Read turkana Luka 21 Bible Online

Luka 21 - turkana bible

Luka 21

¹Kingolia Yesu kingolik ngikabarak iwaanakinete ngaropiyae nasaduku a ngaropiyae na ayei tooma akai a Akuj.

²Kingolik ngesi tani apuserut na ebootonit iwaakini ngadururio ngaarei.

³Tolim Yesu tama, “Kalimokinit ayong esi atamar ewaak apuserut nakebootonit na ngaropiyae nakaalak nasaduku na idwangito na a ngitunga aluche kadaang.

⁴Kainyo ngitunga ngulu daang ewaanakinete ngaropiyae analalau a ebari kech. Nakaneni ngesi aloboot keng, ewaak daang na atingit ajal tani napalem eyaritor.”

⁵Eruorosi ngiche ngakiro a akai a Akuj ebaasi ejok noi isubusitae a ngamoru. Eruorosi kesi tani ngakiro a ngalemikinet ana alemikinio Akuj. Tolim Yesu tama,

⁶“Nugu daang na iteete esi, enangi akolongit na nyidongio tani amoru apei ni tokona eya nege, eukorio ngamoru daang.”

⁷Kingita tamasi, “Eketataman, ori esubakinotor ngakiro nugu? Nyoni esubakin toyenere atamar anang akolongit na esubatar ngakiro nu?”

⁸Tolimok Yesu kesi tama, “Tochoikinos kuriasi itwaan nyikingala esi. Epote ngikaalak iruorosi a ekiro kang ebaasi, ‘Ayong ngesi ngolo!’ Kori atamar, ‘Anang esaa!’ Nakaneni tochoito iwapakinete kesi.

⁹ Kuriasi nyikibul na iirareta esi ngakiro a ejie ka ekurikur, esubakinosi ngakiro na ikote nguna, nakaneni nyidodiunito kesi atamar anang esal.”

¹⁰Kianua Yesu ebala, “Ejikinosi ngitunga a akwap aapei ka lua akwap anache. Eremete ngitunga a ekapolon a epei ngitunga a ekapolon aloche.

¹¹Emaranikini akwap alowaitin alugelagelae nabo emini eron a akoro ka ngidekesinei daang luaronok, epete ngakitoodikinet naationok nadis iteemete ngitunga.

¹²Nakaneni ani eringa ngakiro nugu daang nyesubakina, kirumunio esi, kitoboliare noi, kititao esi anakais a Atuk, kitoinikin lojela dio kitorikor kitowei alongaren ngikarikok ka ngikapolok kotere ayong.

¹³Eliwor alolom na ilimoreta esi Ngakiro Naajokak a Yesu Kiristo ngina.

¹⁴Kuriasi ngakiro nyeeriab ngitai kus ibaasi anukiro ilimunete kori ilimunete kwaai,

¹⁵kainyo kainakini ayong esi ngakiro ka aosou na emam tani ipei a ngimoe kus ni epedori akituluny kori apega ngakiro na ilimunete esi.

¹⁶Kipotorete esi ngikauriak kus, ka talokaato kus ka ngiyenet ka talopae kus nabo epedorete tani epewae kus aaro.

¹⁷Kiremokinosi esi ngitunga daang kotere ayong.

¹⁸Nakaneni emam tani etimat epei lo a ngakies kus lo echakar.

¹⁹Ani kititinyikis esi nugu, iyuunete esi ngitai kus.

²⁰“Naingolikineta esi Yerusalem irikaunito ngajorei a ngimoe, toyena esi atamar edikino inyasunio atipei.

²¹Ejoikinit lu eyakasi nakwap a Yudea ematarosi lomoru, nabo lu eyakasi lore ejoikinit erotokinete, nabo lu echadakina alore, ejoikinit nyeelomut tooma lore.

²²Kainyo eliworosi ngirwa ngulu ‘Lu a Eriras,’ kiyookinotor na igiritae nagiran.

²³Erokearosi noi ngakiro ngirwa ngulu ani a ngaberu ana epotiete ka na itanakete! Epete ngakiro naaronok nakwap na, nabo emini anyunyura a Akuj lotunga lugu!

²⁴ Ichumio ngiche kech a ngilengea taarae, erikio ngiche nakwapea nache, ipudaate ngibukui luche Yerusalem tanang ngirwa lu edaunor apolou a ngitunga alu nyerai Ngiyaudi.

²⁵“Epete ngakitoodiunet naparing nakolong ka elap ta ngikanyer. Elomakinete ngibukui daang ariaba nabo toema akulare a anam ka aruore na elelea.

²⁶Ebuli ngitunga niaronon idarito ngakiro na epote nakwapea daang, kainyo emaranikini agogongu daang nakaanikan ka na eyei kidiama.

²⁷Sodi etakanuni Lokookeng a Itwaan kingolikinae ngesi ebunit alotooma ngidowon ka agogongu naapolon ta akwangis a apolou.

²⁸ Ani enangi ngirwa lu iyookinotor ngakiro nguna daang, kikeasi ngakies kus kidiama towaa, kainyo aapuu ayuuno kus.”

²⁹Abu Yesu tolimok kesi ngakitadapet nugu tama: “Kitama mono esi eger a emeyen ka ngikito luche daang.

³⁰Na ingolikineta esi ngakui kech kimineut, iyenunete atamar aapuu akiporo.

³¹Aloger alopei kangolo, na ingolikineta esi ngakiro nguna esubakinosi, toyena atamar aapuu Apolou a Akuj abunere.

³²“Kalimokinit ngakiro na iteni dir atamar esubakinosi ngakiro nguna daang eringa epewae a ngitunga alu tokona eyarete nyetoaka.

³³Edaun adis ka akwap nakaneni nyedaunosi ngakiro kang jik.

³⁴“Tochoikinos! Kuriasi akimwonut ka elewas ta ngichan a eboyor a akwap nyikitumosi esi, tanang akolongit ngina atipei peiyenete esi,

³⁵loger a elokit alo irumi ibore atipei. Epote ngakiro nguna lotunga daang anakwap.

³⁶ Kiboikinos irichuna nabo kilipa ngirwa daang sodi taanyuneta agogongu na ipuunotor anakiro kadaang ana esubakinosi, dio towaatar alongaren Lokookeng a Itwaan.”

³⁷Ngirwa ngulu, etatami Yesu jiik alokai a Akuj, ani naewaria topudo ngesi tolot akiper moru a ngikito a akimiet.

³⁸Aloseenete ngitunga daang nataparach kai a Akuj akipup ngakiro keng.