Read turkana Akitamunet a Etal 2 Bible Online

Akitamunet a Etal 2 - turkana bible

Akitamunet a Etal 2

¹ “Kipot ekisidi atoreas atoloto nariet, kiwapit erot lo a apas a Akaba, loger lokolong kidungokinitor Ekapolon Akuj. Kipot erikasi ngirwa lukaalak kiwowoot anakwap ana a ngimukur a Edom.

²“Sodi katolimok Ekapolon Akuj ayong

³atamar, atoloto lowae lo alokwap kainyo kirika ngoni ngirwa lukaalak kiwowoot alomukur kangulu.

⁴Katolimok ngesi ayong atamar kechikichik esi kona, ‘Anang esi ni itorioto nakwap na a ngimukur a Edom, nakwap a ngiyenet kus alu eraakasi ngalesea a Esau. Kiemete kesi esi,

⁵nakaneni nyiisiakis ejie ka kesi kainyo nyakainakini ayong esi akwap kech tani wadiochichi. Ainak ayong ngalesea a Esau akwap a Edom.

⁶ Ipedorete esi akigiel akimuj ka ngakipi anikech.’

⁷“Kitamutu eger lo kipiarea Ekapolon Akuj na erai Akuj kus esi anakiro kadaang ana isuba esi. Kiyoki ngesi esi na ilatotor anariet kana. Iruko esi ka ngesi alokaru alutomwon-omwon, nabo iriamut esi ibore daang ni isakete.

⁸“Sodi atotena ngaren atodepasi erot lo eteni lorerea a Elas ka Esionigeber tanang nanam a Amakat. Sodi atoreas atoloto lowae lo a kwap akide atoloto Moab.

⁹ Katolimok Ekapolon Akuj ayong tama, ‘Nyiichan ngitunga a Moab lu eraakasi ngalesea a Loti, kori nyiitijikis kesi. Ainak ayong kesi ere a Ari, nabo emam akwap kech nakainakini ayong esi.’ ” (

¹⁰Alomito ngitunga lulangir-kooyak noi anyaritae Ngiemim neni. Alalak kesi noi nabo ajwoko. Aoyak kesi ekwaan ka Ngianak, lu araakasi ngibukui ngiche lulangir-kooyak noi.

¹¹Anyaritae kesi dang Ngirepai loger a Ngianak, nakaneni anyarito Ngimoab kesi Ngiemim.

¹²Alomito sek Ngiori Edom, nakaneni apot ngalesea a Esau kiritasi kesi, tomunyasi kesi. Sodi toloma kesi neni loger lo etwarakineta Ngisirael ngimoe kech ekisidi anakwap ana ainakini Ekapolon Akuj kesi.)

¹³“Sodi atodokasi ekwakaye angolol a Sered loger lo kolong kilimokinitor Ekapolon Akuj.

¹⁴Araakasi ngikaru ngulu ngitomwon-uni ka ngikan-kauni napei kolong kirotokinio ngoni alo Kadech Barinea. Ngikiliok daang lukajwok a ngirwa kangulu atoakito loger lokolong alimunitor Ekapolon Akuj.

¹⁵ Abu Ekapolon Akuj tonger kesi tanang emunyari daang.

¹⁶“Ani etoakete daang,

¹⁷kitolimok Ekapolon Akuj ngoni tama,

¹⁸‘Ejoikinit esi itorete nakwap a Moab, a erot alo itori Ari.

¹⁹ Ipete esi diyete akwap a Ngiamon alu eraakasi ngalesea a Loti. Nyiichan kori nyiitijwoto kesi kainyo emam akwap na ainak ayong kesi nakainakini ayong esi.’ ” (

²⁰Enyaritae akwap naga akwap a Ngirepai, erai ekiro ngolo eka ngitunga alu kolong alomito neni. Anyarito Ngiamon kesi Ngisamusumim.

²¹Alangir kesi tooyak noi ekwaan ka Ngianak. Alalak kesi, nabo ajwoko. Abu Ekapolon Akuj tomunya kesi, sodi tolemasi Ngiamon akwap kech toloma.

²²Asubitor sek Ekapolon Akuj napei kiro nguna Ngiedomae lu araakasi ngalesea a Esau, lu elomito nakwap a ngimukur a Edom. Abu tomunya Ngiori sodi tolemasi Ngiedomae akwap toloma, eringa tokona kesi elomito neni.

²³Ngitunga a ekwar alo elukakina nanam enyaritae Kirete, kesi aloma lokwaas a anam a Mediterenian. Apot kesi tomunyasi Ngiapim lusek alomito neni, sodi tolemasi akwap kech daang tanang lore a Gasa lo eyei lowae lo alokuju.)

²⁴“Nakitorio ngoni Moab abu Ekapolon Akuj kitolimok ngoni tama, ‘Kapesi tokona todokasi ekwakaye angolol a Arinon. Ewaak ayong Sion lo erai ekapolon a ere a Echibon, lo erai Eamorit, nakan kus, aapei ka akwap keng. Kitijikisi ngesi sodi tolemasi akwap keng toloma.

²⁵Napei tokona jik, ewaakini ayong ebuloi lotunga awadaang, kotere esi. Eemi itwaan daang tamaranik napei iirarea esi kilimitoe.’

²⁶“Sodi atomea ayong ngitunga anariet a Kedemos toloto lokapolon enyaritae Sion lo a ere a Echibon, toloto alimor akiroit nakisilet ebalasi,

²⁷‘kimiekinae sua etoro nakwap kon. Kipori sua jik ewapa erot nakaneni nyikitubor.

²⁸Kitachi sua akimuj na kinyami ka ngakipi na kimasi. Ibore daang ni kisaki ngesi akitor nakwap kon,

²⁹tanang kidokari ekwakaye angolol a Yorudan atolomasi nakwap nakiinakinit sua Ekapolon Akuj na erai Akuj kosi. Kichamakinete sua ngalesea a Esau lu alomito Edom, ka Ngimoab lu alomito Ari, kitachamakis kitori nakwap kech.’

³⁰“Nakaneni, towou Sion achamakin ngoni kitori nakwap keng. Abu Ekapolon Akuj na erai Akuj kus kitininik etau keng toliwor ngesi lokechanan, atolemareta akwap keng, na tokona eringa kilomit.

³¹“Abu Ekapolon Akuj katolimok ayong tama, ‘Kingolik a, tolemasi tokona ekapolon Sion ka akwap keng kainak esi, tolemasi tokona akwap keng toloma.’

³²Pot Sion ka ngitunga keng akitijwore ngoni alodiyete ere a Yaasa,

³³nakaneni abu Ekapolon Akuj na erai Akuj yok kiwaak ngesi nakan yok, ataara ngoni ngesi ka talokookeng, ta ngitunga keng daang.

³⁴Kipot nabo atoremo ka akinyasun ngirerea daang, ataara ngitunga daang, ngikiliok ka ngaberu ta ngide. Emam itwaan kiisik ngoni eyari.

³⁵Atolemasi ngaatuk kech ka alemar ngiboro alorerea.

³⁶Abu Ekapolon Akuj na erai Akuj yok kimiek ngoni atolemasi ngirerea daang napei ani eyei lo enyaritae Aroer, lo eyei lokeli a adipo a Arinon, ka ere lo alokiding adipo ngina, kinapar jik tanang Gilead. Emam ere lo abu awas keng togogonger kipiyo ngoni.

³⁷Nakaneni nyeloto ngoni diyete akwap a Ngiamon kori lokwaasea a angolol a Yabok, kori lorerea a akwap a ngimukur, kori wache ni aringa Ekapolon Akuj na erai Akuj yok nyelimokina ngoni atamar atoloto.