Read turkana Luka 2 Bible Online

Luka 2 - turkana bible

Luka 2

¹Ngirwa ngulu todung ekapolon a Ngiroma Augosto atamar kigirae ngirora a ngitunga a ngakwapea kadaang kimarae.

²Ekimar lo ekingaren ngolo egiritae kaneni, na araakar Kirenio ekapolon a Ngiroma anakwap a Siria.

³Sodi toloto ngitunga daang akigiro, itwaan daang tolot nikolong edounere!

⁴Tonyou Yosep dang alore a Nasaret alo eyei nakwap a Galilaya, tolot lore a Betleem, nakwap a Yudea, nikolong edounere ekapolon Daudi. Tolot Yosep inaa ani araakar ngesi ales a Daudi.

⁵Sodi tolot ngesi kigirere aapei ka Mariam na anerit. Nabo apoti Mariam.

⁶Ani na ayakatar kesi Betleem, abu tanang ngirwa keng lu idounio.

⁷Kidou ngesi lokookeng lo a ekingaren, kilogak ngiworui a ikoku a niichi, kiteperik ngesi nateger na emaseta ngaatuk, kainyo adiding akai a ngipeyok.

⁸Ayakasi ngikeyokok nakwap ngina lu akienyete anaro iyokiyete ngibaren kech nakwaare.

⁹Apot kesi kingolikis emalaikat a Ekapolon ebunit nikech, abu akwangis a Ekapolon tokwangu alowaitin kadaang, sodi apot kesi toema noi.

¹⁰Nakaneni tolimok emalaikat kesi tama, “Nyieam! Kainyo kainunit ayong esi ngakiro naajokak na italakarete ngitunga daang.

¹¹Kainyo akolongit naga, edoun Ekayuunan kus alore a Daudi, Kiristo lo erai Ekapolon!

¹²Iyenete a eger kalo: iriamunete ikoku niichi ni imukokinitae ngawarui eperi anateger ana emaseta ngaatuk!”

¹³Nakaneni pot ngimalaikae lukaalak anadis atipei kimorikin ka emalaikat ngolo, toeokis ipuruunito Akuj ebalasi:

¹⁴“Kipuruunoe Akuj alokidiama nadis! Taanyut ngitunga a akwap ekisil, ngitunga lu italakarito ngesi!”

¹⁵Na arotokinioto ngimalaikae tobongosi nadis, apot ngikeyokok tolimonokin make tamasi, “Potu apana Betleem ataanyutu ngakiro nguna kesubasi, nakilimok ngoni Ekapolon.”

¹⁶Apot torotokis kikomakis toriamut Mariam ka Yosep ta ikoku niichi ni aperi anateger.

¹⁷Ani ingolikinete ngikeyokok ngesi, apot tolimokis kesi ngakiro na alimokinit kesi emalaikat anikoku kangini.

¹⁸Ngitunga daang lu eirarete, tatalasi ngakiro na alimokinete kesi ngikeyokok.

¹⁹Nakaneni abu Mariam kitam ngakiro nguna daang kiwaak lotau keng lokojokon noi.

²⁰Apot ngikeyokok ngulu tobongosi eeosi, ipuruunito Akuj kotere ngakiro daang na eirarete ta na engolikinete dang, kona ekoneta daang eger lo alimokinitor emalaikat.

²¹ Adaunet a ngirwa a ngikan-kauni na etemokinor akilenger ikoku, tolimokis ekiro be Yesu, loger losek anyaritor emalaikat ngesi eroko nyepotiuno.

²²Nakaneni tanang akolongit na itosegere Mariam ka Yosep, loger lokolong alimunitere Alotal a Musa. Apot kesi toloto Yerusalem yaasi idia inaa ngaren Ekapolon ebaasi toliwor ikeng,

²³kona igiritere Lotal a Ekapolon kona: “Ikoku daang nisapat ni idounio ekingaren, eliwor ni italeuno a Ekapolon.”

²⁴ Tolemut kesi ngakurio ngaarei kori ta kidomelio ngaarei, kipotosi erai akipeyoet a Akuj loger lo elimunitere Alotal a Ekapolon.

²⁵Ngirwa ngulu ayei itwaan ipei ni alomit Yerusalem enyaritae Simeon. Arai ngesi itwaan ajokon ni akerit Akuj, edarit ngesi Isirael eyuunio, nabo ayei Etau a Akuj nikeng.

²⁶Nakaneni alimokinit ngesi Etau a Akuj atamar nyetoani eroko nyingolikina Kiristo lokolong echikakinitae atamar emeunio.

²⁷Bu ngesi kai a Akuj erikit Etau a Akuj, sodi apot ngikauriak a Yesu yaut ngesi tooma akai a Akuj esakete akitalere loger lo elimunitoe Alotal.

²⁸Tadaku Simeon ikoku a ngakan keng kipuruu Akuj ebala:

²⁹“Iyook tokona iyong Ekapolon akichikakinet kon, kimiek ekasuban etich kon tolot a ekisil.

³⁰Kainyo aanyunga ayong ayuuno kon a ngakonyen kang a elope,

³¹ngina kolong isubakini iyong alongaren ngakonyen a ngitunga kadaang.

³² Toliwor akwangis na idodiunit erot kon alobukui alu nyerai Ngiyaudi, nabo yau ekipur kon lotunga kon a Isirael.”

³³Nakaneni tatalasi apakeng ka itiokeng ngakiro na eruoro Simeon ani a Yesu.

³⁴Topia Simeon kesi tolimok Mariam itiokeng tama, “Aseu Akuj ikoku en sodi kinyasunotor lukaalak nabo toyuunotor lukaalak alo Isirael. Sodi toliwor ngesi emachar lo ebunit Anakuj sodi kiruorotor ngesi ngitunga lukaalak kitopega,

³⁵sodi kileereuneto ngakiro na imunonito kesi. Tani iyong alope, kiriebete iyong ngichan etau tosub kichumitae a akwara.”

³⁶Ayei akadwaran a Akuj anyaritae Ana, nakookeng a Panuel, arai ngesi aka a ekitela a Acheri. Amojongit ngesi noi, nabo eboito ngesi ka lokile keng ngikaru ngikan-kaarei na eusere.

³⁷Arai ngesi apuserut na araakasi ngikaru keng ngitomwon-kauni ka nguomwon. Pearotonokini ngesi alokai a Akuj, apaaran ka akwaar elipit ngesi Akuj jiik, aroneene akimuj, nabo kilipite.

³⁸Esaa ngolo abu ngesi todol tobuak Akuj alakara. Abu ngesi tolimok ngitunga daang ngakiro a ikoku. Ngitunga ngulu kesi lu edarito ngirwa lu eyuunea Akuj Yerusalem.

³⁹Na arumoreta ngakiro daang loger lokolong alimokinitere alotal a Ekapolon, apot tobongosi nakwap a Galilaya toloto nawi kech na ayei lore a Nasaret.

⁴⁰ Abu ikoku ngini topolou togogonger, nakaneni aos ngesi noi nabo apiarit Akuj noi lokojokon.

⁴¹Ekaru daang aloseenete ngikauriak a Yesu Yerusalem Losukukuu lo anyaritae Adeparet.

⁴²Na araakar Yesu ngikaru ngitomon ka ngiarei, toloto kesi losukukuu kona palem.

⁴³Ani edaunosi ngirwa a esukukuu, apot tobongosi nawi nakaneni abu idia Yesu kidong Yerusalem. Nabo ngitunga lukeng ngulu peayenete ngakiro nguna,

⁴⁴etamete kesi atamar kori erukito ngesi ka ngikalotok, na alooso kesi akolongit ngina daang, sodi tolomakis kesi akisak ngesi kiding ngiyenet ka ngipaalon kech.

⁴⁵Apot nyeanyut ngesi, nakaneni tobongosi Yerusalem akisak ngesi.

⁴⁶Akolongit na a ngauni apot toriamut ngesi alotooma Akai a Akuj, ibooyete ka Ngiyaudi lu araakasi ngiketatamak, epupi na eruorosi kesi nabo kingitanari kesi ngakiro.

⁴⁷Tatalasi daang lu eirarete ngakiro keng eger lo atachanakinea ngesi kesi ngakiro a aosou.

⁴⁸Ani ingolikinete ngikauriak keng ngesi, tatalasi noi ngakiro nguna tolimok itiokeng ngesi tama, “Ikakoku, nyo kisubea iyong sua kona? Kialolongi ayong ka apakon noi kisaki iyong.”

⁴⁹Tatachak kesi tama, “Nyo kisaketa esi ayong? Nyiyenete esi atamar ejoikinit ayong ayei nawi ka Apakang a?”

⁵⁰Nakaneni nyeyena kesi ngakiro na alimokini ngesi kesi.

⁵¹Abu Yesu tobongosi ka kesi Nasaret kiboikinos ka kesi epupi ngakiro kech. Nakaneni abu itiokeng toting ngakiro nguna daang alotau keng kirichak.

⁵² Abu Yesu topolou, nabo toos, italakarit Akuj ka ngitunga.