Read turkana Luka 17 Bible Online

Luka 17 - turkana bible

Luka 17

¹Tolimok Yesu ngirukitos keng tama, “Iteni dir epote ngakiningioto na epedorete akitosech ngitunga, nakaneni etioko nginyas eanyuni itwaan ni eyauni ngakiro nguna!

²Ejoikinit eenikinio akiries lomosiring tachakakinae nanam, akidwang ngesi akitosech ipei aluuchik kalu.

³Tochoikinos kanguna isubete esi! “Ani kisechakini iyong lokaatokon, kikilak ngesi, ani kelimo tolung ngasechesea, torimak ngesi.

⁴ Ani kisechak ngesi iyong ngasechakinet ngakan-kaarei akolongit apei, sodi bu nikon ngabunet ngakan-kaarei tama, ‘Alimo ayong ngasechesea kang alung, ejoikinit iyong irimakini ngesi.’ ”

⁵Tolimokis ngimeanara Ekapolon tamasi, “Kitunupae sua noi.”

⁶Tatachak Ekapolon kesi tama, “Ani kedit anupit kus ketia echokit a ekoropus, ilimokinete esi ekitoe lo tamasi, ‘Toditun anaten, sodi min torup ananam!’ Nakaneni ikokini neni.

⁷“Ani keyei ipei kus ni eyei ekasuban etich lo itae kori iyoki ngamesekin. Na ebunio ngesi alomana, itamari iyong ngesi kiboikin kwap atipei kimuj a?

⁸Mam jik! Erai ilimokini iyong ngesi tama, ‘Kidorok akimuj, tanap eworu lokipoet sodi kiyuun ayong ibore daang, kidarou mono atorumo ayong akimuj ka akimat ngakipi, ani erumor kimuj iyong ka akimat ngakipi.’

⁹Nakaneni nyebuakinio ekasuban etich ngolo alakara ana asub ngesi, kori ai?

¹⁰Ikote neni tani anikus, na irumoreta esi nguna daang kilimokinio atamar tosuba, tamasi, ‘Kirai sua ngikasubak etich lupasiek, kisub sua na kichamakinitae kisubi.’ ”

¹¹Na alosio Yesu atenea Yerusalem, kitor kiding Samaria ka Galilaya.

¹²Na alomarea ngesi nadakar ache, kiriamun ngesi ka ngitunga ngitomon lu adeakasi enomokere, awaasi kesi echadakina.

¹³ Kiremasi tamasi, “Ekapolon Yesu! Kisienoi kare sua!”

¹⁴Na engolikinea Yesu kesi tolimok tama, “Kapesi esi sodi kisemoto ngimurok a akai a Akuj.” Na anangeta lorot eloose, apot tangalekis tojokearos.

¹⁵Nakaneni epei kech na ayenea atamar angaleki edeke keng, tobongo ipuro Akuj irema.

¹⁶Abu tadakakin kwap nakejen a Yesu, tolimok Yesu atamar alakara ngesi noi. Arai itwaan ngini Esamariat.

¹⁷Tolimok Yesu tama, “Meere takae ngikiliok ngitomon kesi etojokio a? Nyaalu tokona lukan-koomwon?

¹⁸Nyoni eraakar itwaan a akwap anache bon ngesi ebonguni abuakin Akuj alakara?”

¹⁹Tolimok Yesu ngesi tama, “Tonyou tolot ijoker iyong ani inupitor.”

²⁰Kingita Ngiparisayo ngiche Yesu tamasi, “Kori ebunio Apolou a Akuj,” abu tatachak kesi tama, “Nyebuni Apolou a Akuj kotere ngakitoodikinet sodi toyenere.

²¹Mam itwaan ni etamari, ‘Kingolik nyelo kane!’ kori, ‘Nyeye kaama!’ kainyo eyei Apolou a Akuj nikus.”

²²Sodi tolimok Yesu ngirukitos keng tama, “Enangi ngirwa lu isaketa esi akingolikin akolongit tani apei a Lokookeng a Itwaan, nakaneni nyingolikinete jik.

²³Epete lu kilimokinete esi tamasi, ‘Kingolikisi ama!’ kori ‘Kingolikisi nege!’ Nakaneni nyiilot kori nyiiwapakis kesi.

²⁴Kainyo ikoni abunere a Lokookeng a Itwaan eger lo imiliaunea niakwaan alowae a epei tanang lowae loche sodi tokwangik adis daang.

²⁵Nakaneni ejoikinit ngesi mono eboliare lokojokon, nabo tongero ngitunga a ngirwa kalu.

²⁶Ikwaanikinosi ngakiro a ngirwa a Lokookeng a Itwaan ka nakolong a ngirwa a Noa.

²⁷Emuji itwaan daang tamasi, eutanarete ngikiliok nabo epotonorio ngapesur kuutae, tanang akolongit na alomarea Noa tooma natubwa dio tomunyasi ngakipi ngitunga luche daang.

²⁸Ikwaanikinosi ka ngirwa lukolong a Loti, emujete ngitunga daang tamaase, agielete nabo togielanarete, etaate nabo todukete.

²⁹Nakaneni akolongit na arotokinio Loti alo Sodom sodi totiyaun akim ka akibirit anadis, tarama loger a akiru dio tomunyasi kesi daang.

³⁰ Ikokinete ngakiro neni na etakanunea Lokookeng a Itwaan.

³¹“Akolongit ngina nyejoikinit itwaan ni eyei kidiama kai etiyaun alemun ngiboro keng lu eya tooma kai. Kongina pei, itwaan ni eyei mana dang, nyejoikinit ngesi ebongori kai.

³²Kitamutu aberu a Loti!

³³Itwaan cha daang ni esaki akirichun akiyar keng, ebukori, ni ejali akiyar keng, irichuni.

³⁴Kalimokinit ayong esi atamar, akolongit ngina nakwaare, eperete ngitunga ngiarei alokitanda a epei: elemario ipei, kimiekinae niche.

³⁵Eriamunio ngaberu ngaarei iriete aapei: elemario apei, kimiekinae nache. [

³⁶Eriamunio ngikiliok ngiarei esubete etich, alomana: elemario epei kimiekinae loche.”]

³⁷Kingita ngirukitos keng ngesi tamasi, “Aliwae Ekapolon?” Tatachak Yesu tama, “Ni eyei ibore nikatoan ngesi iudakina ngataruk.”