Read turkana Luka 9 Bible Online

Luka 9 - turkana bible

Luka 9

¹Tanyara Yesu ngirukitos keng lutomon ka ngiarei tochunak wapei, sodi kitogogong kesi topedoreta apolokin ngipean daang kitwarakineta, nabo kitangalekinioto ngidekesinei.

²Sodi tomea kesi akitatam ngitunga ngakiro na a Apolou a Akuj, nabo kitangalekis lu adeakasi.

³Tolimok Yesu kesi tama, “Nyiitinga idiobore analosit kus, kerai aburo kori echue kori akimuj kori ngaropiyae kori nyiikoda eworu eche.

⁴Ani akai na ilomarete kitepeyon, kiboikinos nawi ngina tanang akolongit na inyounioto alore kangolo,

⁵ ni cha nyikitepeyoneta esi ngitunga, torotokisi alore kangolo tokurosi ngalup a ngakejen akamaluwot kidodiu ibore ngini atamar esechito kesi.”

⁶Torotokis ngirukitos a Yesu kitoro nadakarin daang itatamete Ngakiro Naajokak a Yesu Kiristo nabo kitangalenokinete ngitunga awadaang.

⁷Na eirarea Erode lo arai ekapolon a Galilaya ngakiro daang na asubakin, kibiler ngesi noi kainyo abaasi ngitunga ngiche, “Yoana Ekebatisan ngesi ayaru!”

⁸Tolimut ngiche tamasi, “Elija ngesi ngolo atakanuu,” nabo abaasi ngiche, “Epei a ngikadwarak alu kolong ngorok ngesi ayaru.”

⁹ Tolim Erode tama, “Abe etutubori bo kolong ayong ngitunga akou a Yoana. Ngae tokona itwaan ni eira ayong ngakiro keng en?” Nakaneni tasak ngesi aanyun Yesu.

¹⁰Apot ngimeanara ngulu tobongut tolimokis Yesu ngakiro daang na asubete kesi. Sodi toriko ngesi kesi toloto make lore lo anyaritae Betisaida.

¹¹Na eirarea asepich a ngitunga ngakiro nguna, kiwapak Yesu. Sodi kitepeyon Yesu kesi, tolimok ngakiro na a Apolou a Akuj, nabo kitojok lu adeakasi.

¹²Na esiakinea akolong adooyor, pot ngirukitos a Yesu lutomon ka ngiarei nikeng tamasi, “Kimiek ngitunga toloto nadakarin ka ngamanat na aapiyete, sodi tasakasi akimuj ka niperot, kainyo esil akwap na.”

¹³Nakaneni tatachak Yesu kesi tama, “Nakisi esi kesi idiobore ninyamat.” Tatachut kesi tamasi, “Emam ibore eyei sua pearai ngamugati ngakan ka ngikolia ngiarei make. Isaki iyong sua atoloto atogiela akimuj na itemokino asepich a ngitunga na daang a?” (

¹⁴Ayakasi neni ngikiliok ngabunge ngakan.) Tolimok Yesu ngirukitos keng tama, “Totiakatiakata ngitunga kisiboikis a ngalooso ana erai apei ngitunga ngitomwon-kan.”

¹⁵Na esiboikineto ngirukitos keng ngitunga daang,

¹⁶sodi tolem Yesu ngamugati nakan nguna ka ngikolia luarei, tokienyia kidiama nadis, tobuak Akuj alakara, tonyilinyili ngamugati nak ngirukitos keng, sodi tokorakis ngirukitos keng ngitunga.

¹⁷Kimuj itwaan daang kimwon, sodi tolemut ngirukitos keng ngategerin ngatomon ka ngaarei na eleleba akimuj na apiyanun.

¹⁸Akolongit apei na elipitor Yesu alopei, pot ngirukitos keng nikeng. Abu kingit kesi tama, “Ebaasi mono ngitunga ayong ngesi ngae?”

¹⁹ Sodi tatachakis tamasi, “Ebaasi ngiche irai Yoana Ekebatisan, tabaasi ngiche irai iyong Elija, tabaasi ngiche epei a ngikadwarak a Akuj alu kolong ngorok ngesi ayaru!”

²⁰Sodi kingit kesi tama, “Ani bo esi, ibaasi esi ayong ngesi ngae?” Tatachak Petero tama, “Iyong irai Kiristo a Akuj!”

²¹Nakaneni kichikichik Yesu kesi tolimok tama, “Kuriasi nyiilimokis itwaan tani ipei akiroit ngina.”

²² Tolimok tama, “Eboliare Lokookeng a Itwaan lokojokon noi. Engerete ngesi ngikasukou a Atuk ka Ngimurok Luapolok a akai Akuj ta ngiketatamak a etal. Eario ngesi ani akolongit na ngauni, eyaruni.”

²³Tolimok kesi daang tama, “Itwaan cha daang ni esaki akiwapakin ayong, ejoikinit ejalun bon, sodi kiwok apir keng ngirwa daang kewapak ayong.

²⁴Kainyo itwaan daang ni esaki akirichun akiyar keng, ebukori, nakaneni ni ejali akiyar keng kotere ayong, eyari.

²⁵Nyoni eanyuni itwaan erai kitiliwo ngesi ibore daang anakwap ikeng nakaneni tobukor anakiyar? Emam jik ebachit eriamuni!

²⁶Itwaan ni itimi alimor ayong ka ngakiro kang, tani Lokookeng a Itwaan dang itimi alimor ngesi na ebunio Lokookeng a Itwaan Anapolou keng ka Apolou ka Apakeng ta ngimalaikae lubekon aapei.

²⁷Kalimokinit esi ngakiro na iteni atamar, eya ngiche nege lu nyetoakete jik eringa nyeanyungara Apolou a Akuj.”

²⁸Adaunet a ngirwa a ngikan-kauni, ekisidi a alimuni ngakiro nguna, toriko Yesu Petero ka Yoana ta Yakobo todokasi kidiama emoru kilipa.

²⁹Ani eringa Yesu ilipit, kibelei ereet keng, apot ngiworui keng tokwangeta kea.

³⁰Nipei bore ngini, ayakasi neni ngikiliok ngiarei lu eruorosi ka ngesi, arai kesi Musa ka Elija.

³¹Kesi ngulu atakanuunete anapolou a adis, sodi kiruoro kesi ka Yesu ngakiro a akitu keng loger lo irikakinea etich a Akuj kotere atoanere alo Yerusalem.

³²Aperete Petero ka ngirukitos luche ajotoote ngaju nakatoak, nakaneni apot tokienyut kingolikis apolou a Yesu ka ngikiliok luarei ngulu ewaasi ka ngesi aapei.

³³ Na arotokinioto ngitunga ngulu toisikis Yesu, tolimok Petero ngesi tama, “Eketataman, ejok kona kiyakar ngoni nege! Kimiek sua atodukokisi ngakais ngauni, apei akon, nabo apei aka Musa, nache aka Elija.” (Peayeni ngesi dir nguna eruoro.)

³⁴Ani eringa ngesi iruoro, totiyaun edou tarap kesi a etorube keng. Tobul ngirukitos keng na arapea kesi edou.

³⁵ Sodi kiirasi kesi etoil alodou kangolo ebala, “Lokookang lominat ngesi lo, ngesi lo aseuni ayong, topupokisi ngesi!”

³⁶Ani ililingi etoil, kidong Yesu erai epei bon. Apot ngirukitos a Yesu kililinga chek a ngakiro kanguna kadaang. Emam itwaan alimokis ngakiro na engolikinete kesi, tani wadiochichi.

³⁷Na anangea akolongit na a ngaarei, totiyaunos Yesu ka ngirukitos keng luuni alomoru, sodi kiriamun Yesu ka asepich a ngitunga.

³⁸Abu itwaan ipei tachalak anasepich a ngitunga tama, “Eketataman, kingolik a, kemaimai iyong atamar bu cha taanyu lokookang, lo erai epei bon!

³⁹Na ebapea Ekipe ngesi, kitamaranik, kibusok nalup igoro, nabo tokuut ngikurudoi dang anakituk keng, kirakanar ngesi torieb lokojokon, nakaneni nyeisikini atipei!

⁴⁰Emaimai ayong ngirukitos kon atamar kitwarakis Ekipe anikeng, nakaneni tokuruwosi kesi.”

⁴¹Tatachak Yesu tama, “Iraakasi esi ngitunga lu iwoliorito Anakuj nabo nyinupito ngakiro a Akuj! Ejoikinit ayong kiruki ka esi tanang ori? Anaikini ayong ngakiro kus tanang ori?” Ani erumor tolimok itwaan ngini tama, “Toriku lokookon nege.”

⁴²Ani eringa edia ebunit, tadakakin nalup kirakar. Abu Yesu kikilak Ekipe loaronon ngolo kitojok edia, dio kipoto nak apakeng.

⁴³Tatala ngitunga daang agogongu na a Akuj ngina. Ani eringa ngitunga etalarito ngakiro daang na asubi Yesu, tolimok ngesi ngirukitos keng tama,

⁴⁴“Kiirasi ngakiro nakalimokinit ayong esi nu lokojokon! Ipotorio Lokookeng a Itwaan torikokinae ngitunga taara.”

⁴⁵Nakaneni peayenete ngirukitos keng atamar anukiro eruoro ngesi. Emunonitae kesi ngakiro nguna sodi nyeyenuneta, toema kesi akingit ngesi ngakiro nguna.

⁴⁶Topegakinos ngirukitos a Yesu make esakete akiyen itwaan ni epolot noi anikech.

⁴⁷Na ayenea Yesu nguna etamete kesi, abu toriku ikoku niichi, sodi kitowo alodiye keng,

⁴⁸ tolimok tama, “Itwaan cha daang ni itepeyoni ikoku niichi ni ikoni en a ekiro kang, ketepeyon ayong, ani ngini ketepeyoni ayong, etepeyon tani lokolong kameuni ayong. Kainyo ngolo itiditeuna anikus, ngesi epolot noi.”

⁴⁹Tolimok Yoana ngesi tama, “Ekapolon, kingolikini sua itwaan itwaranakini ngipean a agogongu a ekiro kon, etengero sua kainyo meere ngesi iyok.”

⁵⁰Tolimok Yesu Yoana ka ngirukitos luche tama, “Nyiitengero kainyo itwaan cha daang ni nyikitepegi esi erai ikus.”

⁵¹Na apikinea ngirwa lu adikino Yesu ebongio kidiama nadis, abu ngesi totiaku atamar alosi Yerusalem.

⁵²Tomea Yesu ngitunga ngiche kingarenikis toloto kesi tolomasi nadakar ache alo Samaria, asubakin ibore daang toriyan kotere Yesu.

⁵³Towout ngitunga kaneni akitepeyon Yesu alotoru ngina alosiet Yerusalem.

⁵⁴ Na engolikineta ngirukitos a Yesu lu araakasi Yakobo ka Yoana ngakiro nu, tamasi, “Ekapolon, isaki iyong atotiyautu akim anadis tomunya ngitunga lua?”

⁵⁵Torei Yesu kikilak kesi.

⁵⁶Toloto kesi lore eche lo ayei ngaren.

⁵⁷Ani eringa kesi eya lorot, tolimok ekile eche Yesu tama, “Kewapi ayong iyong awadaang ani iteni.”

⁵⁸Tolimok Yesu ngesi tama, “Eya takwee ngatabab na eduketa, tani ngikieny lu eporito eya ngakais, nakaneni Lokookeng a Itwaan bon ngesi emam ni icholongi kiangarea.”

⁵⁹Tolimok Yesu ekile eche tama, “Kiwapakinae ayong.” Sodi tolim ngolo tama, “Ekapolon, kimiekinae mono atolot atonuk apakang.”

⁶⁰Tatachak Yesu ngesi tama, “Kimiek ngulu ikote ngikatoak tonuka ngikatoak kech. Kape iyong sodi kitatam ngakiro a Apolou a Akuj.”

⁶¹ Tolim ekile eche tama, “Kewapakini ayong iyong Ekapolon, nakaneni kimiekinae mono amin atama ngitunga kang kidongo robo.”

⁶²Tolimok Yesu ngesi tama, “Itwaan daang ni isiakini akirem ngalup akitare, torubak ingolianari kaku, nyitemokino eanyuni Apolou a Akuj.”