Read turkana Akitamunet a Etal 13 Bible Online

Akitamunet a Etal 13 - turkana bible

Akitamunet a Etal 13

¹“Epedori ekadwaran kori ekerujan bu nikus kichikak esi ngakiro nakailiilok kori nakatalarak

²esaki kibatarea sodi kilipa ka akisub etich a ngakujo ana eringa esi nyilipa a ache. Tani kiyookin ngakiro nakichikakini ngesi esi,

³nyiimisikis ngakiro keng, kainyo kiningit Ekapolon Akuj na erai Akuj kus esi a ngakiro keng sodi taanyunea kiminasi esi Ekapolon Akuj na erai Akuj kus a ngitai kus kadaang ka akiyar kus daang.

⁴Kiwapa Ekapolon Akuj, tokera ngesi, topupo ngakiro keng, kirichakis ngitalio keng. Kilipa ngesi sodi toliworos lu imunosi ngesi.

⁵Nakaneni taara ekerujan ka ekadwaran daang lo ebala esi tongero Ekapolon Akuj nakolong kiyuuni esi alo Misiri ani kolong iraakatar esi ngikedalak. Erono itwaan ni ikoni neni kainyo esaki ngesi akibatar esi anakiyar anakolong kidungokini Ekapolon Akuj atamar kiwapa. Ejoikinit ngesi eario sodi tolemareta esi ibore niaronon ngini anikus.

⁶“Epedori tani lokaatokon, kori lokookon, kori nakookon, kori aberu kon naminat, kori lopae kon lo etau akimod iyong peiyeni tama kilip ngakujo ngache, ngakujo na kolong nyilipa iyong ka ta apaakon nakanuan.

⁷Epedori tani iche atamar iyong kilip ngakujo a ngitunga alu idunyasi ka esi kori alu elomito nialonan.

⁸Nakaneni wara ngesi nyikimaima iyong. Nyiipupok tani napupokin. Wara nyikisien, kori torimak, nabo tochoite iikini.

⁹Taar ngesi! Kingela a akan kon kimas ngesi a ngamoru, ani erumor kimasa ngitunga luche daang ngesi a ngamoru.

¹⁰Kimasa a ngamoru totoan! Asaki ngesi akibatar esi ani a Ekapolon Akuj ana erai Akuj kus, ana kolong kiyuuni esi alo Misiri, ani iraakatar ngikedalak.

¹¹Sodi iirarete Ngisirael daang ngakiro na asubasi toema, nakaneni emam itwaan ebongokini akisub ngakiro naaronok nguna jik.

¹²“Ani ilomete lorerea lu kiinakini Ekapolon Akuj na erai Akuj kus esi, ipedorete akiirar

¹³atamar ebatasi ngitunga kus ngiche pasiek, ebatasi ngitunga a ere kech akilipit ngakujo na nyilipa esi nakanuan.

¹⁴Ani kiirasi esi ngakiro nguna, tongichutu lokojokon, ani kesubakina dir ngakiro naaronok nguna,

¹⁵taara ngitunga a ere kangolo daang ka ngaatuk kech daang. Kinyasutu ere ngolo lokojokon.

¹⁶Tochunakisi ngiboro a ngitunga alu elomito neni kadaang tosenokis kiding ere. Sodi kichunya ere ka ibore ni eyei lore daang toliwor akipeyos a Ekapolon Akuj ana erai Akuj kus. Ejoikinit imiekinio inyasuna nyeeduk nabo jik.

¹⁷Emam ibore ni ejoikinit inyasunio ni ilemarete esi tani ipei. Ani pekilemasi esi, epalikini Ekapolon Akuj anyunyura toliwor lo a ngisien anikus, kitiliwo esi ngitunga lukaalak loger lokolong echikakinitor ngesi taapaakus,

¹⁸erai kiwap esi ngitalio keng daang lukadungok ayong esi akolongit naga, sodi tosuba ngakiro na esaki ngesi.