Read turkana Luka 23 Bible Online

Luka 23 - turkana bible

Luka 23

¹Tonyout ngitunga a Atuk daang torikosi Yesu nia Pilato.

²Nakaneni tolomakis akititare ngesi ebalasi: “Kiriamuni sua itwaan en ingalae ngitunga a akwap kosi, kitengerit sua abukonokin ekapolon a Ngiroma echur, nabo ebala ngesi arai ekapolon, Kiristo.”

³Kingit Pilato Yesu tama, “Iyong irai ekapolon a Ngiyaudi a?” Tatachak Yesu tama, “Nyenguna ilimu iyong.”

⁴Sodi tolimok Pilato Ngimurok Luapolok a akai a Akuj ka asepich a ngitunga tama, “Emam ibore niaronon esubit itwaan en ni echamit ititaare.”

⁵Nakaneni kirichakinos kesi jik ebalasi, “Echuumi ngesi ngitunga a ngakiro ana itatami ngesi alowaitin kadaang a Yudea. Esiakini kolong alo Galilaya, nakaneni anangu tani nege dang.”

⁶Na eirarea Pilato nguna, kingis tama, “Erai itwaan en ika Galilaya a?”

⁷Na ayenea ngesi atamar ebunit Yesu anakwap a ekapolon Erode, abu tolim atamar torikoroe Yesu nia Erode. Ayei Erode Yerusalem ngirwa ngulu.

⁸Talakar Erode noi ani engolikinea Yesu kainyo apupi sek ngesi ngakiro a Yesu, nabo ngirwa ngikaalak, emuit ngesi aanyun Yesu. Asaki ngesi aanyungar Yesu esubakini ngakitoodikinet nakailiilok ngadi.

⁹Sodi kingitana Erode Yesu ngakiro nakaalak, nakaneni kililing Yesu chek.

¹⁰Tonyout Ngimurok Luapolok a akai a Akuj ta ngiketatamak a etal kititakis Yesu lokojokon noi.

¹¹Tokienatar Erode ka ngasigerea keng Yesu sodi tosubeta ngakiro na a ngileech. Ani erumor, kitanapa eworu loajokon tobuasi nia Pilato.

¹²Akolongit ngina, toelokinos Erode ka Pilato, aremokino sek kesi ekingaren.

¹³Tochunak Pilato Ngimurok Luapolok a akai a Akuj ka ngikapolok a ngitunga wapei,

¹⁴tolimok kesi tama, “Irikunete esi itwaan en nikang ibaasi ichuumi ngesi ngitunga. Engichingich tokona ayong ngesi alongaren kus, nakaneni emam ngakiro naaronok na ititata esi ngesi na esubit ngesi.

¹⁵Emam tani Erode dang ibore niaronon aripu anikeng, ngesi abuunea ngesi niyok. Emam ibore niaronon asubaki ngesi ni ejoikinit earere.

¹⁶Atamari ayong kidetae ngesi kimiekinae tolot.” [

¹⁷Kainyo ngirwa daang lua esukukuu a Adeparet, alachanakini Pilato eenat epei.]

¹⁸Tachalu asepich daang a ngitunga tama, “Taara itwaan en! Kisaki sua Baraba talachakinae!” (

¹⁹Aenitae Baraba alojela kotere ekurikur lo esiakini ngesi alore, nakaneni aarit nabo tani itwaan.)

²⁰Kona asakea Pilato alachakin Yesu, kisuruorik nabo asepich a ngitunga.

²¹Nakaneni tachalut tamasi, “Taramakisi napir!”

²²Kingit Pilato kesi na a ngauni tama, “Nyo niaronon esubit ngesi? Emam ibore niaronon aripu ayong ni ejoikinit ngesi earere! Atamari ayong kidetae ngesi sodi talachakinae tolot.”

²³Nakaneni torubakis kesi echalasi noi ebaasi ejoikinit Yesu eramakinio napir, ani esal tosubakin ngakiro loger lo asakete kesi.

²⁴Totub Pilato ngakiro atamar tosubae loger lo asakete kesi.

²⁵Talachak itwaan ni asakete kesi talachakinae, ngesi lo aenikinitae lojela kotere ngakiro a ekurikur ka na a akiar. Dio toriko ngesi Yesu nia ngitunga kangulu tosubeta kesi ngesi nguna echamito.

²⁶Ani na arikitotor kesi Yesu, kiriamunos ka itwaan ni anyaritae Simon lo arai eka akwap a Kurene. Abunit ngesi anadakar ana achadakina alore. Torwakinos ngesi sodi toriongakis apir loseget keng kiwapak Yesu.

²⁷Kiwapak asepich a ngitunga nakaalan Yesu. Ayakasi ngaberu kiding kech na egorosi, nabo tosutonokinete kotere ngesi.

²⁸Nakaneni torei Yesu kingolik kesi tolimok tama, “Ngaberu a ere a Yerusalem! Nyiigor kotere ayong, nakaneni kigoro kotere ngide kus ka esi.

²⁹Kainyo epote ngirwa lu etamareta ngitunga, ‘Epiaritae noi ngaberu nakolup ka nguna nyidouno ngide ta nguna nyitanaka!’

³⁰Ngirwa ngulu ngesi elimokineta ngitunga ngimoru tamasi, ‘Toukunos nikosi!’ Nabo tolimokis ngaukon tamasi, ‘Kidae sua!’

³¹ Ani kasubeta kesi ayong lokikwaan ka ekitoe lokaapalan kona, anu kisubeta kesi esi lu ikwaan ka ekitoe lokoonon?”

³²Kirumut ngitunga ngiche ngiarei lu araakasi ngirukooi, taara ka Yesu aapei.

³³Na anangeta ni enyaritae, “Akulului a Akou”, taramakis Yesu napir ka ngirukooi luarei ngulu, epei lowae lo aloteten, ani loche lowae lo alokedieny.

³⁴ Tolim Yesu tama, “Apa! Torimak kesi ani nyeyeneta na esubete.” Totiakanakinos kesi ngiworui keng a akilere ngisigira.

³⁵ Awaasi ngitunga kaneni iteete ngesi, akienatar ngikapolok a Ngiyaudi ngesi ebalasi: “Ayuuni ngoon ngesi luche, kimiekisi toyuun ngesi bon, kerai ngesi erai Kiristo a Akuj!”

³⁶Tokienatar ngasigerea dang ngesi. Pot nikeng nakis ngesi emuna lo epuritoe,

³⁷tolimokis tamasi, “Toyuun bon kirai iyong ekapolon a Ngiyaudi!”

³⁸Egiritae ngakiro nugu atapakinitae kidiama napir lo aramakinio ngesi, “Logo ngesi erai ekapolon a Ngiyaudi.”

³⁹Kiyeny ngesi epei a ngirukooi alu aramakinitae ka ngesi neni tama: “Ikwa meere iyong irai Kiristo? Toyuun bon, kitoyuu tani sua dang!”

⁴⁰Nakaneni kikilak ngesi loche tama, “Nyikerit iyong Akuj a? Kiriratae iyong ka ngesi aapei.

⁴¹Nakaneni kiriratae ngoni dir kotere ngakiro na kisubi ngoni, nakaneni emam itwaan en ngakiro naaronok asubaki,”

⁴²sodi tolimok ngesi Yesu tama, “Kitamunae ayong Yesu, na ibongunio iyong irai Ekapolon.”

⁴³Tolimok Yesu ngesi tama, “Kalimokinit ayong iyong atamar kipeni ayong ka iyong najako a Akuj akolongit na!”

⁴⁴Na anangea ngisaae ngikan-kapei naparan lotingilan, kirionik akwap daang chuch tanang ngisaae ngikan-koomwon esongi akolong.

⁴⁵Tochil awaru na enenekino kai a Akuj ngachilet ngaarei.

⁴⁶ Kikalou Yesu kirema tama, “Apa! Ewaak ayong etau kang nikon!” Na alimunio nguna dio totoan.

⁴⁷Na anyungarea ekarikon a ngasigerea na asubakinosi, kipuruu Akuj ebala, “Kejok itwaan en dir!”

⁴⁸Na anyungareta ngitunga lu achunakina neni ngakiro na asubakinosi, tobongosi nawiyei kech eramaramate ngirarumo ani anomitotor ngakiro nguna ngitai.

⁴⁹ Daang lu anaikina ka Yesu imorikina ka ngaberu na ewapuunete ngesi alo Galilaya, awaasi echadakina iteete ngakiro nguna daang.

⁵⁰Ayei itwaan neni ni anyaritae Yosep ni abunit alore a Arimatea anakwap a Yudea. Arai ngesi itwaan a Atuk, nabo ajok totenoono.

⁵¹Peachamunit ngesi ngakiro na asaket kesi asubea Yesu. Edarit ngesi abunere a Apolou a Akuj.

⁵²Tolot ngesi nia Pilato atamar asaki akwaan a Yesu.

⁵³Sodi totiyau ngesi akwaan a Yesu toenik loworu lodapal lokooyen, sodi kitoperik naliel na abokakinitae nataaba, ni amam itwaan iche sek anukakinitae.

⁵⁴Arai akolongit ngina Ijumaa, nakaneni aapikinit akinang akolongit na a Sabato.

⁵⁵Kirukosi ngaberu nasek ewapuunete Yesu alo Galilaya ka Yosep dio taanyungasi aliel ka eger lo eperikinere akwaan a Yesu naliel.

⁵⁶ Tobongosi kesi nawiyei kech tosubakis akimiet nakakukunyon na iwasakinete nakwaan keng. Kiangasi kesi akolongit na a Sabato loger lo igiritere lotal a Musa.