Read turkana Akitamunet a Etal 15 Bible Online

Akitamunet a Etal 15 - turkana bible

Akitamunet a Etal 15

¹“Adaunet a ngikaru a ngikan-kaarei, tajal ngaropiyae daang nakolong emichaarito ngitunga anikon.

²Esakitae esubio kona. Itwaan daang ni imichaarit Esiraelit loche ngaropiyae keng, esakitae tajal ngaropiyae nguna. Nyejoikinit ngesi elosi akimichaun ngaropiyae nguna, kainyo ekisa Ekapolon Akuj alope amicha ngina.

³Kimicha ngitunga a ngakwapea anache ibore kon ni elemarito, nakaneni nyejoikinit iyong imichae ngitunga lukon a ilope ibore ni elemarete anikon.

⁴“Kipiari esi Ekapolon Akuj na erai Akuj kus anakwap ana kiinakinit. Emam itwaan tani ipei anikus ni iboosi

⁵erai kiwap esi ngakiro a Ekapolon Akuj sodi kirichakis ngakiro daang nakadungok ayong esi akolongit naga.

⁶ Kipiari esi Ekapolon Akuj loger lokolong echikichikar ngesi. Earete ngibukui luche ngamichae anikus nakaneni nyiarete esi ngamichae anikech. Ipolokinete esi ngibukui lukaalak nakaneni nyikipolokinete kesi esi.

⁷“Ani keyei Esiraelit lo iboosit alorerea a akwap ana kiinakini esi Ekapolon Akuj, wara nyiimoner towou akingarakin ngesi.

⁸Nakaneni tapataner toliwor lo iinanakini ngesi ibore daang ni esaki.

⁹Nyiiwou robo ainakin ngesi ibore ani aapuunea ekaru lo ikisarere ngamichae. Wara nyiitamak ngakiro naaronok ikote nguna. Ani kiwou iyong akitaar ngesi amicha, ikaloikini ngesi Ekapolon Akuj kotere iyong sodi kimarun iyong atamar isechit.

¹⁰Nak iyong ngesi pas peimonitor, nakaneni kipiari iyong Ekapolon Akuj anakiro kon kadaang.

¹¹ Ngirwa daang, nyengopete Ngisirael ngiche lu iboosit, kadungokinit ayong esi atamar tapataketa anikech sodi iinanakis ibore.

¹²“Ani kigiel iyong itwaan ni erai Isiraelit ani esakea ngesi iyong togiel ngesi, toliwor ekedalan kerai itwaan ngini ikile kori iberu, kimiek tosub etich kon a ngikaru a ngikan-kapei. Ani enangi ekaru lo a ngikan-kaarei, talakak tolot.

¹³Ani ilakakini iyong ngesi elosi, nyiilakak elosi a ngakan anikirion.

¹⁴Nak a apatanu ngiboro lu kipiaritor Ekapolon Akuj iyong, anaatuk dang, ka ngikinyam, ta emuna.

¹⁵ Kitamutu atamar iraakasi kolong esi ngikedalak alo Misiri sodi abu Ekapolon Akuj na erai Akuj kus kitoyuu esi, eger ngolo ngesi kadungokinitor ayong esi ngakiro nugu.

¹⁶“Ani pekesaki ekedalan kon arotokin ani kiminar ngesi iyong, ka ngitunga a awi kon, ta nabo ni irukioto ka iyong niajokon,

¹⁷toriko ngesi nakituk a akai kon sodi torub akit keng, toliwor ekedalan kon jik. Tosubea tani akedalan kon naberu kongina.

¹⁸Wara nyikitionik iyong alakakin ekedalan kon tolot kainyo asub ngesi etich kon a ngikaru a ngikan-kapei. Asub ngesi etich ngolo ngasubet ngaarei a itwaan ani igiritae akinyam ngaropiyae. Tosub kona sodi kitopia Ekapolon Akuj na erai Akuj kon anakiro kadaang ana isubi iyong.

¹⁹“Kitegeliasi ngiuriuna lu ekingaren a ngaatuk ka ngamesekin toliworos ngika Ekapolon Akuj ana erai Akuj kus. Nyiisubeta ngitak ngulu etich kori nyiitub ngajul a ngimesekin kangulu.

²⁰Ekaru daang esakitae esi ka ngitunga a ngawiyei kus inyamete ngiuriuna ngulu alongaren Ekapolon Akuj ani echamakinitae ilipeenere.

²¹Nakaneni ani kesechech ngibaren ngulu, kengwalito, kori kemudukaka, kori keyei wache ichwangakina, nyechamitae esi ilemunete kesi kitiliwosi ngakipeyos a Ekapolon Akuj ana erai Akuj kus.

²²Ipedorete esi akinyam ngibaren lu ikote neni anawiyei. Esi daang, erai kitaleunitoe kori pekitaleunitoe, ipedorete akinyam loger lo inyameta emakata kori agete.

²³ Nyiinyam ngaakot kech. Tobukokisi nalup loger a ngakipi.