Read turkana Luka 18 Bible Online

Luka 18 - turkana bible

Luka 18

¹Sodi tolimok Yesu kesi ngakiro a ngakitadapet esaki akitatam kesi atamar ejoikinit ilipete Akuj jiik nyeesak akisur ngitai.

²Tolim tama, “Ayei ekatubon ngakiro a ere eche lo peakerit Akuj kori peamisit ngesi tani ngitunga.

³Ayei apuserut lore ngolo na abuneene nikeng esaki kainakin ibore keng tama, ‘Totub akiroit na kitiaki ayong ka itwaan nikititar!’

⁴Nakaneni torubak ekatubon ngakiro ngolo nikooyen akitiak kesi, nakaneni ani ekisidi dio tama, ‘Tani pekakerit ayong Akuj kori pekemisit ngitunga,

⁵nakaneni kona kechanea ayong apuserut naga, atubi ayong ekies eriyan kainyo ani pekekok neni, ebuneene ngesi jiik akichan ayong ketubur!’ ”

⁶Sodi torubak Ekapolon, iruoro tama, “Kiirasi na alimuni ekatubon ngakiro loaronon.

⁷Ani bo Akuj, nyepedori ngesi asubakinea niajokon ngiseuna keng lu igoronokinete ngesi apaaran ka akwaar esakete akingarakino a? Etinenikini ngesi akingarakin kesi a?

⁸Kalimokinit ayong esi atamar, einakini ngesi kesi ibore ni esakete atipei. Nakaneni eriamuni Lokookeng a Itwaan ngitunga a akwap enupito na ebunio ngesi a?”

⁹Kisisau Yesu ngakitadapet nugu kotere ngitunga lu ebaasi kijokak kesi, kimenyarito ngitunga luche daang:

¹⁰“Aloose kolong ngikiliok ngiarei kai a Akuj akilip, arai epei Eparisayot, tarai loche eketubukon echur.

¹¹Towo Eparisayot a akeng kilip tama, ‘Kabuakinit iyong Akuj alakara kainyo meere ayong itwaan nikamonan, kori ekademan, kori ekaloman kona a ngitunga aluche kadaang. Kepuruunit ayong iyong kainyo nyikikwaan ayong ka eketubukon echur ngol.

¹²Aroneene ngaronet ngaarei alorwa alukan-kaarei, nabo kalemanakini iyong alemunet apei anatomon a ibore kadaang ani aanyuununi ayong.’

¹³Towo eketubukon echur anialonan nyirereero ngesi tani kidiama nadis, nakaneni abu ngesi taramarama erarum keng, tolim tama, ‘Ee Akuj, kisienoi ayong ekasechan!’

¹⁴ Kalimokinit esi atamar, eketubukon echur ngolo ngesi alot nawi keng imarakinitae atamar etenoono alongaren Akuj, meere Eparisayot, kainyo itwaan daang ni itopolouno, itiditeunio, ani ni itiditeuna, itopolounio.”

¹⁵Torikut ngitunga ngiche ngide kech nia Yesu esakete ngesi kidokok ngakan kidiama ngakies kech. Nakaneni kikilakis ngirukitos keng ngitunga na engolikineta eyaunito ngide,

¹⁶sodi tanyarau Yesu ngide nikeng tolim tama, “Kimiekisi ngide luuchik pot nikang! Nyiiratakis kesi kainyo erai Apolou a Akuj aka ngulu ikote lu.

¹⁷Kalimokinit ngakiro na iteni atamar, itwaan cha daang ni nyechamuni Apolou a Akuj loger lo echamunitor ikoku niichi, nyelomari jik Napolou ngina.”

¹⁸Kingit ekapolon eche a Ngiyaudi Yesu tama, “Eketataman loajokon, ekokini ayong abili aanyun akiyar na nyedaun ai?”

¹⁹Kingit Yesu ngesi tama, “Nyo kinyaritor iyong ayong ekajokon? Emam niajokon pearai Akuj bon.

²⁰ Iyeni iyong ngitalio lu ebaasi: ‘Nyiiar, nyiilom, nyiikoko, nyiiruor ngakiro na eraakasi alioko, toker apakon ka itiokon.’ ”

²¹Tolimok itwaan ngini tama, “Eketataman, napei kolong a ekiditeu kang, erichunit ayong ngitalio lu daang.”

²²Na eirarea Yesu ngakiro nguna, tolimok ngesi tama, “Eroko iyong ibore ipei bon. Kape togiela ibore daang ni itingit iyong, sodi tokoranak ngikebootok ngaropiyae sodi min ebarit kon nadis. Ani erumor, bu kiwapak ayong.”

²³Na eirarea ngesi ngakiro nguna, torotok esiliyorit kainyo abarit ngesi noi.

²⁴Taanyunga Yesu ngesi kesiliyo tolim tama, “Egogong noi ngikabarak alomar Napolou a Akuj!

²⁵Ebeben ekaal akitor napedot a emutu idwangit eger lo elomarea ekabaran Napolou a Akuj.”

²⁶Apot ngitunga lu eirarete nguna kingita ngesi tamasi, “Ngae tokona epedori ayuun?”

²⁷Tatachak Yesu kesi tama, “Na nyepedorosi alotunga, epedorosi ani a Akuj!”

²⁸Tolimok Petero ngesi tama, “Tokona! Abe kiisik bo kolong sua ibore daang kiwapak iyong.”

²⁹Tolim Yesu tama, “Kalimokinit ngakiro na iteni dir atamar, itwaan daang ni eisikini awi, kori aberu, kori ngikaitotoi, kori ngikauriak, kori ngide kotere akisak Apolou a Akuj,

³⁰einakinio ngainakinet nakaalak ngirwa lu tokona lu ani ngirwa lu a esal, eanyuni akiyar na nyedaun.”

³¹Toriko Yesu ngirukitos keng lutomon ka ngiarei tachada tolimok kesi tama, “Topupokisi! Kilosi tokona ngoni Yerusalem, nabo ngakiro daang na egirete ngikadwarak a Akuj ani a Lokookeng a Itwaan, iyookinosi.

³²Erikorio ngesi nia ngibukui alu nyerai Ngiyaudi, tokienatar ngesi, kibungata nabo kimaanakis ngesi ngakimul.

³³Nabo kideta a ngamunyororoi, sodi taara, nakaneni ani enangi akolongit na a ngauni kiteyarunae ngesi toyar.”

³⁴Nakaneni nyitamuna ngirukitos keng ngakiro na eruoro ngesi tani ekidioko, edaitae eger a ngakiro kanguna anikech peayenete atamar anukiro eruoro Yesu.

³⁵Na abunio Yesu tanangu diyete Yeriko, ebooyi itwaan nimuduk alodiyete erot ilipanar.

³⁶Na eirarea ngesi asepich a ngitunga itorunete diye, kingis tama, “Nyoni en?”

³⁷Tolimokinae ngesi tamarae, “Yesu lo a Nasaret ngesi itorunit diye ne.”

³⁸Sodi kirema ngesi tama, “Yesu! Lokookeng a Daudi! Kisienoi kare ayong!”

³⁹Ngitunga lu engarenete kisuburakis ngesi tamasi, “Kililing iyong.” Nakaneni abu ngesi kirema lokojokon tama, “Lokookeng a Daudi! Kisienoi kare ayong!”

⁴⁰Towo Yesu tama, “Tanyarautu itwaan nimuduk ngini torikutu nikang.” Na apuunea diyete keng, kingit Yesu ngesi tama,

⁴¹“Nyoni isaki iyong ayong katosubakinea iyong?” Tatachak tama, “Ekapolon, asaki tojoketa ngakonyen engolik akwap.”

⁴²Tolimok Yesu ngesi tama, “Kingolik akwap! Kitojok iyong anupit kon.”

⁴³Kingolik ngesi akwap atipei kiwapak Yesu, ebuakinit Akuj alakara. Na engolikinea asepich a ngitunga ngina, kipuruu Akuj.