Read turkana Akitamunet a Etal 12 Bible Online

Akitamunet a Etal 12 - turkana bible

Akitamunet a Etal 12

¹“Ngitalio lugu kesi echamit esi iwapete ngirwa daang lu ilomitotor esi nakwap nakiinakinit esi Ekapolon Akuj na erai Akuj kata apaakus. Kirichakisi robo!

²Anakwap ana ilemarete esi, kinyasutu ni ilipeeneta ngitunga ngakujo kech alokidiama ngimoru lukooyak, ka kidiama ngimukur, ta kwap ngikito lu elibito.

³ Tobwanga ngikenoi a ngakipeyos kech sodi kiealasi ngapirio a ngamoru ana italeunitoe edukito kesi. Kichunya ngakisikwaanet a akuj kech anaberu anabe Achera*g** a akim nabo totubutuboto ngakujo kech nasubuna sodi nyiilipa kesi nabo kaneni.

⁴“Nyiilipa Ekapolon Akuj na erai Akuj kus loger lo ilipitotor ngitunga lugu ngakujo kech.

⁵Anakwapea kadaang a ngitela kus, eseuni Ekapolon Akuj wapei ni eponeeneta ngitunga nikeng kilipa ngesi.

⁶Neni esakitere esi ipeyooto ngakipeyos kus na inomio, ta ngakipeyos nache dang. Ilemunete esi kaneni alemunet apei anatomon, ka ngalemunet, ka ngainakinet na ikongito esi alemun, ta ngiuriuna lu ekingaren a ngaatuk ka ngamesekin kus.

⁷Imujete esi ka ngitunga a ngawiyei kus kaneni alongaren Ekapolon Akuj kus nakipiarit esi. Nabo ianyunete esi ngiboro luajokak daang lu eraakasi kesi kolong isubeta esi etich.

⁸“Ani enangi ngirwa ngulu, nyiisubakis napalem isubete. Napei kolong jik tanang tokona, ilipeenete esi loger lo isaketa esi ngikulepek,

⁹ani eringaakar esi nyelomara nakwap nakiinakinit Ekapolon Akuj na erai Akuj kus esi. Akwap ngina ngesi ilomete esi a ekisil.

¹⁰Ani idokarete ekwakaye angolol a Yorudan, kimiekini Ekapolon Akuj esi ilomarete nakwap toloma. Kiyoki ngesi esi alomoe kus kadaang, sodi toloma neni isilito.

¹¹Eseuni Ekapolon Akuj wapei ni ilipeenere ngesi, neni ngesi iyaunete esi ibore daang nikadungok ayong esi. Yautu neni ngakipeyos kus na inomio, ka ngakipeyos nache, ka alemunet apei anatomon, ta ngadekon kus, ka ngainakinet na ikong esi atamar ilemikinete Ekapolon Akuj.

¹²Talakaros kaina ani a Ekapolon Akuj. Talakaros aapei ka ngide kus, ka ngikasubak etich kus, Ngilawi lu ilomito ka esi lorerea kus. Toyena atamar emam ngitunga a ekitela a Lawi akwap na erai akech a ngikulepek.

¹³Nyechamitae esi ipeyoote ngakipeyos kus awadaang ani iseunete esi.

¹⁴Echamitae ipeyoote ani eseuni Ekapolon Akuj anakwap a ekitela a epei anikus. Neni bon ngesi echamit esi ipeyooto ngakipeyos kus na inomio ka akisub ngakiro nache daang nakadungok ayong esi.

¹⁵“Nakaneni ipedorete esi akiar ka akinyam ngibaren kus awadaang anicha ilomito esi. Ipedorete akinyam daang lu kiinakini Ekapolon Akuj. Esi daang lu kitaleunitoe ka lu nyikitaleunitoe ipedorete akinyam kesi loger lopei inyameta akiring a emakata kori na a agete.

¹⁶Nakaneni nyejoikinit esi inyamete ngaakot. Ejoikinit esi ibukokinete nalup loger a ngakipi.

¹⁷Emam ibore daang ni ilemikinito esi Ekapolon Akuj ni enyamio ani ilomito esi. Kerai tani alemunet apei anatomon a ngikinyam kus, kori emuna kus, kori akimiet kus, kori ngiuriuna lua ekingaren a ngaatuk kus ka ngamesekin, kori ngadekon na ikong esi atamar ilemikinete Ekapolon Akuj, kori ngalemunet na isakete esi alemun, kori ngalemunet nache daang.

¹⁸Esi aapei ka ngide kus, ka ngikasubak etich kus, ta ngitunga a ekitela a Lawi lu ilomito ka esi lorerea kus, inyamete ngakipeyos nguna alongaren Ekapolon Akuj na erai Akuj kus. Tanyama ani aseu Ekapolon Akuj na erai Akuj kus atamar kilipeenere. Nakaneni ejoikinit esi ilakarosi kaina kotere ibore daang ni isuba esi.

¹⁹ Tochoikisi ngitunga a ekitela a Lawi, warasi nyikimuriakis ngirwa daang lu ilomitotor esi nakwap kus.

²⁰“Ani enyaari Ekapolon Akuj na erai Akuj kus akwap kus loger lokolong echikichikar ngesi, ipedorete esi akinyam akiring esaa daang lo isaketa.

²¹Ani kelonera ni ilipeenere, taara robo aite kori amesek alobaren alu kiinak Ekapolon Akuj, erai kisakete akiar. Ani erumor tanyama akiring anawi loger lokalimokinea ayong esi.

²²Esi daang lu kitaleunitoe ka lu nyikitaleunitoe, ipedorete akinyam akiring ngina loger lopei inyameta akiring a emakata kori na agete.

²³Tochoito robo inyamete akiring eringa ngaakot eyakasi, kainyo eyei akiyar naakot, nakaneni nyejoikinit esi inyamete akiyar ka akiring.

²⁴Nyiinyam ngaakot, tobukokisi nalup loger a ngakipi.

²⁵Ani kiwap esi etal ngolo, elakar Ekapolon Akuj nabo ejokearosi ngakiro daang anikus ka ngalesea kus.

²⁶Yaasi ngalemunet kus ni ilipeenere aapei ka ngainakinet na ikong esi atamar ilemikinete Ekapolon Akuj.

²⁷Kipeyoto kaneni ngakipeyos na inomio tonomiasi alokeno alo ipeyonokinere Ekapolon Akuj. Kipeyoto nabo dang ngakipeyos na inyamete esi akiring sodi tobukokis ngaakot lokeno a Ekapolon Akuj.

²⁸ Kiwapa dir ngakiro daang nakadungokinit ayong esi, tojokearotor jik ngakiro daang anikus ka ngalesea kus, kainyo iliworosi esi lu isubete na eriyan, kitalakarito Ekapolon Akuj na erai Akuj kus.

²⁹“Emunyari Ekapolon Akuj na erai Akuj kus ngibukui na ilemareta esi akwap kech, nakaneni ilomarete esi nakwap ngina toloma.

³⁰Ani emunyari Ekapolon Akuj kesi erumor, warasi nyiiwap ngakujo kech, kainyo erikunete ngakiro nguna akitu. Warasi nyiisak akingichingich eger lo ilipeeneta kesi ngakujo kech, sodi tasaka esi dang akilip loger ngolo.

³¹Nyiilipa Ekapolon Akuj na erai Akuj kus loger lo ilipeeneta kesi ngakujo kech, kainyo anakilipit kech, esubeenete kesi ngakiro naaronok daang na eremokino Ekapolon Akuj. Ipeyoonete kesi tani ngide kech alokenoi a ngakipeyos.

³² “Tosuba ngakiro daang nakadungok ayong esi. Warasi nyiatakis ibore idio nakiro nguna kori nyiilemasi ibore idio anakiro kanguna.