Read turkana Akitamunet a Etal 18 Bible Online

Akitamunet a Etal 18 - turkana bible

Akitamunet a Etal 18

¹“Emam ewae a akwap a Ngisirael na einakinio ekitela a Lawi, lo erai eka a ngimurok a Akuj, pearai esakitae kesi toyara a ngalemunet ka ngakipeyos nache na elamanakinio Ekapolon Akuj.

² Emam akwap eliwor akech loger a ngitela aluche. Ibore einakinitae kesi, ngesi aliwor ngimurok a Akuj loger lo kolong echikichikar Ekapolon Akuj.

³“Ani ipeyoo ngaatuk kori ngamesekin, esakitae ngimurok einakinio eseget, ka abokony, ta ngiboro a akook.

⁴Esakitae eanyunete ngalemet na ekingaren, ka emuna lo ekingaren, ka akimiet na ekingaren, ta ngajul a ngamesekin na ekingaren.

⁵Alotela kus kadaang, aseuni Ekapolon Akuj ngitunga a ekitela a Lawi tosuba etich keng, toliworos ngimurok keng jik.

⁶“Itwaan a Lawi ni eyei lore cha daang a akwap a Ngisirael, epedori erai kesaki, alosit ni echamakinitae ilipeenere,

⁷sodi tosub kaneni etich erai emuron a Ekapolon Akuj ana erai Akuj keng, loger a Ngilawi aluche alu esubete etich kaneni.

⁸Esakitae ngesi eriamuni akimuj na etia na einakinitae ngimurok luche, nabo epedori tani akitiliwor ibore ni einunete ngitunga a awi keng, ikeng.

⁹“Ani inangete esi nakwap nakiinakini Ekapolon Akuj na erai Akuj kus esi, nyiiwap ngakiro naaronok na esubete ngibukui lu eyakasi inaa.

¹⁰Nyiipeyoto ngide kus anakimea a ngikenoi kus. Warasi ngitunga kus nyeemuroto kori nyeedwar, kori nyiirakanasi ngitunga, kori

¹¹nyeesuba ngitunga luche. Warasi nyiiruor ka ngikaram.

¹²Eremokino Ekapolon Akuj na erai Akuj kus ngitunga lu esubete ngakiro naaronok nguna. Ngakiro nguna kesi etwarakinea Ekapolon Akuj ngibukui luche anakwap iloose esi ngaren.

¹³ Toliworos lu imunosi Ekapolon Akuj lokojokon noi.”

¹⁴Sodi tolim Musa tama, “Akwap na edikino esi ilemarete, iwapito ngitunga ngakiro a ngimurok todwarete, nakaneni nyesakit Ekapolon Akuj na erai Akuj kus esi tosuba ngakiro nguna.

¹⁵ “Nakaneni emeuni Ekapolon Akuj ekadwaran keng lo ikwaan ka ayong lo erai itwaan kus, nabo esakitae esi kiwapa ngakiro keng.[10]

¹⁶“Akolongit nakolong iriamitotor esi moru a Sinai, ipot esi tamasi nyisakete akiirar nabo etoil a Ekapolon Akuj iruoro kori tani nyisakete akingolikin akim nakariran ngina, kainyo iemito esi ibalasi kori itoakete.

¹⁷Abu Ekapolon Akuj katolimok ayong tama, ‘Alimut ngitunga lugu ngakiro na iyookino.

¹⁸Asekini ayong kesi ekadwaran lo ikwaan ka iyong, lo erai itwaan kech. Alimokini ayong ngesi ngakiro na elimuni, sodi tolimok ngesi[11] ngitunga ngakiro daang na adunguni ayong.

¹⁹Itwaan daang ni ewouni akiwap ngakiro na elimuni ekadwaran elimit ekiro kang, erirae ayong ngesi.

²⁰ Nakaneni ani kelimu ekadwaran ngakiro elimit ekiro kang toringa ayong nyelimokina ngesi, etoani ngesi kotere ngakiro nguna. Etoani tani ekadwaran daang lo iruoro elimit ngakujo nache.’

²¹“Ipedorete robo esi akingitakin atamar ‘Kikokini sua kiyeni ai atamar iruoro ekadwaran ngakiro na eponito ani a Ekapolon Akuj?’

²²Ani kelimu ekadwaran ngakiro elimit ekiro a Ekapolon Akuj, nyeesubakin ngakiro nguna, toyena atamar meere ngaka Ekapolon Akuj. Iruoro ekadwaran ngolo ngakiro na eraakasi ngakeng a ilope, nabo nyiikear ngesi.