Read turkana Akitamunet a Etal 26 Bible Online

Akitamunet a Etal 26 - turkana bible

Akitamunet a Etal 26

¹“Ani ilomarete nakwap nakiinakini esi Ekapolon Akuj na erai Akuj kus, sodi toloma inaa,

²esakitae ipei kus daang edekuni akikap apei a ngalemet ana ekingaren yaa ni echamakinitae ilipeenere.

³ Tolot lomuron lo eweikinit neni esaa ngolo tolimok ngesi tama, ‘Asaki tokona ayong akitaanyun Ekapolon Akuj na erai Akuj kang atamar anangu ayong nakwap nakolong echikakini ngesi taapaayok atamar kiinakini ngoni.’

⁴“Elemari emuron ngolo akikap ngina anikon, sodi kiwaak ngaren ekeno a ngakipeyos a Ekapolon Akuj ana erai Akuj kon.

⁵Sodi tolim iyong ngakiro nugu alongaren Ekapolon Akuj tama, ‘Arai kolong apaakang Earamit lo awoowoot amam awi, toriko ngesi ngitunga a awi keng toloma Misiri. Akidioko kolong kesi eloose inaa, nakaneni apot kesi talalaketa nabo toliworos ngitunga lukajwok.

⁶Apot Ngimisiri kitoboliatar sua, kidesikis sua akisub etich atoliworos ngikedalak.

⁷Sodi ekaloikisi sua Ekapolon Akuj, na erai Akuj kata apaakosi, kisaki kingarak. Abu ngesi kiira ngakiro kosi, sodi kingolik aboliaro kosi, ka ngichan, ta ariaba.

⁸Abu ngesi kitoyuu sua alo Misiri a agogongu keng anaationon. Tosub ngesi ngakitoodikinet nakailiilok ka nakatalarak.

⁹Kiyau ngesi sua nege kiinak akwap na ileleba ngakile ka akimiet a ao.

¹⁰Kotere ngakiro nguna, ainunit tokona ayong Ekapolon Akuj ngalemet na ekingaren a ngalemet ana kainaki ngesi ayong.’ “Ani kilimu iyong kongina kerumor, kiwaak akikap kwap ngaren Ekapolon Akuj, kilip kaneni.

¹¹ Talakar kotere ngiboro luajokak lu kiinak Ekapolon Akuj na erai Akuj kon iyong ka ngitunga a awi kon. Kimiek ngimurok a Akuj ka ngitunga a akwap anache lu irukito ka esi kaneni, kimorikinos ka esi talakaros.

¹²“Adaunet a ngikaru a nguuni daang, tolem alemunet apei anatomon analemet kon, nak Ngilawi, ka ngitunga a ngakwapea anache, ka ngikokiok, ta ngapuseru, sodi taanyuneta ngitunga ngulu daang ibore ninyamat kimwoko. Ani kisubak iyong kongina,

¹³tolimok Ekapolon Akuj tama, ‘Emam alemunet apei anatomon na edong nawi kang. Alemu ayong ainak Ngilawi, ka ngitunga a ngakwapea anache, ka ngikokiok, ta ngapuseru loger lokolong kidungokinea iyong ayong. Emam etal loa alemunet a apei anatomon, lo nyiwapa ayong kori emam lokemuriak.

¹⁴Nyenyama ayong epewae a alemunet a apei anatomon na egoror, kori nyipudoro ayong epewae nikalapatan a akai kang peetaleuno, kori nyelemuna ayong epewae etiliwo ngakipeyos a ngikatoak.[15] Ewap ayong ngakiro kon Ekapolon Akuj asub daang nakolong kidungokini iyong ayong kotere alemunet apei anatomon.

¹⁵Tokienyu ani italeuno iyei iyong anadis sodi topia Ngisirael lu eraakasi ngitunga kon. Topia tani akwap na ileleba ngakile ka akimiet a ao nakiinak iyong sua, loger lo kolong ichikakinea iyong taapaakosi.’

¹⁶“Kidungok esi Ekapolon Akuj na erai Akuj kus akolongit naga atamar kiwapa ngitalio keng daang. Kiwapa dir a ngitai kus kadaang ka akiyar kus daang.

¹⁷Ilimosi akolongit naga atamar Ekapolon Akuj erai Akuj kus. Ilimut esi atamar iwapete ngakiro keng, kirichakis ngitalio keng, nabo tosuba daang nakidungokini ngesi esi.

¹⁸Kicham Ekapolon Akuj esi akolongit naga iliworosi ngitunga keng loger lokolong kichikakinea ngesi esi. Nabo kidungok ngesi esi atamar kirichakisi ngitalio keng daang.

¹⁹ Kitiliwori ngesi esi lu kiyenikinitae noi kidwanga ngibukui luche daang lukolong asubi ngesi, sodi kipuruut esi ngesi tokera.[16] Iliworosi esi ngitunga keng a ilope loger lokolong kichikakinitor ngesi esi.”