Read turkana Akitamunet a Etal 19 Bible Online

Akitamunet a Etal 19 - turkana bible

Akitamunet a Etal 19

¹“Ani emunyari Ekapolon Akuj na erai Akuj kus ngitunga a akwap ana kiinakini ngesi esi, sodi tolemasi esi ngirerea kech ka ngakais toloma inaa,

²kitegeliasi ngirerea nguuni anakwap ana ilemarete esi.

³Tosubakisi ngirukudi a ngirerea kangulu, totiaka akwap ngina ngatiaket ngauni sodi toloseene itwaan ni earit niche todukea.

⁴Ani kear itwaan niche peiyechakinit, nyeerai itwaan ni eario ngini emoit keng, epedori ngesi alosit toduk alorerea kangulu.

⁵Ani a ekitetemes, eloose ngitunga ngiarei namoni akitub ngikito. Ani kikea ipei aep sodi toutun aep anakitoe topor taar itwaan niche, epedori ngesi amatar lore epei a ngirerea aluuni kangulu toyuun,

⁶sodi nyiiwapea ngesi itwaan ni esaki atachakin akitu a eyenet keng, todita ani elonia ere, taar ngesi ani engoitor noi tani pekesechit itwaan ngini, kainyo be peeyechakini bo ngesi dang akiar itwaan niche ni pearai emoit keng.

⁷Ngakiro nguna kesi abalar ayong esi kitegeliasi ngirerea nguuni.

⁸“Ani kiatak Ekapolon Akuj na erai Akuj kus akwap kus, loger lokolong alimokinitor ngesi taapaakus, sodi kiinak ngesi esi akwap daang, loger lokolong echikichikar ngesi,

⁹esakitae esi nabo iseunete ngirerea ngiche nguuni. (Kiinakini ngesi esi akwap ngina daang erai kiwap esi ngakiro daang nakadungokinit ayong esi akolongit naga, nabo tominakis Ekapolon Akuj na erai Akuj kus, kiwapa ngakiro na esaki ngesi.)

¹⁰Tosuba kona nyeetoaketa ngitunga lu nyesechito, nabo nyiiliworosi esi ngikasechak ani iareta kesi anakwap ana kiinakini Ekapolon Akuj esi.

¹¹“Nakaneni, ani kiyechak itwaan taar emoit keng, sodi tamatar ngesi akiduk alore a epei a ngirerea kangulu,

¹²esakitae ngikarikok a ere keng ebuarete ngesi, sodi kipotokis eyenet a itwaan ani earitae, lo erai ngesi etachakini akitu ngina, sodi taarae ngesi.

¹³Warasi nyikisien. Tolemasi ekaaran ngolo anakwap a Ngisirael, sodi tojokearotor ngakiro kus daang.

¹⁴ “Anakwap ana kiinakini esi Ekapolon Akuj, warasi nyiisiyotosi ibore ni igerokinitor ekidunyet kon ekukuor keng, nikolong ewaakinio a angorot.

¹⁵“Nyitemokino erai ekaanyunan epei ngesi idodiuni atamar esechit itwaan, pearai ngiarei epedorete akidodiun atamar esechit itwaan.

¹⁶Ani kesak itwaan ipei akititakin itwaan niche a eliit, kitingak ngakiro a alioko,

¹⁷eloose daang ni echamakinitae ilipeenere, ngaren ngimurok a Akuj ka ngikatubok ngakiro lu esubete etich esaa ngolo.

¹⁸Ingichingichete ngikatubok ngakiro a eriras kangolo lokojokon. Ani kititakinit itwaan ngini Esiraelit loche, kitingak ngakiro na eraakasi alioko,

¹⁹eriamuni ngesi eriras losek adikino lo irirakinitae eriamuni.

²⁰Nakaneni iirarete ngitunga daang ngakiro na asubakinosi sodi toema, nabo emam itwaan ebongokini akisub ngakiro naaronok nguna.

²¹ Warasi ngakiro na ikote nguna nyikisieneto esi. Tatachakisi akiyar nakiyar nache, akongu tatachakin nakongu nache, ekelae tatachakin lokelae loche, akan tatachakin nakan nache, akeju tatachakin nakeju nache.