Read turkana Akitamunet a Etal 22 Bible Online

Akitamunet a Etal 22 - turkana bible

Akitamunet a Etal 22

¹“Ani kingolik iyong aite kori amesek a Esiraelit aloche echakara, wara nyiisik ewoliyori, tarama tobuak ilope.

²Nakaneni ani kelona ni elomit ilope, kori pekiyeni iyong ilope, tarama nawi kon. Ani kebu ilope esaki, nak.

³Tosub ngakiro napei nguna erai kiriam esikiria, kori awaru, kori ibore a Esiraelit aloche ni echakara daang.

⁴ “Ani kibusokin esikiria a Esiraelit aloche, nyiisik kongina, kingarak ilope akitonyoun ibarasit ngini.

⁵“Nyeenap ngaberu ngiworui a ngikiliok, nabo nyeenap ngikiliok ngiworui a ngaberu. Eremokino Ekapolon Akuj na erai Akuj kus ngitunga lu esubete ngakiro nguna.

⁶“Ani kiriamu iyong akai a ikeny alokitoe, kori analup eurenea ikeny ngabeyei kori ngitak keng, wara nyiilema ikeny ni eurit ngini.

⁷Ipedori iyong alemar ngitak, nakaneni tochoite ilemari itiokech, sodi kibooyo iyong nikooyen kipiaritae.

⁸“Ani iduki akai nakitetet, kiriwok ngakito lokwaasea a ewae alo alokidiama, sodi nyikipaikin iyong, erai kechakun itwaan alokidiama totoan.

⁹“Nyiitak ekitoe eche mana na itakinit iyong emusabib. Ani kitak, kitengeritoe iyong akinyam ngamusabib, ka ageor a ekitoe aloche kangolo.

¹⁰“Nyiien emong ka esikiria aapei isaki tochila amana.

¹¹ “Nyiinap ngiworui lu edonyunitoe anajul ka ngawarui aapei.

¹²“Todonyokisi ngawarui na isanasanasi lowaitin luomwon a ngiworui kus.

¹³“Epedori itwaan kiut apese ani ekisidi tasak akinger ngesi.

¹⁴Ani erumor kitingak ngesi aberu ngina atamar eperito sek ka ekile eche eringa kesi nyiriamuna.

¹⁵Ani kesubakin ngakiro nguna, elemunete ngikauriak a aberu kangina eworu lodapal lokolong aperioto ekile ngolo ka aberu keng na eutatar. Eyaarete kesi eworu lodapal eyakasi ngakemera a ngaakot nitubet ngakiro kidodikis ngikarikok a ere. Idodiuni eworu lodapal ngolo atamar nyepero ngesi ka ekile a ache.

¹⁶Elimokini apakeng a aberu kangina kesi tama, ‘Ainakini kolong ayong ekile logo nakookang kiut, nakaneni anger tokona ngesi.

¹⁷Etingak ngesi nakookang atamar eperito kolong sek ka ekile eche eringa nyiriamuna ka ngesi. Nakaneni ibore en ngesi idodiunit atamar eringa nakookang nyepero ka ekile eche. Kingolikisi ngaakot na eyakasi loworu logo lokolong aperioto kesi akwaar na akuuta!’

¹⁸Nakaneni erikorete ngikarikok a ere ekile ngolo kideta ngesi.

¹⁹Kitelemunae nabo ngaropiyae amiat apei nakinae apakeng a aberu kangina, kainyo ayau ekile ngolo ngileech napese na erai Asiraelit. Nabo eliwor aberu ngina akeng jik, nyelaki ngesi jik ngirwa daang lu eyarea ngesi.

²⁰“Nakaneni ani kerai ngakiro a ekile iteni, nabo tamam ibore ni idodiunit atamar peaperito aberu ngina ka ekile sek,

²¹erikorio aberu ngina tanang nakituk a akai a apakeng, ani enangi neni, kimasa ngikiliok a ere kangolo ngesi a ngamoru totoan. Asub ngesi ngakiro na a ngileech alotunga yok ani aperioto ka ekile eringa ngesi nyiuta, ngirwa lu aringaakar eyei nawi ka apakeng. Kotere eger ngolo, ilemarete esi ngakiro naaronok nguna.

²²“Ani keriamun ekile eperete ka aberu a ekile aloche, eario kesi daang. Kotere eger ngolo, ilemarete esi ngakiro naaronok nguna.

²³“Ani keriamun ekile alore eperete ka apese na enerit ekile loche,

²⁴kipudosi kesi alore sodi kimasa a ngamoru totoan. Echamit apese dang etoani kainyo nyiremara ngesi esaki atamar katoyuun, tarai ayei lore ni adikino ngitunga luche iirareta ngesi irema. Nabo echamit ekile etoani kainyo aperete ngesi ka apese na eneritoe. Kotere eger ngolo, ilemarete esi ngakiro naaronok nguna.

²⁵“Ani ketikoono ekile apese na eneritoe alomoding, ekile bon echamit etoani.

²⁶Emam ibore esubakinere apese, kainyo nyesuba ngesi akisech na echamit earere. Ikwaan ngakiro nguna ka na a itwaan ani enyoikini niche kitoji sodi taar.

²⁷Atikoonori ekile apese na aneritoe, ani tani na eremarea apese ngina esaki ayuuno, tongop itwaan eyuuni ngesi.

²⁸“Ani ketikoono ekile apese na nyeneritoe,

²⁹ echamit ngesi elemikini apakeng a apese ngaropiyae ngatomwon-kan na iutar, toliwor apese ngina aberu keng, kainyo etingakini ngesi apese ngina akiper ka ngesi. Nyeringa nabo ngesi elaki aberu ngina jik ngirwa daang lu eyarea ngesi.

³⁰“Nyeepero itwaan ka aberu a apakeng, kainyo eyauni ibore ngini ngileech nika apakeng.