Read turkana Akitamunet a Etal 25 Bible Online

Akitamunet a Etal 25 - turkana bible

Akitamunet a Etal 25

¹“Ani kelot Ngisirael ngiarei nitubet ngakiro, sodi tamarae esechit epei, nyeesechite loche.

²Ani ketubun atamar idesio itwaan nikasechan, esakitae itwaan nikatubon ngakiro elimokini ngesi atamar toper a akook sodi kidetae. Itemio ngaramet ka akisech na esubit ngesi.

³ Epedorio akidet ngesi ngakideset ngatomwon-omwon, nakaneni nyiisiporosi neni kainyo ani kisiporor, irumete ngesi ngileech alotunga aluche.

⁴“Nyiitenger emong adaka esaa lo isipudaare ngalemet.

⁵“Ngikaitotoi lu erukito aapei, na etoanea epei nyeuriuna ikoku nisapat, nyesakitae aberu keng irumete ngitunga lugelayek. Ejoikinit erai lokaatokeng a ekile keng ngesi irumi.

⁶Ikoku nisapat ni ekingaren ni euriunete kesi, eliwor ika ekile alokatoan, sodi nyeengopiarea ekiro keng anakwap a Ngisirael.

⁷Ani kewou lokaatokeng a ekile alokatoan kangolo akirum aberu ngina, esakitae aberu tolot lokarikok a ere tama, ‘Awou lokaatokeng alokile kang akisub etich keng. Awou ngesi auriun ikoku a lokaatokeng min nakwap a Ngisirael.’

⁸Nakaneni enyaraunete ngikarikok a ere ekile ngolo kisuruoro. Ani keringa engerit akiut aberu ngina,

⁹esakitae apuserut ngina elosi lokile ngolo iteete ngikarikok a ere, sodi tobut amukat a ekile apei, ani erumor kimoak loreet tama, ‘Ngakiro na ikote nugu asubakinosi alokile alo awouni auriun ikoku a lokaatokeng.’

¹⁰Eyenikinio awi a itwaan kangini alo Isirael tamarae, ‘Awi a ekile alo kolong abutunio amukat.’

¹¹“Ani kejikin ngikiliok ngiarei, sodi tasak aberu a epei aikin lokilekeng, toruakin nia auri a ekile aloche,

¹²wara nyikisien, totubo akan keng.

¹³“Nyiingala ngitunga kiwaak ibore niapotion ka nikaabenan lochue kon.

¹⁴Nyiingala ngitunga nabo kiwaak ibore nikitemiet niichi ka niapolon kai kon.

¹⁵Echamit ngiboro kus lu itemieto esi apotis ka aoyau eraakasi lua iteni, lu eriyan, sodi kiboikinotor esi nikooyen anakwap ana kiinakini esi Ekapolon Akuj na erai Akuj kus.

¹⁶ Eremokino Ekapolon Akuj ngitunga lu ingalaate.

¹⁷“Kitamutu ngakiro nakolong kisubeta esi Ngiamalek na iponeta esi alo Misiri.

¹⁸Peakerito kesi Akuj, kotere ngakiro nguna, apot kesi kitijikis esi anaabor nakiburunitor esi kiloite. Apot kesi taara ngitunga lu esidiyete.

¹⁹ Tokona bocha, ani kiinak esi Ekapolon Akuj na erai Akuj kus akwap, nabo kitee esi alomoe kus kadaang alu idunyasi ka esi, taara Ngiamalek daang, sodi nyiitamun kesi nabo. Warasi ngakiro nguna nyikimuriakis esi!