Read turkana Luka 20 Bible Online

Luka 20 - turkana bible

Luka 20

¹Akolongit apei na ayakar Yesu tooma kai a Akuj itatami ngitunga Ngakiro Naajokak, pot Ngimurok Luapolok a akai a Akuj ka ngiketatamak a etal ta ngikasukou a Atuk nikeng

²kingita tamasi, “Tolimokinae mono iyong sua atamar anipolou isubea iyong ngakiro nu? Ngae kitaanyuni iyong apolou na?”

³Tatachak Yesu kesi tama, “Kengisi ayong dang esi akiroit. Tolimokinae chene esi ayong,

⁴aliwae aanyunea Yoana apolou na ibatisaa ngitunga a ngakipi, nia Akuj kori lotunga?”

⁵Tolomakis akingitanar make ebalasi, “Ekoe, kitamari ai? Ani kitama ngoni, ‘Aanyuni ani a Akuj,’ kingisi ngesi ngoni tama, ‘Ani nyo bo peinupeta esi ngakiro a Yoana?’

⁶Nabo ani kitama ngoni, ‘Aanyuni alotunga,’ kimasi ngoni asepich a ngitunga a ngamoru kainyo eyenete kesi dir atamar arai Yoana ekadwaran a Akuj.”

⁷Sodi tatachakis kesi tamasi, “Nyikiyeni sua ni keanyunea.”

⁸Tolimok Yesu kesi tama, “Nyakalimokini ayong dang esi atamar anipolou asubea ayong ngakiro nu.”

⁹Abu Yesu tolimok ngitunga ngakitadapet nugu tama: “Etae kolong itwaan amana a ngikito alu enyaritae ngimusabib, sodi toisikinea amana ngina ngiketak tonyou ngesi anawi kichuar.

¹⁰Na anangea ngirwa lulemet amana, tomea ngesi ekedalan keng tolot loketak ngulu esaki atamar kidiau epewae a ngalemet. Kirumut kesi ekedalan ngolo, kibungata sodi kitwarakis tobongo a ngakan anikirion.

¹¹Tomea ngesi ekedalan eche, nakaneni kibungata ngiketak ngulu ngesi dang, tosubeta niaronon, kitwarakis ngesi tobongo a ngakan anikirion.

¹²Tomea nabo ekedalan lo a nguuni, kibungata ngesi dang ngiketak, kitwarakis alomana.

¹³Tolim elope a amana tama, ‘Ekokini ayong ai? Ameari ayong Lokookang lominat, epedorete kesi akiker ngesi!’

¹⁴Nakaneni na engolikineta ngiketak a amana ngesi tolimokin make tamasi, ‘Lokookeng lo! Potu ataara toliwor amana ayok!’

¹⁵ Kipudosi ngesi nikalapatan a amana taarakis neni.” Kingit Yesu kesi tama, “Tokona a, anukiro esubakinea elope a amana ngiketak ngulu?

¹⁶ Eari ngesi ngiketak a amana kangina na ebunio sodi nak ngiketak ngiche amana ngina.” Na eirareta ngitunga nguna, tamasi, “Wae, abe ejoikinit peikokinete neni!”

¹⁷Tokienyik Yesu kesi kingit tama, “Nyo tokona eger a ngagiran ana igiritae kona? ‘Amoru nakolong angerete ngikadukok ebaasi erono, ngesi tokona ajoker noi edwang daang.’

¹⁸Ani kedakakin itwaan namoru ngina, etiakatiakar a ngalooso, ani itwaan ni echakakin amoru ngina kidiama keng, iriari ngesi kikok apua.”

¹⁹Asakete ngiketatamak a etal ka Ngimurok Luapolok a Akai a Akuj akirumun Yesu kaneni, kainyo ayenete atamar esisauni ngesi ngakitadapet nguna itepegitor kesi. Nakaneni tokera kesi akirumun ngesi kotere ngitunga.

²⁰Nakaneni tasaka kesi erot lo irumuneta ngesi torikosi lokapolok a Ngiroma. Todiaka kesi ngirototin nakis ngaropiyae ani erumor tomeasi akilok Yesu a ngakiro ana elimuni. Toloto kesi nikeng emodito esibit eraakasi ngitunga luajokak.

²¹Tolimokis ngirototin ngulu Yesu tamasi, “Eketataman, kiyeni sua atamar ngakiro na iruoro iyong ka na itatami iyong eraakasi ngaka iteni. Nyikachit iyong keyenikinitae itwaan kori kemam, nakaneni itatami iyong ngakiro na esakit Akuj alotunga.

²²Tolimokinae sua atamar ejoikinit Alotal kosi kibukokini sua ekapolon a Ngiroma echur kori emam?”

²³Kona ayenea Yesu atamar kalokitae ngesi a ngakiro kanguna, dio tolimok kesi tama,

²⁴“Kidodikinae chene aropiyat.” Sodi kingit Yesu kesi tama, “Eka ngae ereet ka ekiro lu eya kidiama lu?” Tatachut tamasi, “Ngika ekapolon a Ngiroma.”

²⁵Sodi tolimok Yesu kesi tama, “Ani kikote neni, nakisi ekapolon a Ngiroma ibore ni erai ikeng, nakis Akuj ni erai ika a Akuj.”

²⁶Tongopik kesi ibore ni elokuneta ngesi kaneni alongaren ngitunga. Kililinga chek, etalarito ngakiro na atachuni ngesi nguna.

²⁷Pot Ngisadukayo ngiche nia Yesu. Ebaasi kesi nyeyarunete ngikatoak. Kingita kesi Yesu tamasi,

²⁸“Eketataman, igirakinit kolong Musa lotal kona, ‘Ani ketoana itwaan toisik aberu keng emam ngide, ejoikinit lokaatokeng irumi aberu ngina sodi touriut ngide lu eliworosi ngika ngolo atoani.’

²⁹Ayakasi kolong ngikaitotoi ngikan-kaarei, kuuta loapolon totoan nyeanyuna ngide.

³⁰Kirum lo a ngiarei aberu ngina,

³¹ta nabo tani lo a nguuni. Tosubakin napeikiro nguna alokaitotoi alukan-kaarei kangulu kadaang, totoaka nyeanyuna ngide.

³²Ani ekisidi, abu aberu ngina dang totoan.

³³ Tokona a, na enangea akolongit na eyaruneta ngitunga daang, eliwor aberu aka ngae? Kainyo arai ngesi aberu alukan-kaarei kangulu kadaang.”

³⁴Tatachak Yesu kesi tama, “Iutasi ngikiliok ka ngaberu a ngirwa kalu,

³⁵nakaneni ngikiliok ka ngaberu na ejoikinit iteyarunio sodi kibooyoto monan ngirwa lu epote, nyiutanarete kori nyiusio.

³⁶Ikokinete kesi ngimalaikae nakaneni nyetoakete jik. Eraakasi kesi ngide a Akuj ani eyaruneta.

³⁷Nakaneni idodiunit Musa dang atamar ngulu etoakito iteyarunio toyara, anagiran ana igiritae ngakiro a ekitoe alo anoki, alimuni ngesi ngakiro a Ekapolon tama, ‘Ekapolon ngesi erai Akuj ka Aburaam, Akuj a Isaka ta Akuj a Yakobo.’

³⁸ Erai ngesi Akuj alu eyarete, meere Akuj alu etoakito, kainyo eyarete daang anikeng.”

³⁹Kiruorikis ngiketatamak a etal ngiche tamasi, “Eketataman, itachu iyong niajokon!”

⁴⁰Toema kesi akingit Yesu ngakiro ngache.

⁴¹Kingit Yesu kesi tama, “Nyo ebaatar ngitunga erai Kiristo alesit a Daudi?

⁴²Kainyo abala Daudi elope anakitab ana a Ngieosio kona, ‘Alimokini Akuj Ekapolon Ekapolon kang tama, kiboikin ne lowae kang lo aloteten

⁴³ tanang na edwangea ngimoe kon pena kwap ngakejen kon!’

⁴⁴Ani kenyarit Daudi ngesi ‘Ekapolon’, ikokini nabo Kiristo eliwor ales a Daudi ai?”

⁴⁵Na apupokinitor asepich a ngitunga Yesu, tolimok ngesi ngirukitos keng tama,

⁴⁶“Tochoikinos aloketatamak a etal, eminasi kesi akirimit akwap enapito ngiworui lukooyak, nabo kimalae a arimatoi ani egieleta ngitunga ngiboro. Eseunete kesi niajokon ni iboikinosi anakais a Atuk ka ni imujere.

⁴⁷Edemete kesi ngapuseru ngiboro kech, ani erumor, kilipa nikooyen iwogasi akiding pas! Eroner eriras kech noi!”