Read turkana Akitamunet a Etal 16 Bible Online

Akitamunet a Etal 16 - turkana bible

Akitamunet a Etal 16

¹“Tokera Ekapolon Akuj na erai Akuj kus ani itamuuneta akolongit a esukukuu a Adeparet alolap alobe Abib, kainyo elap kolong ngolo nakwaare ngesi kiyuunea Ekapolon Akuj na erai Akuj kus esi alo Misiri.

²Tolemutu ibarasit ipei anamesekin kori anaatuk tongolakis ni echamakinitae ilipeenere toliwor ngakipeyos a Adeparet na erimare Ekapolon Akuj na erai Akuj kus.

³Ani inyamete akimuj ngina, nyiinyam ngamugati na eyei ekitoe lo itubui. Ngirwa ngikan-kaarei inyamete esi ngamugati na emam ekitoe lo itubui ikirikirasi, loger lo kolong inyameta na irotokinioto alo Misiri. Tanyama amugati ngina, na enyarao amugati a aboliaro, sodi ani cha eringa esi iyarete kitamunitotor akolongit na irotokinioto alo Misiri, ani erai akwap a aboliaro.

⁴ A ngirwa a ngikan-kaarei, emam itwaan anakwap kus ni esakitae eyei ekitoe lo itubui ngamugati nawi keng, nabo echamitae akiring a ibarasit ani eario atabong a akolongit ana ekingaren, enyamio akolongit ngina nakwaare.

⁵“Nyiipeyoto ngakipeyos a Adeparet alorerea alu kiinakini esi Ekapolon Akuj na erai Akuj kus.

⁶Nakaneni kipeyoto ani eseuni Ekapolon Akuj na erai Akuj kus toliwor ni echamakinitae ilipeenere. Kipeyoto ebong adooyoret a akolong kainyo esaa lokolong irotokinioto esi alo Misiri ngolo.

⁷Kidorokisi akiring tanyama ani echamakinitae ilipeenere, ani nataparach tobongo nawiyei.

⁸A ngirwa a ngikan-kapei ekisidi a akolongit kangina, esakitae esi inyamete ngamugati na emam ekitoe lo itubui. Ani enangi akolongit na ngikan-kaarei, tochunakinos kilipa Ekapolon Akuj na erai Akuj kus, nakaneni nyiisuba etich akolongit ngina.

⁹“Kimarakisi ngiukio ngikan-kaarei napei isiakineta esi akilem ngamanat kus,

¹⁰sodi tosubakis Ekapolon Akuj na erai Akuj kus esukukuu a ngalemet, yaut nikeng ngakipeyos na isakito esi alemun itemem ka etiae lo kipiaritor ngesi esi.

¹¹Talakaros alongaren Ekapolon Akuj. Talakaros aapei ka ngide kus, ka ngikasubak etich kus, ka Ngilawi ka ngitunga a ngakwapea anache, ka ngikokiok, ta ngapuseru na ilomito ka esi lorerea kus. Tosuba kona ani echamakinitae ilipeenere.

¹² Kiwapa ngitalio ngulu dir itamunito atamar iraakasi kolong esi ngikedalak alo Misiri.

¹³“Ani ipiatarete esi ngikinyam kus ka achuun emuna anamusabib kus, tosubakisi esukukuu a ngikalea a ngirwa a ngikan-kaarei.

¹⁴Talakaros kotere esukukuu ngolo, esi ka ngide kus, ka ngikasubak etich kus, ka Ngilawi, ka ngitunga a ngakwapea anache, ka ngikokiok, ta ngapuseru na ilomito ka esi lorerea kus.

¹⁵ Tokera Ekapolon Akuj na erai Akuj kus, tosubakis esukukuu lo a ngirwa a ngikan-kaarei ani echamakinitae ilipeenere. Talakaros kainyo apia Ekapolon Akuj ngalemet kus ka etich kus.

¹⁶“Esakitae ngikiliok a ebukut kus daang eloose ngalosiet ngauni akilip Ekapolon Akuj alokaru a epei ani achamakinitae ilipeenere, akolongit na a esukukuu a Adeparet, ka lo a ngalemet, ta lo a ngikalea. Esakitae ekile daang eyauni ainakinet

¹⁷na epedori ngesi ayaun itemem ka eger lo epiaritor ngesi Ekapolon Akuj na erai Akuj kus.

¹⁸“Toseutu ngikatubok ngakiro ka ngikaweikinak luche alorerea kadaang alu kiinak esi Ekapolon Akuj na erai Akuj kus. Esakitae kesi etubete ngakiro a ngitunga eriyan.

¹⁹Nyesakitae kesi iwapito ngakiro na nyeriyan, kori ipakanarete ngitunga ngiche etubete ngakiro, nyesakitae kesi idiaunete ngiboro lu ediekitere kori ngainakinet, kainyo itumudukanete ngiboro ngulu ngakonyen tani a ngitunga alukoosok ka lu emunoi, sodi kisichwangak kesi etubete ngakiro.

²⁰ Toliworos jiik ngitunga luajokak ka lu isubete na eriyan, sodi tolemareta akwap nakiinakini Ekapolon Akuj na erai Akuj kus esi, torubakis ilomito neni.

²¹“Ani isubakinete ekeno a ngakipeyos a Ekapolon Akuj ana erai Akuj kus, nyitowaa nabo kaneni ekisikwaane lokitoe a akuj anabe Achera.*g**

²² Kori nyiisenokis ngamoru kitiliwosi akuj kus nasubuna, kainyo eremokino Ekapolon Akuj kesi.