Read turkana Luka 19 Bible Online

Luka 19 - turkana bible

Luka 19

²Ayei neni itwaan ni anyaritae Sakayo, arai ngesi ekapolon a ngiketubukok echur nabo arai ekabaran.

³Asaki ngesi akiyen Yesu atamar erai itwaan ni ikoni ai, nakaneni kona aurianea ngesi, tongop kona eanyungari Yesu ani alalaketa ngitunga.

⁴Sodi kipiiri ngesi kingarenik asepich a ngitunga dio todoka kidiama lokitoe esaki aanyungar Yesu itoruni lorot ngolo.

⁵Na anangea Yesu neni, kingolia kidiama tolimok Sakayo tama, “Totiyaun atipei Sakayo, apeyoni ayong akolongit naga anawi kon.”

⁶Totiyaun Sakayo atipei dio kitepeyon ngesi Yesu a alakara.

⁷Ngitunga daang lu eteete ngesi, tolomakis akingununguno tamasi, “Alot itwaan en apeyon anawi a ekasechan!”

⁸Tonyou Sakayo towo tolimok Ekapolon tama, “Topupok Ekapolon! Atiaki ayong ngibaren kang ainak ngikebootok epewae, ani keyei kolong itwaan engalaarit ayong ibore, abuakini ngabuakinet ngoomwon.”

⁹Tolimok Yesu ngesi tama, “Abu ayuuno nawi nakon akolongit na, kainyo erai ekile logo dang ales a Aburaam.

¹⁰ Kainyo abuni Lokookeng a Itwaan akisak ka ayuun ni echakara.”

¹¹Ani eringa ngitunga epupete nguna, tolomak ngesi akisuruor kesi a ngakitadapet. Aapiarito kesi Yerusalem tarai etamito ngitunga atamar kori dikino Apolou a Akuj etakanuni atipei.

¹²Tolim Yesu tama, “Ayei kolong ekapolon lo anyouni tolot nakwap nakalonan noi esaki ketiliwor ekapolon, ani erumor tobongu nawi keng.

¹³Sodi tanyarau ngesi ngikasubak etich keng ngitomon eroko ngesi nyerotokino, tokorak kesi ngaropiyae itiriyanit tolimok tama, ‘Tosubeta nugu emuchuruseenu kiatakin ngirwa lu amamakar ayong.’

¹⁴Nakaneni aremokino ngitunga a akwap keng ngesi, tomeasi ngitunga nia ateni ngesi tamasi, ‘Nyikichamit sua itwaan en eliwor ekapolon kosi.’

¹⁵“Apon kitiliworoe ekapolon ani erumor tobongu nawi. Tanyarau ngesi ngikasubak etich keng lu ainakinit ngesi sek ngaropiyae atamar pot taanyu ngesi etiae a ngaropiyae anakeriamut.

¹⁶Bu lo ekingaren nikeng tolimok tama, ‘Ekapolon, ariam ayong ngaropiyae ngache na idwangito nangoon kiinakini iyong ayong ngakidwanget ngatomon’.

¹⁷Tolim ngesi tama, ‘Ejok noi ekasuban etich loajokon! Kona ikiunor iyong anibore a niichi, ipolokini iyong ngirerea ngitomon.’

¹⁸Sodi bu nabo lo a ngiarei tama, ‘Ekapolon, ariam ayong ngaropiyae na idwangito nangoon kiinakini iyong ayong ngakidwanget ngakan.’

¹⁹Tolimok ngolo tama, ‘Ipolokini iyong ngirerea ngikan.’

²⁰Bu ekasuban etich loche tama, ‘Ekapolon, ngaropiyae kon nu kane, edait ayong alotooma awaru.

²¹Kaemi ayong iyong kainyo irai iyong itwaan nikaadengan. Ilemari ibore ni nyerai ikon, nabo ilemi iyong ngalemet na nyitakina iyong.’

²²Tolimok ngesi ekasuban etich tama, ‘Irai iyong ekasuban etich loaronon! Kerirae ayong iyong a ngakiro ana tokona ilimuni iyong!’ Iyeni iyong atamar arai ayong itwaan nikaadengan ni alemari ibore ni nyerai ikang, nabo atolemi ngalemet na nyitakina ayong.

²³Ani kikote neni a, nyo peiwaakinea iyong ngaropiyae kang nabengki? Arai kikok iyong neni kariamunit ayong kiatakin na abongunio.

²⁴Tolimok lu awaasi kaneni tama, ‘Tolemasi ngaropiyae nguna anikeng sodi nakis ekasuban etich lo eyakasi ngaropiyae na idwangito nache ngakidwanget ngatomon.’

²⁵Tolimokis ngesi tamasi, ‘Ekapolon, eyakasi ngesi sek ngatomon!’

²⁶Tatachak ngesi tama, ‘Kalimokinit ayong esi atamar itwaan daang ni eyei ibore, einakinio ni elal. Nakaneni itwaan ni emam ibore, edemario tani nidiochichi ni etingit!

²⁷ Ani eliwor ngimoe kang lu nyesakete ayong atoliwor ekapolon kech, yautu kesi nege ataara alongaren kang!’ ”

²⁸Na alimunio Yesu nguna, sodi tolot Yerusalem kingarenik kesi.

²⁹Na apikinea ngesi ngirerea a Betipage ka Betania lu ayakasi diye emoru a ngikito a akimiet, tomea ngesi ngirukitos ngiarei kingarenikis.

³⁰Tolimok tama, “Kapesi nadakar na eyei ngaren kus, ani ilomarete neni, iriamunete itasikiria ni eringa nyedoka a ache eenikinitae neni. Talachutu taramut nege.

³¹Ani kingit esi itwaan idio tama, ‘Nyo ilacheta esi itasikiria?’ Tolimokisi ngesi atamar esaki Ekapolon.”

³²Toloto kesi toriamut ibore daang ikoni eger lo alimokinitor kesi Yesu.

³³Ani eroko elachete itasikiria, kingita ngikulepek a itasikiria kesi tamasi, “Nyo ilacheta esi itasikiria?”

³⁴Tatachut kesi tamasi, “Esaki Ekapolon”,

³⁵sodi taramut kesi itasikiria nia Yesu. Dio kidokokis ngiworui kech kidiama itasikiria, kingarakis Yesu todokarea kidiama itasikiria.

³⁶Ani na alosio itasikiria ni adokit Yesu, topetakis ngitunga ngiworui kech lorot.

³⁷Na aapuunea Yesu Yerusalem ni etiyaaror erot lotenet lowae a emoru a ngikito a akimiet, tolomak asepich a ngirukitos keng abuakin Akuj alakara ka akipuruun Akuj iremasi lokojokon kotere ngakiro nakailiilok aanyungarete kesi ebalasi:

³⁸ “Epiarit Akuj Ekapolon lo ebuni a ekiro a Akuj! Ekisil min nadis, nakaneni Akuj epolot dir!”

³⁹Tolimokis Ngiparisayo ngiche lu ayakasi nasepich a ngitunga Yesu tamasi, “Eketataman, kikilak ngirukitos kon kililinga!”

⁴⁰Tatachak Yesu tama, “Kalimokinit atamar, ani kililinga kesi, echalakinete ngamoru nu.”

⁴¹Taapia Yesu lore, ani na engolikinea, kikalou kotere ngitunga a ere kangolo,

⁴²ebala, “Arai bo dang toyenete esi akolongit na ibore ni ejoikinit isilere! Nakaneni nyipedorete tokona esi akiyen!

⁴³Epote ngirwa lu kirikauneta esi ngimoe kus kitolukut sodi kiratakis esi kitoroosi a ngiwaitin kadaang.

⁴⁴Kinyasunete kesi esi ka ngide kus lu eya tooma nawasea kus, emam amoru tani apei imiekinio esipo, kainyo peiyenete esi esaa lo abunio Akuj ayuun esi!”

⁴⁵Toloma Yesu kai a Akuj kitwarak ngimuchurus,

⁴⁶ tolimok kesi tama, “Igiritae nagiran atamar ebala Akuj, ‘Enyarao Akai kang Akai nakilipet.’ Nakaneni iloch tokona esi itaraut aburibur na eduketa ngirukooi!”

⁴⁷Etatami Yesu alokai a Akuj ngirwa daang. Asakete Ngimurok luapolok a akai a Akuj ka ngiketatamak a etal, ta ngikarikok a ngitunga akiar Yesu,

⁴⁸nakaneni tongopik kesi kona earete kainyo apupete ngitunga daang ngakiro keng, amam tani ipei asaki akiroit tani apei tobuchar.