Read turkana Luka 22 Bible Online

Luka 22 - turkana bible

Luka 22

¹Aapikinit ngirwa lu esukukuu a Ngamugati a Napadok, lu eraakasi ngika a esukukuu alo enyaritae Adeparet.

² Aemito Ngimurok Luapolok a akai a Akuj ka ngiketatamak a etal, ngitunga. Sodi tasaka kesi erot lo irumuneta Yesu taara.

³Sodi toloma Esiitan nia Yuda, ngolo anyaritae Isikariote, arai ngesi epei a ngirukitos alutomon ka ngiarei.

⁴Sodi tolot Yuda kiana ka Ngimurok Luapolok a akai a Akuj ta ngikapolok a ngasigerea ana eteete akai a Akuj eger lo erikokinea ngesi kesi Yesu.

⁵Talakaros kesi kichikakis ngesi atamar kiinakini ngaropiyae.

⁶Sodi Yuda tacham ngaropiyae tolomak akisak erot lo erikokinea kesi Yesu peeyenete ngitunga.

⁷Tanang akolongit na a Ngamugati a Napadok, akwaar na engolere imesek ngini enyamio akwaar a esukukuu a Adeparet.

⁸Tomea Yesu Petero ka Yoana tolimok tama: “Kapesi tosubakisi akimuj na a esukukuu a Adeparet, dio atanyama.”

⁹Kingita ngesi tamasi, “Aliwae isaki iyong sua atoloto atosubakineta?”

¹⁰Tolimok tama, “Topupokisi! Na ilomareta esi lore, kisiriami esi ekile lo edakit alupe a ngakipi. Kiwapakisi ngesi tanang kai na elomari ngesi,

¹¹sodi tolimokis esi elope a akai kangina tamasi, ‘Ebala Eketataman kingita iyong keyei wadio nikaaloman ni imujeta ngesi ka ngirukitos keng akimuj a esukukuu a Adeparet.’

¹²Kidodikini ngesi esi amaniyat naapolon na esubakinitae alokidiama akai. Iriamunete esi eya ngiboro daang, tosubakisi akimuj kaneni.”

¹³Toloto kesi toriamut ibore daang ikoni ni alimokinitor Yesu kesi, sodi tosubakis akimuj a esukukuu a Adeparet.

¹⁴Na anangea esaa, kiboikinos Yesu ka ngimeanara keng kimuja.

¹⁵Tolimok kesi tama, “Kemuit ayong noi akimuj ka esi akimuj a esukukuu alo Adeparet eringa ngitunga nyeboliara ayong!

¹⁶Kalimokinit ayong esi atamar nyemuji ayong akimuj na nabo jik tanang akolongit na eriyanea dir eger keng Anapolou a Akuj.”

¹⁷Tolem Yesu ekopo lo ayei emuna lo epuritoe, kilipak Akuj tolim tama, “Totinga tomora.

¹⁸Kainyo kalimokinit ayong esi atamar nyamasi emuna lo epuritoe nabo napei tokona jik tanang na ebunio Apolou a Akuj.”

¹⁹Sodi tolem amugati kilip Akuj, tonyil nak kesi ebala, [“Akwaan kang nakiinakin esi ngesi naga. Tosuba kona kitamunitotor ayong.”

²⁰ Aloger alopei kangolo, na adaunor akimuj, nak kesi ekopo tama, “Ekopo logo ngesi achamunet a Akuj nakitetet na eyookin a ngaakot kang anabukorosi kotere esi.]

²¹“Wae, kingolikisi mono esi a! Ngolo karikokini ayong ngitunga kiboi ka ayong kane alomeesa!

²²Etoani Lokookeng a Itwaan kona etiakunitor Akuj, nakaneni etioko nginyas eriamuni itwaan ni erikokini ngesi ngitunga!”

²³Tolomakis akingitanar make atamar ngae anikech esubakini ngakiro nguna.

²⁴Topegakinos ngirukitos keng atamar ngae epolot noi anikech.

²⁵Tolimok Yesu kesi tama, “Epolokinito ngikapolok a ngibukui alu nyerai Ngiyaudi ngitunga kech. Nabo ngulu eweikinito kesi enyaritae, ‘Ngipaalon a ngitunga.’

²⁶Nakaneni nyejoikinit ngakiro ikokinete neni anikus, ejoikinit ni epolot anikus ikwaanikin ka ni edit, ani ni epolot, ejoikinit ikwaanikin ka ekasuban etich.

²⁷ Ngae epolot, ngini ibooyi alokwap imuji, kori ngini ekoranakini ngesi akimuj? Erai ngini ibooyi alokwap imuji. Ekoni tokona ayong alokiding kus ekakoran.

²⁸“Kiruk ngoni napei kolong jik anakiningioto kang kadaang.

²⁹Kona ketiliworea ayong Apakang Ekapolon, ketiliwori ayong esi dang ngikapolok.

³⁰ Imujete esi akimuj ka akimat ngakipi alomeesa kang, Anapolou kang. Iboikinosi tani lokicholong kirirata ngitela lutomon ka ngiarei a Isirael.

³¹“Ayoro Simon, topupok mono iyong! Achamakin Esiitan akining esi sodi totiaku luajokak ani eya luaronok loger a eketan alo edauni ngichok a ngakanoi anasiina.

³²Nakaneni kelipak ayong iyong Simon sodi nyiilochokin anupit kon. Ani na ibongunio iyong nikang, ejoikinit iyong itogogongi talokaato kon.”

³³Tatachak Petero ngesi tama, “Ekapolon, alemuna ayong alosit ka iyong kerai lojela kori atoakere ka iyong aapei!”

³⁴Tolimok Yesu ngesi tama, “Kalimokinit ayong iyong Petero atamar, ani eringa ekokoroit nyerukino atabong naga, ilimuni iyong ngalimunet ngauni atamar nyikiyeni ayong.”

³⁵ Kingit Yesu kesi tama, “Nakolong kamearea ayong esi emam etokole kori echue kori ngamuk, ayei ibore ichanasi esi a?” Tatachut tamasi, “Amam ibore kichana.”

³⁶Tolim Yesu tama, “Nakaneni tokona, ejoikinit itwaan cha daang ni eyei etokole kori echue etingi, ani ngini emam ekileng ejoikinit egielari eworu keng sodi togiel ekileng.

³⁷ Kainyo kalimokinit ayong esi atamar, ejoikinit ngagiran na igiritae kona iyookinosi anikang, ‘Emarunio ngesi ka ngirukooi aapei.’ Kainyo iyookinosi nguna egiritae kotere ayong.”

³⁸Tolimokis ngirukitos keng tamasi, “Ekapolon! Kingolik a! Eyakasi ngilengea ngiarei ne!” Tatachak tama, “Arumor!”

³⁹Torotok Yesu alore tolot moru a ngikito a akimiet loger lopalem sek. Kirukosi ka ngirukitos keng aapei.

⁴⁰Na anangea ngesi neni, tolimok kesi tama, “Kilipa sodi nyiilomasi nakiningioto.”

⁴¹Sodi torotok ngesi anikech ani enangi ni ebayi ni edoe amoru na imasario, sodi toriedik ngesi kilip.

⁴²Tolim tama, “Apa, ani kichamit iyong, tolema kare ekopo lo anikang. Nakaneni meere kona achamit ayong pearai tosubakin na ichamit iyong.” [

⁴³Bu emalaikat anadis kitogogong ngesi.

⁴⁴Kilip ngesi lokojokon eriaba noi, ekote ngakiinyir keng ngaakot idokasi nalup.]

⁴⁵Na anyounio Yesu ani elipitor, tobongo torukau ngirukitos keng kejotoorosi, kituburut ngakiro na anomito kesi ngitai.

⁴⁶Tolimok kesi tama, “Nyo ijotooto esi? Tonyoutu kilipa, sodi nyianyunosi ka akiningo.”

⁴⁷Ani eringa Yesu iruoro, todolu asepich a ngitunga. Yuda lo arai epei a ngirukitos alutomon ka ngiarei, ngesi arikit kesi. Sodi tolot ngesi nia Yesu tonuak.

⁴⁸Sodi tolim Yesu tama, “Yuda, irikokinit iyong Lokookeng a Itwaan ngitunga a akinu a?”

⁴⁹Na ayeneta ngirukitos a Yesu nguna adikino esubakin, kingitas tamasi, “Ekapolon, ejoikinit sua kiteli kesi a ngilengea a?”

⁵⁰Kitel epei kech ekedalan a Emuron a Loapolon a akai a Akuj nakit na aloteten totubo.

⁵¹Nakaneni tolim Yesu tama, “Arumor!” Tatap ngesi akit a itwaan kangini, kitangalek.

⁵²Tolimok Yesu Ngimurok Luapolok ka ngikapolok a ngasigerea ana eteete akai a Akuj ta ngikasukou a Atuk lu aponito akirumun ngesi tama, “Nyo tokona iponitotor esi nikang itingito ngilengea ka ngiseboe ikwa ibore esibit arai ayong erukoot?

⁵³ Kirukit ayong ka esi ngirwa daang alokai a Akuj, nakaneni peisakete esi akirumun ayong. Nakaneni erai tokona esaa kus lo isubeta etich a apolou a aribu logo.”

⁵⁴Kirumut kesi Yesu torikosi kai a Emuron a Loapolon a Akai a Akuj, ewapit Petero kesi echadakina.

⁵⁵Enokakinitae akim kiding alaar, sodi tolot Petero kimorikin kangulu ebooyete kaneni irikaunito akim.

⁵⁶Na engolikinea ngesi apese apei na asubi etich kaneni ibooyi alodiye akim, abu tokienyik ngesi tolim tama, “Arukito itwaan en dang ka Yesu!”

⁵⁷Nakaneni topeg Petero tama, “Iyong aberu na, nyayeni ayong ngesi!”

⁵⁸Ani ekisidi wadio, toyen ekile eche Petero tolim tama, “Irai iyong dang epei kech dir!” Nakaneni tatachu Petero tama, “Ekile, nyarai ayong!”

⁵⁹Adaunet a esaa epei, bu itwaan iche kirichakin jik lokojokon ebala, “Arukito itwaan en ka Yesu dir kainyo erai ngesi dang itwaan a Galilaya!”

⁶⁰Sodi tatachu Petero tama, “Nyayeni ayong ngakiro na iruoro iyong!” Toruk ekokoroit atipei eringa ngesi iruoro.

⁶¹Torei Ekapolon Yesu tokienyik Petero, dio Petero kitam ngakiro nasek alimokini ngesi Ekapolon ebala, “Ani eroko ekokoroit nyerukino atabong naga ilimuni iyong ngalimunet ngauni atamar nyikiyeni ayong.”

⁶²Topudo Petero sodi kikalou lokojokon.

⁶³Tokienatar ngitunga lu eratakinito Yesu ngesi sodi kibungata.

⁶⁴Kimuko ereet keng kingita ngesi tamasi, “Ngae kirami iyong? Todwar chene!”

⁶⁵Tolimonokis ngesi ngakiro nakaalak na a ngiyeny.

⁶⁶Na ewalarea, kiriamariama ngikasukou a Atuk ka ngimurok luapolok a akai a Akuj ta ngiketatamak a etal, sodi torikoroe Yesu Natuk kech.

⁶⁷Kingita ngesi tamasi, “Tolimokinae mono iyong sua, iyong ngesi irai Kiristo a?” Tatachak tama, “Tani kalimok ayong esi nyinupete esi ngakiro kang,

⁶⁸ani tani kengit ayong esi akiroit nyitachunete esi.

⁶⁹Nakaneni napei tokona jik, iboikin Lokookeng a Itwaan lowae lo aloteten a Akuj Anapolon Noi.”

⁷⁰Kingitas daang tamasi, “Iyong tokona irai Lokookeng a Akuj a?” Tatachak kesi tama, “Ilimut esi atamar ayong ngesi arai.”

⁷¹Tolimut kesi tamasi, “Ekoe, eya nabo ngakiro ngache esakio akiyen a! Kiira ngoni ngikulepek ngakiro na alimu ngesi!”