Read turkana Luka 5 Bible Online

Luka 5 - turkana bible

Luka 5

¹Akolongit apei, awei Yesu alokwaas a Anam a Genesaret, sodi pot ngitunga kijukunos nikeng kiriama ngesi esakete akiirar ngakiro a Akuj.

²Kingolik Yesu ngatubwae ngaarei ewaasi alokwaas a anam, amam ngikechiemak a ngikolia anatubwae kanguna, alosito kesi akilotar ngipuutei kech.

³ Toloma Yesu natubwa apei, na arai aka Simon, tolimok ngesi tama, “Kijuka tachadar a lokwaas wadio. Kiboikin Yesu natubwa kitatam ngitunga.”

⁴ Na arumorea Yesu ekiruor, tolimok ngesi Simon tama, “Kijuka atubwa tanang nituluk, sodi tachakakis ngipuutei kus nanam kichiemuneta ngikolia.”

⁵Tatachak Simon tama, “Eketataman, kisub sua etich loationon akwaar kiiya kiwala, nakaneni emam ibore kirum jik. Tokona bocha ani kibala iyong neni, achakakini ayong ngipuutei nanam.”

⁶Apot tachakakis ngipuutei nanam, kirumut ngikolia lukaalak noi lokojokon, tonyout tani ngipuutei kech achila.

⁷Sodi apot tanyarata talopae kech lu ayakasi natubwa nache atamar pot kingarakis kesi. Apot kesi kileleba ngatubwae naarei nguna ngikolia pich, taapik tani ngatubwae akiibakin nakipi.

⁸Ani ingolikini Simon Petero ngakiro na asubasi abu ngesi toriedik alongaren Yesu tolimok tama, “Ekapolon, tachadar iyong anikang, kainyo arai ayong itwaan nikasechan!”

⁹Apot ngakiro a ngikolia alukaalak erumunete kesi tatalasi ngesi ka luche arukitotor.

¹⁰Tatalasi ngakiro nguna tani Yoana ka Yakobo, ka talokookeng a Sebedayo lu arukito ka Simon. Tolimok Yesu Simon tama, “Nyiem iyong, napei tokona jik, irumete esi ngitunga loger lo irumere ngikolia.”

¹¹Kijukasi ngatubwae lokwaas a anam, kimiekis ibore daang kiwapakis Yesu.

¹²Achekolongit ayei Yesu lore eche lo ayei itwaan ni adeaka enomokere. Ani ingolikini ngesi Yesu, tadakakin bon ngaren Yesu kimaima tama, “Ekapolon, ani kisaki iyong akitangalekin ayong ipedori!”

¹³Kitorwaa Yesu akan keng tatap ngesi. Tolimok tama, “Asaki ayong akitangalekin iyong, tojoker!” Atipei tangalek enomokere a itwaan kangini.

¹⁴ Kichikichik Yesu ngesi tama, “Nyiilimok itwaan tani ipei, nakaneni kape lomuron a akai a Akuj kiseme ngesi iyong, sodi tolem akipeyoet loger lokolong alimunitor Musa, toyenea itwaan daang atamar ijoker iyong.”

¹⁵Nakaneni abu akiroit a Yesu tokeikin wadaang, sodi bu asepich a ngitunga nikeng akiirar ngakiro keng, nabo kitangalekinoe ngidekesinei kech.

¹⁶Nakaneni aloseene ngesi nariet ni elipea Akuj.

¹⁷Akolongit apei na etatamea Yesu ngitunga, ebooyete Ngiparisayo ngiche ka ngiketatamak a etal. Aponito kesi alorerea kadaang a ngakwapea a Galilaya ka Yudea ta Yerusalem. Ayei agogongu a Akuj nia Yesu sodi kitangalekinio ngesi lu adeakasi.

¹⁸Sodi apot ngitunga ngiche kilepulepuut itwaan niangwalan eperi alojemu, apot tasaka ayaar ngesi tooma kai, kiteperikis ngesi ngaren Yesu.

¹⁹Nakaneni kotere asepich a ngitunga na alal, apot nyeeriamut nikaaloman ni eyaareta ngesi tooma. Apot todokasi kilepulepoosi kidiama akai, topedo inaa, kiyoliut itwaan ngini iteperikinitoe lojemu keng, kiwaakinae ngesi ngaren Yesu lo ayei kiding ngitunga.

²⁰Na engolikinea Yesu atamar enupito kesi lokojokon, tolimok ekile ngolo tama, “Ekile, arimakin ngasechesea kon.”

²¹Apot ngiketatamak a etal ka Ngiparisayo kingitanaros make ebalasi, “Ngae en imenyi Akuj loger lo en? Emam itwaan epedori arimakin ngasechesea mati Akuj bon!”

²²Kona ayenea Yesu na etamete kesi, tolimok kesi tama, “Nyo itameta esi ngakiro na ikote nguna?

²³Nyoni etieno, alimokin ekangwalan atamar, ‘Arimakin ngasechesea kon’ kori atamar, ‘Tonyou torotok?’

²⁴Asaki ayong esi toyena atamar eyei Lokookeng a Itwaan agogongu anakwap na erimakinea ngasechesea.” Tolimok ekangwalan ngolo tama, “Kalimokinit iyong atamar, ‘Tonyou tolema ejemu kon, tolot nawi!’ ”

²⁵Tonyou itwaan ngini atipei alongaren kesi daang tolema ejemu keng losek aperio, tolot nawi, ipuruunit Akuj.

²⁶Tatalasi ngitunga daang ngakiro nguna tobul noi! Kipuruut Akuj ebaasi, “Ekoe! Kingolik akolongit na ngakiro naapolok!”

²⁷Ani erumor nguna, torotok Yesu sodi taanyunga eketubukon echur lo anyaritae ekiro keng Lawi, ibooyi alokai ana ediaununea ngesi ngaropiyae a echur. Tolimok Yesu ngesi tama, “Kiwapakinae ayong.”

²⁸Tonyou Lawi, toisik ibore daang, kiwapak ngesi.

²⁹Sodi tosubak Lawi akimuj alokai keng kisimuj Yesu, ayakasi neni ngiketubukok echur lukaalak ta ngitunga luche ebooyete ka ngesi imujete.

³⁰ Apot Ngiparisayo ngiche ka Ngiketatamak a etal lu arukito ka kesi kingunungunokis kingita ngirukitos a Yesu tamasi, “Nyo imujeta esi ka ngiketubukok echur ka ngikasechak?”

³¹Tatachak Yesu kesi tama, “Ngitunga lu nyedeakasi nyesakete eketedekan, lu edeakasi kesi esakete.

³²Nyebuno ayong anyarare luajokak, abuni anyarare ngikasechak, sodi tolunga ngasechesea kech.”

³³Tolimokis ngitunga ngiche Yesu tamasi, “Ngirwa ngiche, aroneenete ngirukitos a Yoana akimuj nabo ilipeenete dang, tani ngirukitos a Ngiparisayo esubete loger ngolo, abe imujete bo ngirukitos kon nabo tamaase!”

³⁴Tatachak Yesu kesi tama, “Itamito esi atamar nyimujete ngitunga lu enyaraunitae nakuuta akimuj eroko erukito kesi ka ekeutan a? Mam, nyikote nguna neni!

³⁵Nakaneni enangi akolongit na erikorere ekeutan anikech sodi toroneeneto ngirwa ngulu.”

³⁶Tolimok Yesu kesi nabo ngakitadapet nu: “Emam itwaan echiluni eworu lokitetet tadapak loworu longorot. Ani kesub itwaan kongina, echilichilar eworu lokitetet, nabo awaru na achilun, nyikwaanikin ka nangorot.

³⁷Kori emam tani itwaan ipei ni epedori akiturakin emuna lo aringa epurio, kiturak lotuo longorot. Ani kiturak, ebwangabwangari emuna etuo ngolo, sodi tobukor emuna, nakaneni kinyasun etuo.

³⁸Nakaneni iturakinio emuna lo aringa epurio lotuo lokitetet!

³⁹Kori emam tani itwaan esaki emuna lo aringa epurio, kengoba longorot. Elimuni tama, ‘Longorot ngesi ejok.’ ”