Read turkana Akitamunet a Etal 11 Bible Online

Akitamunet a Etal 11 - turkana bible

Akitamunet a Etal 11

¹“Tominakisi Ekapolon Akuj na erai Akuj kus, kiwapa jiik ngitalio keng daang.

²Toyena akolongit naga ngakiro daang nakitatam Ekapolon Akuj esi anakiro ana kisubea ngesi esi, kainyo esi kolong kisubere ngakiro nugu, meere ngide kus. Ingolikinete kolong esi apolou a Ekapolon Akuj ka agogongu, ka ationis,

³ta ngakiro nakailiilok asubi ngesi. Ingolikinete kolong esi ngakiro na asubea ngesi ekapolon a Misiri ka akwap keng daang etia ni etia.

⁴Ingolikinete kolong esi eger lo amunyarea Ekapolon Akuj ngasigerea a Misiri aapei ka ngangolei kech, ta ngaurukukui kech na irito ngangolei, sodi kitanyam kesi anam a Chamu, na kiwapitotor kesi esi.

⁵Iyenete esi ngakiro nakolong kisubea esi Ekapolon Akuj anariet eringa nyenanguna nege.

⁶Itamunito esi ngakiro nakolong asubea ngesi Dasan ka Abiram lu araakasi talokookeng a Eliab alo a ekitela a Reuben. Apot ngalup tapakas alongaren ngitunga sodi kilikosi kesi aapei ka ngitunga a ngawiyei kech, ka ngieman kech, ka ngikedalak kech daang, ta ngibaren kech.

⁷ Iteni dir, esi kesi ingolikis ngakiro nakailiilok daang asubi Ekapolon Akuj.

⁸“Kiwapa robo ngitalio daang lukadungok ayong esi akolongit naga, taanyuneta esi agogongu idokareta ekwakaye angolol toloma nakwap na edikino esi ilomarete.

⁹Elalakearosi ngirwa kus anakwap kangina, ana ileleba ngakile ka akimiet a ao. Akwap ngina ngesi nakolong echikakini Ekapolon Akuj taapaakus ka ngalesea kech.

¹⁰Nyikwaan akwap na edikino esi ilomarete ka Misiri, na kolong ilomito esi ekingaren. Itaate kolong esi ngikinyam kaina nabo tosuba etich lokaagongon lo a achilanakin ngamanat ngakipi.

¹¹Eya robo tokona akwap na ilomarete esi ngimoru ka ngadipoe nabo etepi akiru.

¹²Irichakinit Ekapolon Akuj na erai Akuj kus akwap naga, nabo iyoki napei anakisiakinet a ekaru tanang losal.

¹³“Aloger kangolo, kiwapa ngitalio lukadungok ayong esi akolongit naga, tominakisi Ekapolon Akuj na erai Akuj kus, tosuba etich keng a ngitai kus kadaang.

¹⁴Ani kisubakis esi kongina, eyauni ngesi akiru toliwor erameene ngirwa lupalem erameenea akwap kus, kerai ngirwa lua akiporo kori lua ngirupei, sodi toriamut esi ngikinyam, ka, emuna, ka akimiet kus,

¹⁵ta nginyia a ngaatuk kus. Iriamunete esi akimuj daang na isakete.

¹⁶Warasi nyiirearosi ani a Ekapolon Akuj kilipa ngakujo nache ka akisub etich kech.

¹⁷ Ani kisubakis esi kongina, kingoikini Ekapolon Akuj esi. Itongopi akiru toon akwap kus deu nyeeruput ngikinyam kus, nabo tomunyaros esi atipei toisikis akwap nati ajokon kiinak ngesi esi naga.

¹⁸“Kiwaakisi ngitalio lugu lotai kus ka lotamen kus tominakis. Tanapa anakan ka ngireetin kus kikokis emachar.

¹⁹Kitatama ngide kus ngitalio lugu. Kiruoro ngakiro a ngitalio kalu iyakasi nawiyei, ka nalotoru, ka na iangaritotor, ta na isubeta etich.

²⁰Kigira kesi nakituk a ngakais kus ka lodorin a ngawasea kus.

²¹ Sodi talalakearotor ngirwa lu ibooyoto esi ka ngide kus anakwap ana kolong echikakini Ekapolon Akuj na erai Akuj kus taapaakus. Ilomete esi neni ngirwa daang lu eyakar adis kidiama akwap.

²²“Kiwapa dir ngitalio daang lukadungok ayong esi. Tominakisi Ekapolon Akuj na erai Akuj kus, tosuba ngakiro na edungunit ngesi daang, nabo toliworos lu kimuno ngesi.

²³Nakaneni itwarakini ngesi ngibukui luche daang iloose esi ngaren, sodi toloma esi nakwap a ngibukui alu eyenikinitae nabo tojwoko noi kidwangito esi.

²⁴Ngalup na ichiakete esi daang eliworosi ngakus. Isiakini akwap kus napei anariet ana eyei kuju tanang lomoru a Lebanon alokwap. Kisiak nabo anangolol a Eupurate alo kide tanang nanam a Mediterenian alo too.

²⁵ Akwap nacha ilomarete esi daang itukuriani Ekapolon Akuj ngitunga kitoeam esi, loger lokolong echikichikar ngesi, nakaneni emam itwaan kiweikini esi.

²⁶“Akolonngit naga ewaak ayong ngakiro ngaarei natiakuna nikus, apiaro ka ngilam.

²⁷Ianyunete apiaro erai kiwap esi ngitalio a Ekapolon Akuj ana erai Akuj kus, lukadungok ayong esi akolongit naga.

²⁸Nakaneni ianyunete ngilam erai kingero esi ngitalio lugu, sodi toreas kilipa ngakujo na eringa nyilipa nakanuan.

²⁹Ani kiyauni Ekapolon Akuj esi nakwap na ilomarete esi tolemasi, tolimut apiaro alomoru a Gerisim, tolimut ngilam alomoru a Ebal. (

³⁰Eyakasi ngimoru luarei ngulu too angolol a Yorudan, nakwap a Ngikanaan alu elomito nadipo a Yorudan. Eyakasi ngimoru ngulu daang lowae lo alo too diyete ngichokei lua etal a More, diyete ere a Giligal.)

³¹Edikino esi idokete angolol a Yorudan, sodi toloma nakwap nakiinakinit esi Ekapolon Akuj na erai Akuj kus. Ani ilemarete esi akwap ngina toloma,

³² kirichakisi ngitalio daang lukadungok ayong esi akolongit naga.