Read turkana Akitamunet a Etal 17 Bible Online

Akitamunet a Etal 17 - turkana bible

Akitamunet a Etal 17

¹ “Warasi nyiipeyokis Ekapolon Akuj na erai Akuj kus ngaatuk ka ngamesekin na eyakasi ni ichwangakina, kainyo eremokino Ekapolon Akuj ibore ngini.

²“Ani keyei itwaan alorerea kus nikile kori niberu ni asechaki Ekapolon Akuj ani echwangakinea achamunet a Ekapolon Akuj,

³ani elipea ngakujo nache ka akisub etich kech, keraakasi ngakujo nguna akolong, kori elap, kori ngikanyer, tarai nyitemem nguna ka ngakiro nakolong adunguni Ekapolon Akuj.

⁴Ani kiirasi esi ngakiro na ikote nguna, tongichutu lokojokon. Ani kesubakina dir ngakiro naaronok nguna anakwap a Ngisirael,

⁵kipudosi itwaan ngini nikalapatan a ere kimasa a ngamoru totoan.

⁶Echamitae ngesi eario eraakasi ngikaanyunak ngiarei kori kelalak. Nyechamitae ngesi eario erai ekaanyunan epei bon.

⁷ Ngikaanyunak kesi isiaunete kimasa itwaan ngini, ani erumor kimasa ngitunga luche. Kotere eger ngolo, ilemarete esi ngakiro naaronok nguna anikus.

⁸“Epedorete ngikesio ngiche agogongikin ngikatubok ngakiro lu iseut esi. Ngikesio ngulu kesi lu ikote akitiak ngiboro a ngitunga, ka eger lo ewanatar ngitunga, kori akitiak kerai akitu a itwaan na iyechakinitae kori na nyiyechakinitae. Ani kikokis ngakiro neni toloto ni echamakinit Ekapolon Akuj na erai Akuj kus ilipeenere,

⁹kisisaut ngakiro kus ani a ngimurok a Akuj alu eraakasi Ngilawi, ta ekatubon ngakiro lo esubi etich esaa ngolo, sodi kimiekis kesi totubo ngakiro.

¹⁰Etubete kesi ngakiro sodi tosuba esi ngakiro nakilimokinete kesi esi.

¹¹Tachamutu ngakiro na edungunete kesi alokies, sodi kiwapa ngakiro na elimunete kesi daang lokojokon.

¹²Itwaan cha daang ni nyiwapi ngakiro a ngikatubok ngakiro ka emuron lo esubi etich esaa ngolo, eario. Kotere eger ngolo, ilemarete ngakiro naaronok nguna anakwap a Ngisirael.

¹³Nakaneni iirarete ngitunga daang ngakiro nguna toema, toliwor emam itwaan nabo iyechakini tosubak ngakiro nugu.

¹⁴“Ani ilemarete esi akwap nakiinakini Ekapolon Akuj na erai Akuj kus, sodi toloma neni, itiakunete esi atamar kisaki ekapolon loger a ngibukui aluche kadaang.

¹⁵Toyena atamar esakitae esi iseunete itwaan ni aseu Ekapolon Akuj. Nyiitiliwosi itwaan a akwap anache ekapolon kus, ejoikinit erai itwaan nia akwap kus.

¹⁶Nyesakitae ekapolon eyakasi ngangolei a ngasigerea keng nakaalak, nabo nyesakitae ngesi emeari ngitunga Misiri akigiel ngangolei,[9] kainyo alimu Ekapolon Akuj atamar nyebongete ngitunga keng inaa nabo jik.

¹⁷Nyesakitae ekapolon eriki ngaberu nakaalak, kainyo ibatarete ngaberu ngesi ani a Ekapolon Akuj. Nabo nyesakitae ngesi ebari ngaropiyae ka egolit.

¹⁸Ani eliwor ngesi ekapolon, esakitae ngesi toting akitab na igiritae ngitalio a Akuj, lu elemunitae anakitab ana kolong a ekingaren a etal ana etingito ngimurok a Ngilawi.

¹⁹Esakitae ngesi iwaakini akitab ngina diyete, sodi kisoma ngirwa daang lu eyarea ngesi, kitatamar ngesi akiker Ekapolon Akuj ka akiwap ngakiro daang na edungunit ngesi anakitab.

²⁰ Iratakinete ngakiro nguna ekapolon ngolo nyiitam atamar ajok ngesi noi edwangit Ngisirael luche, nabo nyeenger ngitalio a Ekapolon Akuj. Ani kikok neni, epolokini ngesi akwap ngikaru lukaalak. Epolokinete ngesi ka ngalesea keng akwap a Ngisirael ngikaru lukaalak.