Read turkana Akitamunet a Etal 1 Bible Online

Akitamunet a Etal 1 - turkana bible

Akitamunet a Etal 1

¹Eraakasi ngakiro na eyakasi nakitab naga na esuruori Musa Ngisirael na ayakatar nariet, kide angolol a Yorudan. Ayakasi kesi nadipo a Yorudan diyete Sup, ni ibakitor ere a Paran alowae a epei, kibakito ngirerea a Topel ka Laban, ka Aseros, ta Disaab alowae aloche. (

²Ngirwa ngitomon ka epei ngesi alemari alosit enyounio alomoru a Sinai tanang Kadech Barinea iwapitae erot lo itori nakwap na a ngimukur a Edom.)

³Akolongit na ekingaren, elap lo a ngitomon ka epei, ekaru lo a ngitomwon-omwon napei kolong arotokinioto kesi alo Misiri, abu Musa tolimok ngitunga ngakiro daang na adungokinit ngesi Ekapolon Akuj atamar tolimok.

⁴Asubasi nguna ekisidi kidwang Ekapolon Akuj[1] Sion lo arai ekapolon a Ngiamor, lo apolokinit ere a Echibon, kidwang tani Ogu lo apolokinit ngirerea a Achitaros ka Edirei.

⁵Na ayakatar ngitunga kide Yorudan, nakwap a Moab, ngesi esiakinea Musa akiruoro ngakiro a ngitalio a Akuj ka akitatam ebala,

⁶“Nakolong kiyakar ngoni moru a Sinai, abu Ekapolon Akuj na erai Akuj yok kitolimok ngoni tama, ‘Ibooyoto esi alomoru kalo nikooyen.

⁷Tonyoutu taramakisi. Kapesi nakwap na a ngimukur a Ngiamor ka ngiwaitin ngulu daang, tanang nadipo a Yorudan, tanang nakwap na a ngimukur ka ngaroatin, tanang lowaitin lua lokuju, tanang lokwaas a anam a Mediterenian. Toloto nakwap a Kanaan, kiporosi ngimoru a Lebanon, tananga nangolol naapolon a Eupurate.

⁸ Akwap na daang ngesi kolong echikakini ayong Ekapolon Akuj ainakin taapaakus Aburaam, ka Isaka, ka Yakobo, ta ngalesea kech. Kapesi toloma neni.’ ”

⁹Tolimok Musa ngitunga tama, “Kolong eringa ngoni kiya moru a Sinai, kalimokini ayong esi atama, ‘Etich lo a akirik esi elal noi anikang. Nyetiruni ayong alopei.

¹⁰Kitalala Ekapolon Akuj kus esi loger a ngikanyer alu eyakasi nadis.

¹¹Kimiek kiatak Ekapolon Akuj kata apaakus esi ngakiatakinet abunget apei, talalaketa nabo tajakaana loger lokolong kichikakinea!

¹²Ekokini ayong bon asubi etich lokaagongon lo a akitub ngikesio kus bon ai?

¹³Toseutu ngitunga lukoosok tochwaaka, tarai lu eyenete etich alotela kus, sodi etiliwo ayong kesi lu kiweikinito esi.’

¹⁴Ipot kolong esi tachamut atamar ejoikinit kisubi kongina.

¹⁵Sodi etiliwo ayong ngikarikok lukolong iseunete esi, lu araakasi lukoosok tarai lu eyenete etich, etiliwo lu kiweikinito esi. Toweikis ngiche ngitunga abunget apei, toweikis ngiche ngitunga amiat apei, toweikis ngiche ngitunga ngitomwom-kan, toweikis ngiche ngitunga ngitomon. Abu nabo atoseu ngikaweikinak ngiche alotela kadaang.

¹⁶“Abu ayong atolimok kesi atama, ‘Topupokisi ngikesio lu eyauniyete ngitunga kus. Totubo ngikesio daang niajokon, kerai ngika ngitunga kus kori kerai ngika ngitunga alu eponito anakwapea anache, lu elomito nakwap kus.

¹⁷Nyiiminakis ewae epei itubete ngikesio, topuponokisi ngikesio a ngitunga kadaang ikwaan, tani kerai itwaan ngae. Nyieam itwaan kainyo ngakiro na itiakunete esi eponito ani a Akuj. Ani keyei ekies kigogongikini esi, yaut nikang atopupok ayong.’

¹⁸Abu nabo ayong katolimok esi eger lo isubeta ngakiro nache daang.

¹⁹“Kisub ngoni ngakiro nakolong kidungokini Ekapolon Akuj na erai Akuj yok. Kipot atorotokisi alomoru a Sinai etoro nariet naapolon naketubulon na eyei lorot lo elosere nakwap na a ngimukur a Ngiamor. Ani kinanguni Kadech Barinea,

²⁰abu ayong katolimok esi atama, ‘Ipot tokona esi nakwap na a ngimukur a Ngiamor nakiinak ngoni Ekapolon Akuj na erai Akuj yok.

²¹Kingolikisi a, akwap ngina ngesi yaa, tonyoutu toloma loger lo kidungokinea Ekapolon Akuj kata apaayok. Nyieam kori nyiimaranikis.’

²²“Ipot esi daang pot nikang kitolimokis ayong tamasi, ‘Atomeasi ngitunga kingarenikis ngoni torebo akwap, sodi kitolimokis kesi ngoni erot loajokon lo kitori ka ngirerea lu eyakasi inaa.’

²³“Katojoikis ayong ngakiro nguna, sodi atoseu ayong ngitunga ngitomon ka ngiarei, ipei alokitela a epei.

²⁴Toloto kesi nakwap na a ngimukur tananga nadipo a Echikol, torebo.

²⁵Kiinut kesi ngoni ageor na aanyunete kaina, tolimut atamar ejok akwap nakiinakinit ngoni Ekapolon Akuj na erai Akuj yok.

²⁶“Nyelomara esi nakwap ngina kainyo ipot esi tongero ngakiro na adunguni Ekapolon Akuj kus.

²⁷Kingununguno ilimonokinosi make ibalasi, ‘Kiremokino Ekapolon Akuj ngoni. Kipuduni kolong ngesi ngoni alo Misiri, kiyau nia Ngiamor alu kiarete.

²⁸ Nyo kisaki ngoni kaina? Kiemit ngoni. Ebalasi ngitunga lu ngoon kimeari ngoni, elangir ngitunga a akwap kangina nabo ewoyak kidwangito ngoni. Ebalasi nabo, ibooyete ngitunga ngulu alorerea alu edukitoe ngawasea nakooyak na enangito nadis. Taanyungasi kesi ngitunga lulangir-tooyak noi kaina!’

²⁹“Nakaneni atolimu ayong atama, ‘Nyieam ngitunga ngulu.

³⁰Kiriki Ekapolon Akuj na erai Akuj kus esi, nabo eji kotere esi loger lokolong ianyungareta esi eji, alo Misiri, ka

³¹na ajio anariet. Ingolikis esi eger lo kiyaunea esi nege niajokon loger lo edakea itwaan lokookeng.’

³²Nakaneni ani eyakasi nguna daang alimu ayong, ipotu esi nyiinupa Ekapolon Akuj na erai Akuj kus,

³³ tarai bo aloseene ngesi ngaren kus jiik aanyikin esi ni ilomete. Engareni ngesi kidodeanakini esi erot, kitorik nakwaare a apir a akim, ani naparan kitorik a apir a edou.

³⁴“Kiira Ekapolon Akuj eburas kus, abu tongo sodi kikongo tama,

³⁵‘Emam tani ipei kus alotunga aluaronok kalu ni elomari nakwap naajokon nakolong ekongi ayong atamar ainakini taapaakus.

³⁶Kaleb bon lokookeng a Yepune ngesi elomari. Aliwor ngesi itwaan ni amuno ayong nabo ainakini ayong ngesi ka ngalesea keng akwap na areb ngesi.’

³⁷Kangoiki Akuj tani ayong kotere esi, tolimu tama, ‘Nyilomari tani iyong Musa nakwap ngina.

³⁸ Kitogogong ekengarakinan kon, Yochua lokookeng a Nun. Ngesi eriki Ngisireal toloma nakwap ngina.’

³⁹“Sodi kitolimok Ekapolon Akuj ngoni daang tama, ‘Ngide kus lu eringa ediseak, lu nyeyenete naajokak ka naaronok kesi elomarete nakwap ngina. Ngide ngulu kesi lukolong ibalasi esi erikete ngimoe kus. Ainakini ayong kesi akwap toloma.

⁴⁰Ani eliwor lu erai esi, toreas tobongosi nariet, kiwapa erot lo a apas a Akaba.’

⁴¹“Ipot esi tatachut tamasi, ‘Musa, kisechak sua Ekapolon Akuj. Nakaneni kinyouni tokona sua ejie, loger lokidungukinea Ekapolon Akuj na erai Akuj kosi.’ Sodi ipot esi daang tolemut ngiboro a ejie, itamito atamar kori ebeben akirem akwap a ngimukur.

⁴²“Nakaneni katolimok Ekapolon Akuj ayong tama, ‘Kichikichikak kesi atamar nyeejwoto kainyo nyikiruki ayong ka kesi, kotere ngakiro nguna, idwangete ngimoe kesi.’

⁴³Katolimok ayong esi ngakiro na alimuni Ekapolon Akuj, nakaneni nyiimisikis esi. Tongero esi ngesi, Toloto nakwap na a ngimukur inisasi.

⁴⁴Sodi pot Ngiamor lu alomito lomukur ngulu kitobukokinos esi loger a asepich a ao. Kiritasi kesi esi tanang Orima, sodi kidwang kesi esi kaina anakwap a ngimukur a Edom.

⁴⁵Sodi kikaloikis esi Ekapolon Akuj isakete kingarak, nakaneni nyiirara ngesi kori nyemisikina ngakiro kus.

⁴⁶“Ipot esi kibooyoto alo Kadech ngirwa lukaalak.