Read turkana Akitamunet a Etal 14 Bible Online

Akitamunet a Etal 14 - turkana bible

Akitamunet a Etal 14

¹“Iraakasi esi ngitunga a Ekapolon Akuj ana erai Akuj kus. Ani igorosi esi tosutonokis kotere itwaan ni atoana, nyiidungudungoto ngawat kus kori nyiiluro loger a ngitunga aluche.

² Iraakasi esi ngika Ekapolon Akuj ana erai Akuj kus. Kiseu ngesi esi toliworos ngitunga keng alotunga kadaang alu eyakasi nakwapea.

³“Nyiinyam ibore daang ni alimu Ekapolon Akuj atamar italeo akinyam.

⁴Ipedorete esi akinyam ngibaren ka ngitieng. Tanyama ngibaren lugu, ngaatuk, ka ngamesekin, ka ngakinei.

⁵Tanyama ngitieng lugu ngimakatae, ka ngamesekin na a ngimoru, ka ngatirikiki, ka ngagetei,

⁶ta ngitieng daang lupakak a ngakichiaket, kiyeruuniyete nginyia.

⁷Emam etiengit enyamio mati epakak akichiaket tarai nabo iyeruununi nginyia. Nyiinyam ngikaala ka ngapooe, kori ngadukae. Italeo kesi akinyam kainyo tani kiyeruuniyete nginyia, nyeepakak ngakichiaket.

⁸Nyiinyam ngiputiro. Italeo kesi akinyam kainyo tani kepakak kesi ngakichiaket, nyiyeruunete nginyia. Eraakasi kesi ngitieng lu italeo akinyam. Nyiinyam akiring kech kori nyiitap na etoaketa.

⁹“Ipedorete akinyam ngikolea daang lu eyakasi ngibeben ka ngikabebekwa.

¹⁰Nakaneni ibore ni eyei nakipi daang, ni emam ngibeben ka ngikabebekwa, italeo akinyam.

¹¹“Tanyama ngikieny daang lu nyitaleo akinyam.

¹²Nakaneni nyiinyam ngikieny lu imarunitae kanege lugu, lu eraakasi egole, ka atarukot,

¹³lokidole, chiili ka auk kech daang,

¹⁴apanaangor ka auk keng daang.

¹⁵Ekalees, ka tula na akwaar, ka ngabaanga, ngigolei luche ta auk kech.

¹⁶Tula naachi ka naapolon, ta abaangat naakwaan.

¹⁷Aumo ka atarukot nabe kotol, ka nalumio,

¹⁸ka natole, ka nabe namedot ta auk kech daang. Lokut ka lononwa.[8]

¹⁹“Ngiborei daang luuchik lu eporito, italeo akinyam.

²⁰Ipedorete akinyam ngiborei luuchik lu eporito lu nyitaleo akinyam.

²¹ “Nyiinyam ibarasit ni etoani bon. Kimiekisi ngitunga a ngakwapea anache lu elomito nakwap kus tanyama, kori togielakisi ngitunga ngiche lugelayek. Nakaneni iraakasi esi ngitunga luseuna a Ekapolon Akuj ana erai Akuj kus. Iraakasi esi ngitunga keng. “Nyiidorok ikale kori imesek a ngakile a itiokeng.

²²“Kitegeleasi apei anatomon a ngalemet ana ekokete anamanat kus ekaru daang.

²³Sodi toloto ni aseu Ekapolon Akuj na erai Akuj kus toliwor ilipeenere ngesi, sodi tanyama kaneni alongaren keng alemunet apei anatomon a ngikinyam keng ka emuna lo epuritoe, ka akimiet ta ngiuriuna lu ekingaren a ngaatuk ka ngamesekin kus. Tosuba kongina kitatamatar arima Ekapolon Akuj na erai Akuj kus jiik.

²⁴Ani keloner ni ilipeenere anawiyei kus, kitokuruwo esi akiwok alemunet apei anatomon a ngalemet ana kipiaritor esi Ekapolon Akuj, tosuba kona.

²⁵Togialasi ngalemet kus sodi yaasi ngaropiyae ni ilipeenere.

²⁶ Togieleta ibore nicha isakete esi, kerai ngimongin, kori ngimesekin, kori emuna lo epuritoe, kori epurot. Sodi kimuja esi ka ngitunga a ngawiyei kus alongaren Ekapolon Akuj na erai Akuj kus talakaros.

²⁷“Tochoikisi ngitunga a ekitela a Lawi lu elomito lorerea kus kainyo emam kesi ibore ni erai ikech.

²⁸Adaunet a ekaru alo a nguuni, yautu alemunet apei anatomon a ngalemet kus kadaang kikachakis lorerea kus.

²⁹Erai akimuj ngina aka Ngilawi kainyo emam kesi ibore ni erai ikech. Erai akimuj ngina tani aka ngitunga a ngakwapea anache, ka ngikokiok, ta ngapuseru na elomito lorerea kus. Ejoikinit kesi epote tolemasi ibore daang ni esakete. Tosuba kongina sodi kitopia esi Ekapolon Akuj na erai Akuj kus anakiro kadaang.