Read turkana Luka 7 Bible Online

Luka 7 - turkana bible

Luka 7

¹Na arumorea Yesu akisuruor ngitunga ngakiro nguna daang, abu toten Kaperinaum.

²Ayei ekarikon a ngasigerea a Ngiroma lo adeaka ekasuban etich lo amina ngesi noi. Adikino ekasuban etich ngolo tani etoani.

³Ani iirari ekapolon ngolo ngakiro a Yesu, tomea ngikasukou a Ngiyaudi nia Yesu kepedori abunere kitangalek ekasuban etich keng.

⁴Na ananguneta nia Yesu, apot kimaimaa noi tolimokis tamasi, “Ejoikinit itwaan en dir ingarakini iyong,

⁵kainyo emina ngesi ngitunga a ebukut yok nabo kidukok ngesi sua akai a Atuk.”

⁶Sodi kirukosi Yesu ka kesi aapei. Na anangeta diye awi a ekapolon a arieng kangolo, tomeu ngesi talopae keng pot alimokin Yesu akiroit ebalasi, “Ekapolon, tojongo akituburuna. Nyitemokino iyong ibuni tolom kai kang,

⁷nyitemokino tani ayong abuni nikon. Tolim tokona iyong akiroit sodi tojoker ekasuban etich kang.

⁸Ayong dang arai lo atupit ngikapolok luche, nabo eya ngasigerea na aweikinit ayong. Na alimokinea logo atamar, ‘Kape!’ tolot. Kori na alimokinea ngol atamar, ‘Bua!’ bu. Nabo na alimokinea ekedalan kang atamar, ‘Tosubak kona!’ sodi tosubak loger ngolo.”

⁹Tatalasi Yesu ngakiro nguna daang na eirarea, sodi torei kingolik asepich a ngitunga na ewapit ngesi, tolimok tama, “Nyeanyuna ayong nakanuan tani alo Isirael itwaan ni enupit noi loger logo!”

¹⁰Na abongoreta ngitunga lu ameunitae nawi a ekapolon, apot toriamut ekedalan ngolo kejoker.

¹¹Ani ekisidi, abu Yesu tolot lore eche anyaritae Nain, arukito ngesi ka ngirukitos keng ta asepich a ngitunga na ewapit kesi.

¹²Na anangunea lorot lolomunet lore, ayakasi neni ngitunga lu elepilepito itwaan nikatoan esakete apudorea nikalapatan. Arai ngesi lokookeng a apuserut lo edounitoe erai epei bon. Arukito ngesi ka asepich a ngitunga a ere kangolo.

¹³Na engolikinea Ekapolon apuserut ngina, abu kisieni ngesi, tolimok tama, “Tojongo akigoro.”

¹⁴Tolot Yesu taapia nibore ni elepilepitoe tatap, sodi towaa ngitunga lu adakito. Tolim Yesu tama, “Edia, kalimokinit iyong atamar tonyou!”

¹⁵Abu edia lokatoan ngolo tonyou kiboikin tolomak akiruoro, sodi kipoto Yesu ngesi nak itiokeng.

¹⁶Tobul kesi daang, kipuruut Akuj ebalasi, “Abu ekadwaran a Akuj loapolon atakanuu anikosi!” Tolimut nabo tamasi, “Abu Akuj ayuun ngitunga keng!”

¹⁷Tokeikin ngakiro na a Yesu nugu nakwap a Yudea ka ngiwaitin keng daang.

¹⁸Na alimokineta ngirukitos a Yoana ngesi ngakiro nguna daang, sodi tanyarau Yoana ngiarei kech

¹⁹tomea kesi nia Ekapolon Yesu akingit ngesi ebalasi, “Iyong ngesi kolong abala Yoana ibuni, kori ejoikinit sua kidari itwaan iche?”

²⁰Na ananguneta kesi nia Yesu, tolimokis tamasi, “Kimeunit sua Yoana Ekebatisan akingit iyong atamar irai iyong ngolo abala ngesi ebuni, kori kidari sua itwaan iche?”

²¹Ani esaa lopei ngolo, kitangalek Yesu ngitunga lukaalak ngilekesio ka ngidekesinei, tani lu ebapito ngipean luaronok, nabo tangaa ngakonyen a ngimuduk kingolikis akwap.

²²Tatachak Yesu ngimeanara a Yoana tama, “Tobongosi kisisakisi Yoana ngakitoodikinet na ingolikis ka ngakiro na iirasi. Ngimuduk engolikis akwap, ngikangwalak eloose, lu edeakasi enomokere etangalekin ajoketa, epupete ngikinim, eteyarun ngikatoak, nabo itatamio ngikebootok Ngakiro Naajokak.

²³ Epiarit Akuj noi itwaan ni nyeketongoyae ayong!”

²⁴Na arotokinioto ngimeanara a Yoana, tolomak Yesu akisuruor asepich a ngitunga ngakiro a Yoana. Tolimok tama: “Nailooso esi nia Yoana na ayakar nariet, isakete esi akingolikin nyo? Akuyen na eloiloi ekuwam a?

²⁵Nyo ilosito esi akingolikin? Itwaan ni anapit ngiworui lukaanikak lu esiritoe a? Toyena atamar lu enapito loger ngolo nabo lu ibooyete ejakaanito ngirwa daang ibooyete anakais a ngikapolok!

²⁶Tolimokinae kare, nyo kolong isakete esi akingolikin? Ekadwaran a Akuj a? Ee, nakaneni kalimokinit atamar ingolikis esi lo idwangit tani ekadwaran a Akuj.

²⁷Kainyo Yoana ngesi lo elimunit Akuj anagiran ebala: ‘Ngesi erai emeanara kang, ameari ngesi kingarenik iyong tolot tosubak erot kon.’ ”

²⁸ Kalimokinit esi atamar, “Alotunga kadaang alu edoun nakanuan, emam lo epolot idwangit Yoana. Tani ikoni neni, ngini edit noi Anapolou a Akuj, epolot idwangit Yoana.”

²⁹Ani iirarete ngitunga daang ka ngiketubukok echur ngakiro nguna, kipuruut Akuj kainyo anupito kesi ngitalio lu a iteni a Akuj, sodi kibatisa Yoana kesi a ngakipi.

³⁰ Nakaneni tongero Ngiparisayo ka ngiketatamak a etal ngitalio a Akuj, towout tani esaki Yoana akibatisare kesi a ngakipi.

³¹Torubak Yesu iruoro ebala, “Tokona, nyo esikwaanea ayong ngitunga a ngirwa kalu? Ikote kesi nyo?

³²Ikote kesi ngide lu ibooyete anigielet ngiboro. Enyaraate epewae kech luche tamasi: ‘Kipot sua atokutakisi aburuch, nakaneni nyimomwarikina esi! Kipot atosutuonokisi, nakaneni nyikalouno esi!’

³³Abuni Yoana Ekebatisan eroneene nyeemasi emuna lo epuritoe, tamasi esi, ‘Ekoporito ngesi ngikerep!’

³⁴Abuni Lokookeng a Itwaan imuji nabo tamasi dio tamasi esi, ‘Kingolikisi itwaan en a! Edakana ngesi nabo ematana emuna lo epuritoe, erai nabo ngesi epae a ngiketubukok echur ta ngikasechak!’

³⁵Nakaneni aosou a Akuj idodiunitae atamar erai aka iteni ani eya ngulu daang aanyut aosou ngina.”

³⁶Kitepeyon itwaan ipei ni arai Eparisayot Yesu anawi keng kisimuj. Sodi tolot Yesu nawi keng kiboikin kimuj.

³⁷Alore kangolo, ayei aberu apei na arai akasechan lokojokon. Na eirarea atamar imujete Yesu aapei ka Eparisayot anawi keng, abu ngesi yau echupa lokooyen enyaritae alabasita, ileleba akimiet nakaakunyon.

³⁸Bu towo alodiyete ngakejen a Yesu igoro, nabo kidokanakinos ngakiyo keng nakejen a Yesu. Sodi kisuta ngakejen a ngitim keng tonuak sodi kiwasak akimiet.

³⁹ Na engolikinea Eparisayot lo etepeyonit Yesu nguna, abu kitam bon tama, “Arai tarai ekile lo dir ekadwaran a Akuj, keyenit atamar aniberu na etapit ngesi naga, keyeni atamar erai ngesi akasechan!”

⁴⁰Tolimok Yesu ngesi tama, “Eyakasi ayong ngakiro na asaki alimokin iyong.” Kiik Simon tama, “Awaa, Eketataman, tolimokinae robo.”

⁴¹Tolim Yesu tama, “Ayei itwaan ni ayakasi ngitunga ngiarei lu aarito amicha keng. Emichat ngesi epei ngadinari[2] ngamiae ngakan, emichat loche ngadinari ngatomwon-kan.

⁴²Amam tani ipei ni apedori atachakin ngesi amicha keng, sodi torimak ngesi kesi daang kwasiarei ngamichae keng. Aluarei kangulu, ngae emina ngesi noi?”

⁴³Tatachak Simon tama, “Etamit ayong atamar lo arimakinio amicha nakaalan.” Tolimok Yesu ngesi tama, “Ilim iyong iyook.”

⁴⁴Sodi torei ngesi nia aberu tolimok Simon tama, “Ingolik iyong aberu naga? Abuni ayong nawi kon, nakaneni nyeinakina iyong ayong ngakipi elotarea ngakejen kang, nakaneni elota ngesi ngakejen kang a ngakiyo keng, nabo kisuta a ngitim keng.

⁴⁵Nyimala iyong ayong kitonuak, nakaneni idodiunit ngesi arimatoi keng anikang ani enuanakinea ngesi ngakejen kang jiik natakae abunio ayong.

⁴⁶Nyiwasakina iyong akimiet nakou kang, nakaneni ewasak ngesi ngakejen kang akimiet nakaakunyon.

⁴⁷Kotere nguna kalimokinit iyong atamar, idodiunit ibore ni idodiunitor ngesi amina lokojokon noi kongina atamar arimakin ngasechesea keng nakaalak. Itwaan cha daang ni arimakin wadio, idodiuni amina nadiochichi.”

⁴⁸Sodi tolimok Yesu aberu ngina tama, “Arimakin ngasechesea kon.”

⁴⁹Tolomakis ngitunga lu erikato emeesa alimonokin make tamasi, “Ekoe, ngae itwaan ni epedori tani arimakin ngasechesea en?”

⁵⁰Nakaneni tolimok Yesu aberu tama, “Kiteyar iyong anupit kon, kape nikaalimon.”