Read turkana Akitamunet a Etal 10 Bible Online

Akitamunet a Etal 10 - turkana bible

Akitamunet a Etal 10

¹“Abu Ekapolon Akuj katolimok ayong tama, ‘Tokul ngamoru ngaarei nadapal na ikwaan ka nangoon a ekingaren, sodi tosubak asaduku nakitoe kiwaak kesi tooma. Todoku kidiama emoru ni ayei ayong,

²sodi egir ayong namoru nguna ngakiro nangoon egirit ayong namoru nakolong ibwangabwangaari iyong, ani erumor kiwaak iyong kesi tooma nasaduku.’

³“Abu ayong atosubak asaduku anakito a ngiwo, atokul ngamoru ngaarei na ikwaan ka nakolong a ekingaren sodi ayaa kesi kidiama emoru.

⁴Kigirak Ekapolon Akuj ngamoru nguna ngakiro nakolong sek egirit ngesi ekingaren, ngitalio lutomon lukolong kiinakini ngesi esi na eruoror anakim, akolongit na iriamiriamitotor esi moru. Kainak Ekapolon Akuj ayong ngamoru nguna,

⁵ atorei ayong atotiyaun alomoru. Sodi ewaak ayong kesi nasaduku na asubuni ayong loger lokolong adungunitor Ekapolon Akuj. Nakaneni apena kesi neni napei kolong jik.” (

⁶Torotokis Ngisirael ani ayakasi ngakiro nakolong araakasi ngaka ngitunga a Yaakan, sodi toloto nadakar be Mosera. Totoan Aron kaina sodi tonukae, ani erumor kilunyokin lokookeng nados keng toliwor emuron a Akuj.

⁷Na anyounioto kaneni toloto ni anyaritae Gudigoda tanang Yotibasa nia ngakipi anakaalak.

⁸Ani alomoru,[7] abu Ekapolon Akuj toseu ngikiliok a ekitela a Lawi toliworos kesi etingito asaduku a Achamunet, nabo tosuba etich keng eraakasi ngimurok a Akuj, ta agatanakin apiaro elimito ekiro a Ekapolon Akuj. Ngitichisio ngulu kesi eringa kesi esubete.

⁹ Ngakiro nguna kesi kolong peanyunea ekitela a Lawi akwap na aanyunito ngitela luche. Ibore aanyunete kesi ngesi aliwor ngimurok a Ekapolon Akuj, loger lokolong echikakinitor Ekapolon Akuj na erai Akuj kus.)

¹⁰“Eboikin ayong moru ngirwa ngitomwon-omwon, akwaar ka apaaran, loger lokolong a ekingaren. Abu nabo Ekapolon Akuj kiira ngakiro kang sodi tacham atamar nyakamunyari esi.

¹¹Abu Ekapolon Akuj katolimok ayong tama, ‘Tonyou toriko ngitunga tolemasi akwap nakolong echikakini ayong atamar ainakini taapaakus.’

¹²“Ngisirael, topupokisi tokona ngakiro na esaki Ekapolon Akuj na erai Akuj kus. Nugu ngesi esaki ngesi anikus. Kilipa Ekapolon Akuj tosuba ngakiro daang na elimuni ngesi. Tominakisi ngesi, tosuba etich keng a ngitai kus kadaang.

¹³Kiwapa ngitalio keng daang lukadungok ayong esi taanyuneta naajokak.

¹⁴Erai tani adis na eyei kidiama noi aka Ekapolon Akuj. Erai tani akwap dang ka ibore daang ni eyei nakwap ikeng.

¹⁵Kotere ni aminar Ekapolon Akuj taapaakus noi, abu ngesi kitoseu esi alokiding ngitunga luche daang, nabo eringa esi iraakasi ngitunga keng luseuna.

¹⁶Aloger kangolo, toliworos tokona jik ngitunga lu iwapito Ekapolon Akuj, tojongoto araakau lukechanak.

¹⁷Epol Ekapolon Akuj na erai Akuj kus idwangit ngakujo daang ka ngapolosio daang. Epol ngesi etiono, nabo erai na ekeritae. Meere ngesi Akuj na etiakatiakat ngitunga nabo nyechamit ngesi akitololonakino ngiboro.

¹⁸Irichakinit ngesi ngikokiok ka ngapuseru. Emina ngesi ngitunga a ngakwapea anache lu erukito ka ngitunga yok, einakinit akimuj ka ngiworui.

¹⁹Tominakisi robo ngitunga a ngakwapea anache ngulu kainyo iraakasi kolong esi dang ngitunga a akwap a nache na iyakatar Misiri.

²⁰Kiwapa Ekapolon Akuj na erai Akuj kus, sodi kilipa ngesi bon. Toliworos lu kimuno ngesi, tolimut ngakichikakinet kus daang alokiro keng bon.

²¹Kipuro ngesi kainyo erai Akuj kus, nakisubea esi ngakiro nakailiilok ka naketubulok ingolikis esi a ngakonyen kus a ngikulepek.

²² Aloose kolong taapaakus Misiri eraakasi ngitomwon-kaarei. Tokona, kitalala Ekapolon Akuj esi loger a ngikanyer alu eyakasi nadis.