Read turkana Akitamunet a Etal 20 Bible Online

Akitamunet a Etal 20 - turkana bible

Akitamunet a Etal 20

¹“Nyieam robo na ilooso akirem ngimoe kus, sodi kingolikis ngaurukukui ka ngangolei, ka ngasigerea kech nakaalak idwangito nakus. Irukete esi ka Ekapolon Akuj na erai Akuj kus nakolong kiyuuni esi alo Misiri.

²Ani eringa esi nyisiakina ejie, ebuni emuron a Akuj tolimok ngasigerea tama,

³‘Topupokisi Ngisirael! Iloose esi akolongit naga ejie. Nyieam ngimoe kus kori nyiimaranikis, kori warasi nyikibul.

⁴Irukorete esi ka Ekapolon Akuj na erai Akuj kus, nabo kisidwangi ngesi esi ngimoe kus.’

⁵“Nakaneni elimokinete ngikaweikinak ngitunga tamasi, ‘Eyei nege itwaan ni aduk akai nakaneni eringa nyitaleuno a? Ani keyei, echamit ebongi nawi, nyearakin lojie, sodi tolema itwaan iche akai kitaleu.

⁶Eyei nege itwaan itakinit amana a emusabib nakaneni nyelema ngesi ageor a? Ani keyei, echamit ebongi nawi, nyearakin lojie, sodi tamat itwaan iche emuna keng.

⁷Eyei nege itwaan enyounit akuuta a? Ani keyei, echamit ebongi nawi, nyearakin lojie, sodi kuut ekile eche apese na enerit ngesi.’

⁸“Elimokinete nabo ngikaweikinak ngitunga tamasi, ‘Eyei nege itwaan ni ebulit emarani a? Ani keyei, echamit ebongi nawi.’

⁹Ani erumorete ngikaweikinak akisuruor ngasigerea, eseunio ngikarikok a ngitunga.

¹⁰“Ani iloose akirem ere, taanyutu mono kesakete ngitunga a ere kangolo ekisil kori kemam.

¹¹Ani kengaasi kesi ngidorin tasaka ekisil, eliworosi kesi daang ngikedalak kus sodi kidesikinae akisub etich.

¹²Nakaneni ani pekesakete ngitunga a ere kangolo ekisil, tasaka ejie, kirikautu ere ngolo a ngasigerea kus.

¹³Ani kiinak esi Ekapolon Akuj na erai Akuj kus ere ngolo, taara ngikiliok daang kaneni.

¹⁴Nakaneni ipedorete esi alemar ngaberu, ka ngide, ka ngibaren, ta ibore daang ni eyei lore ngolo, kitiliwosi ngikus. Ipedorete alemar ibore daang ni erai ika ngimoe kus. Kiinak Ekapolon Akuj esi.

¹⁵Tosubeta ngakiro nguna ngirerea daang lu eloka anakwap ana moi ilomete esi.

¹⁶“Nakaneni ani ilemarete esi ngirerea a akwap ana kiinakini esi Ekapolon Akuj na erai Akuj kus, taara ngitunga daang.

¹⁷Tomunyasi ngitunga daang pil. Tomunyasi Ngiiti, ka Ngiamor, ka Ngikanaan, ka Ngiperes, ka Ngiipi, ta Ngiebus, loger lokolong kidungokinitor esi Ekapolon Akuj.

¹⁸Taara kesi sodi nyikitiliwosi esi ngikasechak ani a Ekapolon Akuj nabo nyikitatam esi akisub ngakiro naaronok daang na esubete kesi ilipito ngakujo kech.

¹⁹“Ani iriamete esi ere isakete alemar, nyiitubo ngikito a ageor tani kelalaketa ngirwa lu ijioto esi kaneni. Tanyama ageor, nakaneni nyiinyasut ngikito kainyo meere ngikito ngimoe kus.

²⁰Ipedorete esi akitub ngikito luche lu nyenyamio todukioto ngachukulei na iduketa ijiete tanang ni ilemareta ere.