Read turkana Akitamunet a Etal 24 Bible Online

Akitamunet a Etal 24 - turkana bible

Akitamunet a Etal 24

¹“Ani kiut itwaan aberu, sodi ekisidi tonger ani eyakatar ngakiro na akadakis anikeng,[13] ejoikinit ngesi igiri abarua a elakit nak aberu ngina, sodi kitwarak anawi keng.

²Ani kiut ekile eche aberu ngina,

³sodi tonger nabo ngolo dang, igirakini ekile ngolo aberu ngina abarua a elakit sodi kitwarak anawi keng. Kori epedori ta ekile lo a ekisidi ngolo totoan.

⁴ Tani kikokis neni, nyiutasi nabo aberu ngina ka ekile lo a ekingaren jik, kainyo enyasun aberu ngina. Eronikinete Ekapolon Akuj ngakiro nguna erai kuut nabo ekile ngolo aberu ngina. Tochoite isubakini akisech naaronon ikoni ngina anakwap ana kiinakini iyong Ekapolon Akuj na erai Akuj kus.

⁵“Ekile lo erai akiutar ngina, echamit peiwaakinio lotich a ngasigerea kori loche daang. Echamit imiekinio ngesi emam etich ekaru epei sodi kiboikinor nawi kitalaka aberu keng.[14]

⁶“Ani iinakini iyong itwaan ibore taar amicha, nyiilem akiries keng toliwor ikachakinit iyong kidarea amicha etachio, kainyo ikoni ibore ngini alemar ibore ni imujeta ngitunga a awi kangina eyaritotor.

⁷ “Itwaan cha daang ni idaari Esiraelit loche kitiliwo ekedalan keng, kori togielak ngitunga luche toliwor ekedalan kech, echamit itwaan ngini eario. Kotere eger ngolo, ilemarete esi ngakiro naaronok nguna.

⁸“Ani kidekakin iyong enomokere, kirichak lokojokon ngakiro nakilimokinete iyong ngimurok a ekitela a Lawi atamar tosub. Kiwapa ngakiro na echikichikak ayong kesi.

⁹ Kitamutu ngakiro na asubea Ekapolon Akuj na erai Akuj kus Miriam na irotokinioto esi alo Misiri.

¹⁰“Ani iinakini iyong itwaan ibore taar amicha, nyiiloma kai keng tolemu eworu lo esaki ngesi ainakin iyong kidarea amicha etachio.

¹¹Kidaru anikalapatan sodi yau ngesi ilope nikon.

¹²Ani kiboosit ngesi, nyiiteper eworu ngolo nawi kon.

¹³ Kinyiakanak ngesi atabong daang kimukokin. Nakaneni elakar ngesi, sodi tojoikis Ekapolon Akuj na erai Akuj kus ngakiro kon.

¹⁴“Nyiiboliar ekedalan lo iboosit kichana, kerai ngesi Esiraelit kori itwaan a akwap anache ni elomit lore epei a ngirerea kus.

¹⁵ Tatachak ngesi ngaropiyae a etich a akolongit kangina eringa akolong nyedooyoro, kainyo esaki ngesi ngaropiyae nguna, nabo iitanit atamar kainakin. Ani pekitach iyong ngesi ikaloikini ngesi Ekapolon Akuj kotere iyong, sodi toliwor iyong isechit.

¹⁶“Nyechamit ngikauriak eario kotere ngisech a ngide kech, nabo nyechamit ngide eario kotere ngisech a ngikauriak kech. Echamit itwaan eario kotere akisech na esubi ngesi ilope bon.

¹⁷“Nyiiboliar ngitunga a ngakwapea anache ka ngikokiok. Nyiilema eworu a apuserut kikachak kidarea amicha kon etachio.

¹⁸ Kitam atamar irai kolong iyong ekedalan alo Misiri sodi kitoyuu Ekapolon Akuj na erai Akuj kus. Ngakiro nguna kesi kadungokinitor ayong esi etal logo.

¹⁹“Ani ilemi iyong amana kon sodi kimuriakis ngalemet ngache alomana, nyiibongo ayaun. Kimiekinea nguna ngitunga a ngakwapea anache, ka ngikokiok, ta ngapuseru, sodi kitopiarea Ekapolon Akuj na erai Akuj kus anakiro kadaang ana isubi.

²⁰Ani igeri iyong ageor a ngikito a akimiet ageriet apei, nyiibongo nabo akidepun na idongito. Eraakasi nguna ngaka ngitunga a ngakwapea anache, ka ngikokiok, ta ngapuseru.

²¹Ani ichunakini iyong ngamusabib kon achunakinet apei, nyiibongo nabo kidep na idongito. Eraakasi nguna ngaka ngitunga a ngakwapea anache, ka ngikokiok, ta ngapuseru.

²² Kitamu atamar irai kolong iyong ekedalan alo Misiri. Ngakiro nguna kesi kadungokinitor ayong iyong etal ngolo.