Read turkana Luka 3 Bible Online

Luka 3 - turkana bible

Luka 3

¹Ekaru lo a ngitomon ka ngikan na araakar Tiberio ekapolon a Ngiroma, tarai Pontio Pilato ekapolon a akwap a Yudea, tarai Erode ekapolon a akwap a Galilaya, nabo Pilip lokaatokeng arai ekapolon a akwap a Iturea ka akwap a Tirakoniti, nabo arai Lisania ekapolon a akwap a Abilene,

²araakasi Anas ka Kayapa Ngimurok Luapolok a akai a Akuj. Ngirwa ngulu ngesi abunio akiroit a Akuj nia Yoana lokookeng a Sekaria, eyei nariet.

³Tolot Yoana tanangeene akwap daang na edunyasi ka Yorudan, itatami ngitunga ngakiro a Akuj ebala, “Tolunga ngasechesea kus kibatisae a ngakipi, kitorimakinea Akuj ngasechesea kus.”

⁴ Araakasi nu na egiritae nakitab a ekadwaran Akuj Isaya: “Etoil a itwaan ani echala anariet ebala: ‘Tosubakisi erot a Ekapolon, kitenikisi erot lo itori ngesi!

⁵Ejoikinit ngadipoe daang ilelebio, ejoikinit ngaukon ka ngimoru topunyipunyarae, ejoikinit ngirotin lu kelugulugok itenikinio kitenaros, nabo ngirotin lu engarab tosubakinae toruruseta.

⁶ Nabo ngitunga daang eanyunete ayuuno a Akuj!’ ”

⁷Apot ngitunga lukaalak pot nia Yoana kibatisae a ngakipi. Kingit Yoana kesi tama, “Esi lu ikote ngarewa, ngae kichikichiki esi atamar ipedorete abuchar aloriras a Akuj alo ebunit?

⁸Tosuba ngitichisio lu idodiunito atamar ilunga esi dir ngasechesea kus. Tojongoto ekiruor atamar iraakasi esi ngide ka a Aburaam. Abala ayong esi a! Epedori Akuj asubakin Aburaam ngide anamoru kanu!

⁹ Edikino aep iteli ngikito anaten, ekitoe daang lo nyekoni ageor naajokon itelunio tachakakinae nakim.”

¹⁰Kingita ngitunga ngesi tamasi, “Kikokini tokona sua aliwae?”

¹¹Tatachak ngesi tama, “Itwaan cha daang ni eya ngiworui ngiarei ejoikinit nak itwaan cha daang ni emam, ani nabo ni eyei akimuj kitomor luche.”

¹² Apot ngiketubukok echur ngiche pot nikeng esakete kibatisae a ngakipi. Kingita ngesi tamasi, “Eketataman, kikokini sua aliwae?”

¹³Tolimok kesi tama, “Nyiilemanasi na idwangito nakolong kilimokinio.”

¹⁴Apot ngasigerea ngache kingita tamasi, “Ani bo sua? Kikokini aliwae?” Tatachak kesi tama, “Nyiidemasi itwaan tani ipei ngaropiyae a areit, kori nyiirirata a ngakiro ana eraakasi alioko, nabo kitemokin ngaropiyae na kitachanakinio esi alotich kus.”

¹⁵Tolomakis ngitunga akitam atamar kori erai Yoana Kiristo lo abeyo emeunio.

¹⁶Sodi tolimok Yoana kesi daang tama, “Kebatisae ayong esi a ngakipi, nakaneni ebuni lo epolot noi kedwangit ayong, nyitemokino ayong tani alachakini ngarukanes a ngamuk keng. Kibatisae ngesi esi a Etau a Akuj ka akim.

¹⁷Etingit ngesi adaet anakan keng esaki adaun ngakanoi, nabo iwaakini lokeru keng, nakaneni kinom ngatunyeny a akim ana nyedunge jik.”

¹⁸Alorotin alukokaalak, abu Yoana kichikichik ngitunga na etatamea kesi Ngakiro Naajokak a Akuj.

¹⁹Nakaneni eruoro Yoana atamar esechit ekapolon Erode ani alemarea aberu a lokaatokeng na enyaritae Erodia, kitarau aberu keng, nabo ayakasi ngakiro nakosoche aronok asubit Erode.

²⁰ Ani bo kanguna kadaang, tosub Erode niaronon noi ani ainikinea Yoana lojela.

²¹Na arumorere akibatisare ngitunga daang a ngakipi, apon Yesu dang kibatisae a ngakipi. Ani na elipitor Yesu, tangaar adis,

²² sodi bu Etau a Akuj min kidiama keng ikoni akuuri. Abu etoil anadis tama, “Irai iyong Lokookang lominat. Alakara ayong kotere iyong.”

²³Arai Yesu ngikaru ngitomwon-uni na esiakinea etich keng. Etamito ngitunga atamar kori erai ngesi lokookeng a Yosep, alo arai lokookeng a Eli, alo arai

²⁴lokookeng a Matati, alo arai lokookeng a Lawi, alo arai lokookeng a Meliki, alo arai lokookeng a Yanai, alo arai lokookeng a Yosep, alo arai

²⁵lokookeng a Matatiya, alo arai lokookeng a Amos, alo arai lokookeng a Naum alo arai lokookeng a Esili, alo arai lokookeng a Nagai,

²⁶alo arai lokookeng a Maat, alo arai lokookeng a Matatiya, alo arai lokookeng a Semei, alo arai lokookeng a Yosek, alo arai lokookeng a Yoda,

²⁷alo arai lokookeng a Yoanani, alo arai lokookeng a Resa, alo arai lokookeng a Serubabel, alo arai lokookeng a Sealitel, alo arai lokookeng a Neri,

²⁸alo arai lokookeng a Meliki, alo arai lokookeng a Adi, alo arai lokookeng a Kosam, alo arai lokookeng a Elimadam, alo arai lokookeng a Eri,

²⁹alo arai lokookeng a Yochua, alo arai lokookeng a Elieser, alo arai lokookeng a Yorim, alo arai lokookeng a Matati, alo arai lokookeng a Lawi,

³⁰alo arai lokookeng a Simeon, alo arai lokookeng a Yuda, alo arai lokookeng a Yosep, alo arai lokookeng a Yonam, alo arai lokookeng a Eliakim,

³¹alo arai lokookeng a Melea, alo arai lokookeng a Mena, alo arai lokookeng a Matata, alo arai lokookeng a Natan, alo arai lokookeng a Daudi,

³²alo arai lokookeng a Yese, alo arai lokookeng a Obed, alo arai lokookeng a Boas, alo arai lokookeng a Salimon,[1] alo arai lokookeng a Nachon,

³³alo arai lokookeng a Aminadab, alo arai lokookeng a Adimin, alo arai lokookeng a Arin, alo arai lokookeng a Esiron, alo arai lokookeng a Peres, alo arai lokookeng a Yuda,

³⁴alo arai lokookeng a Yakobo, alo arai lokookeng a Isaka, alo arai lokookeng a Aburaam, alo arai lokookeng a Tera, alo arai lokookeng a Naor,

³⁵alo arai lokookeng a Serug, alo arai lokookeng a Reu, alo arai lokookeng a Peleg, alo arai lokookeng a Eber, alo arai lokookeng a Chela,

³⁶alo arai lokookeng a Kainan, alo arai lokookeng a Aripakisad, alo arai lokookeng a Chem, alo arai lokookeng a Noa, alo arai lokookeng a Lamek,

³⁷alo arai lokookeng a Metusela, alo arai lokookeng a Enok, alo arai lokookeng a Yared, alo arai lokookeng a Malaleli, alo arai lokookeng a Kainan,

³⁸alo arai lokookeng a Enoch, alo arai lokookeng a Seti, alo arai lokookeng a Adam, alo arai lokookeng a Akuj.