Read turkana Akitamunet a Etal 21 Bible Online

Akitamunet a Etal 21 - turkana bible

Akitamunet a Etal 21

¹“Ani bo keriamun itwaan etoanit anakwap ana kiinakini esi Ekapolon Akuj na erai Akuj kus, nabo nyiiyenete esi itwaan ni aari ngesi.

²Esakitae ngikarikok kus ka ngikatubok ngakiro itemete alonis ani earakinitae itwaan ka ngirerea lu eapiyete kaneni.

³Nakaneni eseunete ngikarikok a ere alo eapi ani earakinitae itwaan ataok nasek nyitusubitae etich a ache.

⁴Erikorete kesi ataok ngina nadipo ni eyei elelea lo nyeoneene, tarai nabo ni nyechilitae ngamanat, kori nyitatae, sodi tobila eluute kaneni.

⁵Eloose tani ngimurok lua ekitela a Lawi inaa, kainyo kesi etubete eriras daang lu ewanatar ngitunga. Aseu kesi Ekapolon Akuj na erai Akuj kus tosuba etich keng ka apiar ngitunga elimito ekiro keng.

⁶Nakaneni ilotarete ngikarikok daang a ere alo earakinitae itwaan, ngakan kech alokidiama itaok

⁷ebalasi, ‘Nyeara sua itwaan en, nabo nyikiyeni sua itwaan ni aari.

⁸Ekapolon Akuj, torimak ngitunga kon Ngisirael, lukolong iyuuni iyong alo Misiri. Torimakinae sua, nabo wara nyikipaik sua akitu a itwaan ani nyesechit.’

⁹Aloger kangolo, kisuba esi ngakiro na esaki Ekapolon Akuj, nyikipaikinio esi akitu ngina.

¹⁰“Nakisidwangea esi Ekapolon Akuj na erai Akuj kus ngimoe alojie sodi kirumut esi ngimoe kus ngiche toriko,

¹¹ipedori iyong kingolik aberu nakebusean iyong tasak akiut.

¹²Toriko ngesi nawi kon sodi tabanya akou[12] keng, ka akitub ngimaagor keng,

¹³ta akilokony ngiworui keng. Esakitae ngesi kiboikin nawi kon sodi kialolong kotere akitu a ngikauriak keng a elap a epei, ani erumor, kiuut iyong ngesi.

¹⁴Ani kinger iyong ngesi ekisidi, kimiek tolot nyetacha ibore idio, kainyo itingakini kolong iyong ngesi akiper ka iyong. Nyipedori iyong togiela ngesi loger a akedalan.

¹⁵“Ani bo keya ngaberu ngaarei sodi kidout daang ngide lusapa, nakaneni tarai edia lo a ekingaren meere eka aberu ana emina ekile.

¹⁶Ani etiakakini itwaan ngini ngide keng ngiboro keng, nyesakitae ngesi ipakuni edia a aberu ana emina ngesi sodi nak ibore a edia aloapolon.

¹⁷Esakitae ngesi nak edia lo a ekingaren ngiboro keng ngainakinet ngaarei akidwang luche, tani pekerai edia ngolo lokookeng a aberu ana emina ngesi. Ejoikinit itwaan esubi kona sek esubere edia lo a ekingaren, sodi nak ibore ni echamit einakinio.

¹⁸“Ani bo keyei itwaan edia lokechanan, nyeepupi ngakiro tarai nabo lo nyiwapit ngakiro a ngikauriak keng tani kides.

¹⁹Esakitae ngikauriak keng torikosi ngesi lokarikok a ere alo elomit ngesi.

²⁰Elimokinete ngikauriak ngikarikok ngulu tamasi, ‘Ichanana edia kosi, nyepupi ngakiro, nabo nyiwapit ngakiro kosi. Eboliar ngesi ngaropiyae, nabo ematana epurot.’

²¹Nakaneni imasete ngesi ngikiliok a ere kangolo a ngamoru taara, sodi tolemasi ngakiro naaronok nguna anikus. Iirarete ngitunga daang anakwap a Ngisirael ngakiro nguna asubasi, sodi toema.

²²“Ani kesech itwaan sodi taarae kinenekinoe napir,

²³ nyeeper akwaan keng neni kiwalak. Echamit enukio ngesi akolongit napei ngina, kainyo eyauni akwaan a itwaan na ineno anapir ngilam a Akuj nakwap. Tonuka akwaan sodi nyiinyasut esi akwap nakiinakini esi Ekapolon Akuj na erai Akuj kus.