Read turkana Luka 24 Bible Online

Luka 24 - turkana bible

Luka 24

¹Toloto ngaberu naliel nataparach elilim akolongit na a Jumapili, etingito akimiet nakakukunyon na asubakinito.

²Toriamut amoru kikokoriyor anakituk a aliel,

³sodi tolomasi tooma, nakaneni nyeriamuna kesi akwaan a Ekapolon Yesu.

⁴Na awaatar kesi kaneni engayakinito eger a ngakiro kanguna, nipei bore ngini towaa ngikiliok ngiarei lu anapito ngiworui luakwaak kea alodiye kech.

⁵Kijuuruoto ngaberu nguna ebulit noi, kingita ngikiliok ngulu kesi tamasi, “Nyo isaketa esi itwaan ni eyari lotunga lu etoakito?

⁶Emam ngesi kane, ayaru. Kitamutu nakolong kilimokini ngesi esi na ayakar ngesi Galilaya ebala,

⁷ ‘Ejoikinit Lokookeng a Itwaan erikokinio ngitunga lukasechak, eramakinio ngesi napir, dio toyaru akolongit na a ngauni.’ ”

⁸Kitamut ngaberu nguna ngakiro a Yesu,

⁹tobongut analiel, tolimokis ngirukitos lutomon ka epei daang ta ngitunga luche daang ngakiro nguna daang.

¹⁰Araakasi ngaberu nguna Mariam Magadalene, Joana, ka Mariam itiokeng a Yakobo, tolimokis kesi ka ngaberu nache arukitotor, tolimokis ngimeanara ngakiro nguna daang.

¹¹Nakaneni abaasi ngimeanara kori araakasi ngakiro na alimunete ngaberu nguna ngapasiek, apot kesi nyeenupa ngakiro kech.

¹²Tonyou Petero kipiiri naliel. Sodi tokudokin toripak, kingolik ngawarui nasek aenitere make analiel, emam nabo ichebore. Tobongo ngesi nawi engayat atamar anukiro kepot tosubakinos.

¹³Akolongit napei ngina, aloose ngirukitos a Yesu ngiarei nadakar enyaritae Emaus, na erai ngakilomitae ngakan-kaarei alo Yerusalem.

¹⁴Alimonokinosi kesi ngakiro daang na asubakinosi.

¹⁵Ani na eruorotor kesi kiyanete, todol Yesu kesi kirukosi aapei.

¹⁶Taanyungasi kesi ngesi, nakaneni kibiler ibore kesi nyeyana ngesi.

¹⁷Kingit Yesu kesi tama, “Anukiro na ianete esi analosit kus nu?” Towaa kesi esiliyorito.

¹⁸Kingit epei kech lo anyaritae Kilopa ngesi tama, “Iyong bon irai epeyonon alo Yerusalem lo nyiyeni ngakiro na asubasi kaneni ngirwa lupei been lua?”

¹⁹Kingit tama, “Anukiro nguna?” Tatachakis tamasi, “Ngakiro na asubere Yesu lo a Nasaret. Arai itwaan ngini ekadwaran a Akuj dir, lo asubi ngakiro nakitalarete nabo kitatami ngakiro nakationok alotunga ka Akuj.

²⁰Atiakunete Ngimurok kosi luapolok a akai a Akuj ka ngikapolok atamar ejoikinit ngesi eario. Taramakis ngesi napir.

²¹Kitamit sua atamar kori ngesi eyuuni Ngisirael! Kanguna kadaang, erai tokona akolongit na a ngauni napei ngoon aarere ngesi naga.

²²Kitoriangakis sua ngaberu ngache na eraakasi ngarukitos kosi, aloose kesi naliel nataparach elilim,

²³nakaneni nyeanyuna kesi akwaan keng. Tobongut kesi ebaasi kingolikini akisingolikinet a ngimalaikae alu kilimokinete atamar eyari Yesu!

²⁴Toloto ngiche kosi naliel torukaut ikoni eger losek abaatar ngaberu, nakaneni nyingolikina ngesi.”

²⁵Sodi tolimok Yesu kesi tama, “Etige ngikabangabangae, abe etioko esi ngitai, nyinupete atipei ngakiro na alimunete ngikadwarak a Akuj!

²⁶Nyiyenete esi atamar ajoikinit Kiristo eboliare sodi tolomarea napolou keng a?”

²⁷Kisisak Yesu kesi ngakiro daang na egiritae nagiran elimunitoe kotere ngesi, kisiak anakitabea a Musa tanang nagiran a ngikadwarak kadaang.

²⁸Na anangeta kesi diyete ere lo aloose, tasak Yesu akiporor,

²⁹nakaneni kiratakis kesi ngesi tamasi, “Bua toper nawi kosi kainyo awaar, ariboki akwap.” Sodi tolot ngesi toloma tooma, kiboikinos ka kesi.

³⁰Ani iboikinosi Yesu ka kesi akimuj alomeesa, tolem amugati dio tobuak Akuj alakara, sodi tonyil ngesi amugati, nak kesi.

³¹Tobwangas ngakies kech sodi toyena ngesi, nakaneni abu ngesi tongop topuripuriakin.

³²Tolimonokinos kesi tamasi, “Ekoe, ikwa ngesi mono kejoikinitotor ngakiro ngitai yok lokojokon na kisuruorea ngesi ngoni alorot nabo kitatamik ngagiran a?”

³³Tonyout kesi atipei tobongosi Yerusalem. Torukaut ngirukitos lutomon ka epei ka ngitunga luche echunakina wapei,

³⁴tolimut tamasi, “Ayaru Ekapolon dir! Atakanuu engolik Simon ngesi!”

³⁵Kisisakis ngirukitos luarei ngulu kesi ngakiro na asubakinosi alorot, ka eger lo ayeneta kesi Ekapolon na anyilea amugati.

³⁶Ani eringa kesi isisaunito nguna, towo Ekapolon atipei alokiding kech tolimok tama, “Ekisil min nikus.”

³⁷Tobul kesi noi tamasi kori kingolik Ekipe.

³⁸Nakaneni tolimok ngesi kesi tama, “Anukiro eriebete ngitai kus? Nyo itiakitotor esi ngitai ngaarei?

³⁹Kingolikisi ngakan kang ka ngakejen kang, sodi toyena atamar ayong ngesi itwaan en. Totingae ayong sodi kitoyan, kainyo emam Ekipe akwaan ka ngakoyo loger lo tokona kiteeto esi ayong eyakasi.”

⁴⁰Na alimunio nguna, kidodik ngesi kesi ngakan ka ngakejen keng.

⁴¹Aringa kesi jik nyenupa, alakara kesi noi etalarito ngakiro a Yesu. Kingit kesi tama, “Eyei ibore idio nege ninyamat a?”

⁴²Nakis kesi ngesi epewae a ekolia alo akonit.

⁴³Kidiau ngesi tanyam alongaren kech.

⁴⁴Tolimok kesi tama, “Ngakiro nu kesi nakolong kalimokinit ayong esi eringa kirukit: Ngakiro daang na egiritae kotere ayong Alotal a Musa ka ngagiran a ngikadwarak a Akuj, ta ngieosio, ejoikinit daang iyookinosi.”

⁴⁵Sodi tobwangas ngakies kech toyena ngagiran.

⁴⁶Tolimok kesi tama, “Nugu kesi na igiritae atamar, ejoikinit Kiristo eboliare sodi toyaru akolongit na ngauni.

⁴⁷Ejoikinit itatamio ngibukui daang atamar tolunga ngasechesea, sodi torimak Akuj ngasechesea kech a ekiro a Yesu. Kisiakis akitatam kane alo Yerusalem.

⁴⁸Iraakasi esi ngikaanyunak a ngakiro kanu.

⁴⁹ Ameuni ayong nikus ibore ni kichikak Apa esi. Nakaneni ejoikinit esi idarunete kane alore tanang akolongit na ianyuneta esi agogongu na ebunit alokidiama.”

⁵⁰Sodi toriko ngesi kesi nikalapatan a ere toloto tananga Betania. Kikea ngesi ngakan keng kaneni topia kesi.

⁵¹Ani eringa ngesi egatakinit kesi, torotok ngesi anikech kikiarae alongaren kech, yaarae kidiama nadis.

⁵²Kilipa kesi ngesi ani erumor tobongosi Yerusalem elakara noi,

⁵³ dio tolomasi akibooyere alokai a Akuj ebuakinito Akuj alakara.