran ngolo ngesi tama, ‘Nakaneni kemaimai cha ayong iyong apa Aburaam atamar tomea Losaro nawi ka apa kang,

²⁸ni eya talokaato kang lukan: kimiek ngesi tolot kichikichik kesi atamar nyeepot nanam na a akim ka ariaba naga.’

²⁹Tolimok Aburaam ngesi tama, ‘Eya talokaatokon etal a Musa ta ngagiran a ngikadwarak a Akuj, kimiek talokaatokon kiirasi anikech.’

³⁰Tatachak ekabaran ngolo tama, ‘Nyitemokino nguna apa Aburaam! Nakaneni ani kelot itwaan idio ni ayaru anakitu nikech, iteni eisikinete kesi ngasechesea kech.’

³¹Tatachak Aburaam ngesi tama, ‘Ani pekiirasi Musa ka ngikadwarak a Akuj, nyepedorete akinup tani keyaru itwaan anakitu.’ ”