Read turkana Luka 8 Bible Online

Luka 8 - turkana bible

Luka 8

¹Adaunet a ngirwa a ngiche, kitor Yesu nadakarin ka ngirerea, itatami ngitunga Ngakiro Naajokak a Apolou a Akuj. Arukito ka ngirukitos keng lutomon ka ngiarei.

²Arukito kesi ka ngaberu ngache dang nasek etwarakinio ngipean kitangalekinoe ngidekesinei: araakasi kesi Mariam na arai ekiro keng Magadalene na etwarakinio ngipean lukan-kaarei anikeng,

³ nabo Joana, aberu a Chusa, lo arai ekasuban etich ani etubeeneo Erode ekies ka Susan ta ngaberu nache nakaalak na engarakinito Yesu ka ngirukitos keng a ngiboro kech.

⁴Pot ngitunga nia Yesu alowaitin kadaang a ngirerea, ani echunun asepich a ngitunga nikeng, tolimok Yesu kesi ngakitadapet nugu tama:

⁵“Ayei kolong itwaan ni alosi akitare ngikinyam keng. Naelakinea ngesi ngikinyam mana, kialakin ngiche lorot, apon kipudae, sodi pot ngikieny kidepasi.

⁶Apot nabo ngiche kialakin nalup na ewarawarakina kidiama natabab, ani na arupuneta ngimomwa, apot tooko kainyo peasisik ngalup.

⁷Apot ngikinyam ngiche kialakin tooma ngiikwa, sodi toruput ngiikwa ka kesi aapei torida ngimomwa.

⁸Nabo apot ngiche kialakin nalup naajokak toruput topolout, tokoniu emwae epei amiat apei.” Tolimok Yesu kesi tama, “Ani keya ngaki nakiiraret, kiira robo!”

⁹Ani ingisete ngirukitos a Yesu ngesi eger a ngakitadapet kanguna,

¹⁰ tatachak Yesu kesi tama, “Kidodikin esi aosou na a ngakiro anamunonoe a Apolou a Akuj, nakaneni iirarete ngitunga luche a ngakitadapet. Sodi kiteeto nakaneni nyeyenete, topupokis nakaneni nyechoiyarete.”

¹¹Tolimok Yesu kesi tama, “Eger a ngakitadapet ngesi logo: ngikinyam kesi akiroit a Akuj.

¹²Ngikinyam lu ealakinosi lorot ikwaan ka ngitunga lu iirarete, nakaneni bu Ekipe tolema akiroit alotai kech, sodi nyenupa toyuunere.

¹³Ngikinyam lu ealakinosi natabab ikwaan ka ngitunga lu iirarete akiroit talakaros, nakaneni nyenupete kesi akiroit ngina lokojokon, enupete cha wadio ani enangi ngirwa lu iningere, sodi tapalikis.

¹⁴Ngikinyam lu ealakinosi lookwa ikwaan ka ngitunga lu iirarete akiroit, nakaneni ngichan a eboyor a akwap ka aminakinit ebari, nyisirichakinete kesi akiroit ngina, nakaneni tongopa ngakiro naajokak anakiroit kangina.

¹⁵Ngikinyam lu ealakinosi nalup naajokak ikwaan ka lu iirarete akiroit kirichakis tonupa jik a ngitai aluajokak, tanaikis jik kileereut ngakiro naajokak aloboyor kech, loger lo ekonio ekitoe ageor.

¹⁶ “Emam itwaan inokakini ataa sodi tobuburik atubwa kori kiwaak kwap ekitanda. Iwaakini ni ikeuna, sodi kiteeto ngitunga na elomareta tooma kai.

¹⁷“Kainyo emam ibore ni idaitae ni nyetakanuni, kori ibore daang ni erapap ni nyileereuni sodi kimau akicha.

¹⁸ “Tochoikinos robo eger lo ipupete, kainyo itwaan cha daang ni eyei ibore, einakinio ni elal, ani itwaan cha daang ni emam ibore eyei, edemario tani nidiochichi itamit ngesi atamar atingit.”

¹⁹Pot itiokeng ka ngikaitotoi a Yesu nikeng, nakaneni todidinger neni tongopik kesi kona eapiarete nikeng kotere asepich a ngitunga.

²⁰Tolimok itwaan iche Yesu tama, “Ewaasi itiokon ka talokaatokon anikalapatan esakete akisuruor iyong.”

²¹Tolimok Yesu kesi daang tama, “Itiokang ka ngikaitotoi kang kesi ngulu eirasi ngakiro a Akuj kiwapa.”

²²Alomarete Yesu ka ngirukitos keng aapei natubwa akolongit apei, tolimok kesi tama, “Kapana ewaaros atodokasi ekwakaye anam.” Sodi kisiakis akijukakin atubwa nanam.

²³Ani eringa kesi eya nanam, kinapakin Yesu tojotoor. Tokut ekuwam lokaalan ananam, nakaneni kilelebun ngakipi natubwa. Taanyut kesi ngichan lokojokon.

²⁴Toloto ngirukitos a Yesu nikeng kitokienyut ngesi tamasi, “Ekapolon! Ekapolon! Dikino sua kimunyar.” Tonyou Yesu kikilak ekuwam lo akutunit ka ngitoroi lu akuunito. Toper ekuwam tachakin wadaang chek.

²⁵Tolimok Yesu ngirukitos keng tama, “Nyaani anupit kus tokona?” Nakaneni tatalasi kesi ngakiro nguna nabo toema sodi tolimonokin make tamasi, “Ani itwaan ikoni ne en? Ikilanakini ekuwam ka ngitoroi sodi topupokis ngesi!”

²⁶Tananga Yesu ka ngirukitos keng ekwakaye anam a Galilaya nakwap a Ngigerasi.

²⁷Na atiyaunor Yesu anatubwa, kiriamun ka itwaan ni akoporito ngikerep ni abunit alore. Peanapit ngesi ngiworui ngirwa lukaalak nabo eboyeene ngesi analielin angerit awi.

²⁸Ani ingolikini ngesi Yesu, kirema lokojokon noi tadakakin nakejen a Yesu, kirema tama, “Eya iyong ngakiro ka ayong Yesu Lokookeng a Akuj a Naapolon noi a? Kemaimai iyong atamar nyikiboliar kare cha ayong!”

²⁹Alimuni kongina kainyo adungokini Yesu ngipean atamar topudut anikeng. Akoponorete ngesi ngikerep ngirwa ngikaalak, tani keen ngesi a ngiriko ngakejen ka ngakan, angedengedaanari ngesi ngiriko ngulu, kipiiri nariet kotere agogongu a ngikerep kangulu.

³⁰Kingit Yesu ngesi tama, “Ngae ekiro kon?” Tatachak itwaan ngini tama, “Ekiro kang ngesi legion”,[3] kainyo alomarito ngipean lukaalak nikeng.

³¹Kimaimaa ngipean Yesu tolimokis atamar nyechakak kesi nadui nakooyen.

³²Nakaneni nipei neni, ayei atwom nakaalan a ngiputiro adaka akook a emoru. Apot ngipean kimaimaa Yesu tamasi, “Kimiekinae atolomasi loputiro.” Abu ngesi tacham.

³³Sodi topudut ngipean anitwaan kangini, tolomasi loputiro, abu atwom daang kipiiri tachakun anakope toloma tooma nanam, tanyam daang anam.

³⁴Kingolikis ngikeyokok a ngiputiro ngakiro na asubasi sodi kipiirioto kisisata ngakiro nguna alore ka ngadakarin.

³⁵Toloto ngitunga aanyun ngakiro na asubakinosi. Pot nia Yesu toriamut itwaan ni etwarakinio ngipean ibooyi anakejen a Yesu, enapit ngiworui nabo tojokak ngitamen keng. Apot kesi daang toema.

³⁶Apot ngikaanyunak tolimokis ngitunga eger lo etojokere itwaan ni akoporito ngikerep.

³⁷Sodi apot ngitunga a akwap a Ngigerasi tolimokis Yesu atamar torotok tolot wache, kainyo apot kesi tobul noi. Todoka Yesu natubwa tobongo.

³⁸Sodi kimaima itwaan ni etwarakinio ngipean Yesu tama, “Kimiekinae ayong erukosi ka iyong!” Nakaneni towou Yesu tolimok ngesi tama,

³⁹“Tobong iyong nawi kon kisisak ngitunga nguna kisubea iyong Akuj.” Tobongo ngesi kitor kiding ere elimonokini ngitunga daang nguna asubea Yesu ngesi.

⁴⁰Na abongorea Yesu lokwaas loche a anam, abu asepich a ngitunga kisiriam ngesi, kainyo edarito ngesi atamar bu.

⁴¹Sodi todolu ekile lo enyaritae Yairo, arai ngesi ekapolon a akai a Atuk. Tadakakin ngesi nakejen a Yesu, kimaima Yesu noi ebala, “Bua apana nawi kang.

⁴²Kainyo nakookang na erai apei bon edeak ekot akitu.” Arai ngikaru keng ngitomon ka ngiarei. Ani eringa Yesu elosi, ejukanarete ngitunga ngesi alowaitin kadaang.

⁴³Ayei neni aberu na echana noi ani aropiyoto ngaakot ngikaru ngitomon ka ngiarei. Kisunya ngesi ngiboro keng daang alomurok, nakaneni amam tani itwaan ipei ni apedori akitangalekin edeke keng.

⁴⁴Bu ngesi erukito ka asepich a ngitunga toropun alokaku a Yesu, sodi tatap ngesi echilet a eworu a Yesu, atipei totubos ngaakot.

⁴⁵Kingis Yesu tama, “Ngae katapi ayong?” Topega ngitunga daang, sodi tolimok Petero tama, “Eketataman, kiriamito iyong ngitunga lu daang nabo kijukanarete.”

⁴⁶Nakaneni abu Yesu tolim tama, “Katapit ayong itwaan, ayeni ayong dir kainyo apudo agogongu na akitangalekinet anikang.”

⁴⁷Toyen aberu ngina atamar nyapedori ngesi akimunon ngakiro nguna, sodi bu emarani, tadakakin kwap ngaren Yesu. Dio kisisak ngitunga daang ibore ni atapea ngesi Yesu, ka eger lo angalekinio ngesi atipei.

⁴⁸Tolimok Yesu ngesi tama, “Nakoku, kiteyar iyong anupit kon. Kape nikaalimon.”

⁴⁹Ani eringa Yesu iruoro nguna, bu emeanara anawi a Yairo. Tolimok ngesi Yairo tama, “Atoana nakookon, nyiichan Eketataman nabo.”

⁵⁰Nakaneni kiira Yesu ngakiro nguna tolimok Yairo tama, “Nyiem, tonup iyong, ejoker ngesi.”

⁵¹Na anangea ngesi kai, nyechamuna ngesi ngitunga elomarete ka ngesi tooma, mati Petero ka Yoana ta Yakobo, ta apa ka itiokeng a ikoku.

⁵²Nakaneni egorosi daang, tosutonokinete. Tolimok Yesu kesi tama, “Tojongoto akigoro, nyetoana ngesi, ejotoe!”

⁵³Tokianatar kesi daang ngesi kainyo ayenete atamar atoana.

⁵⁴Toting Yesu akan a ikoku, tolimok tama, “Tonyou ikakoku!”

⁵⁵Sodi toyaru, tonyou atipei, tolimok Yesu ngikauriak keng atamar nakis akimuj adio nanyamat.

⁵⁶Tatalasi ngikauriak a ikoku ngakiro nguna noi, nakaneni kichikichik Yesu kesi tama, “Nyiilimokis itwaan tani ipei ngakiro na asubakinosi.”