Read turkana Akitamunet a Etal 27 Bible Online

Akitamunet a Etal 27 - turkana bible

Akitamunet a Etal 27

¹Apot Musa ka ngikarikok a Ngisirael tolimokis ngitunga tamasi, “Kiwapa ngitalio daang lukadungokini ayong esi akolongit naga.

²Akolongit na idokareta esi ekwakaye angolol a Yorudan, tolomasi nakwap nakiinakini esi Ekapolon Akuj na erai Akuj kus, esakitae esi kitowaa ngamoru naapolok kipuchakis echoto.

³Sodi kigirakis ngitalio ka ngakitatamet nugu daang. Ani ilomarete esi nakwap na ileleba ngakile ka akimiet a ao ngina, akwap nakolong kichikakini Ekapolon Akuj na erai Akuj kata apaakus atamar kiinakini esi,

⁴toekasi esi ekwakaye Yorudan, kitowaa ngamoru nugu alomoru a Ebal, kilalakis echoto, loger lokalimokinitor ayong esi akolongit naga.

⁵Tosubakisi kaneni ekeno a ngakipeyos a ngamoru ana nyimorikinitae ka ngasua,

⁶kainyo esakitae ekeno lo idukokinete esi Ekapolon Akuj na erai Akuj kus esubunitae a ngamoru ana nyetubitoe. Neni ngesi esakitere esi kipeyoto ngakipeyos na inomio.

⁷Kipeyoto kaneni sodi tanyama ngakipeyos kus na ekisil, talakaros alongaren Ekapolon Akuj ana erai Akuj kus.

⁸ Kigira ngakiro daang a etal a Akuj ilereete kidiama namoru na ilalatae a echoto nguna.”

⁹Abu Musa imorikina aapei ka ngimurok a Akuj tolimok Ngisirael daang tama, “Topupokisi Ngisirael, kiirasi ngakiro kang. Iliworosi esi akolongit naga ngitunga a Ekapolon Akuj ana erai Akuj kus.

¹⁰Kiwapa ngakiro keng sodi kirichakis ngitalio keng daang lukadungok ayong esi akolongit naga.”

¹¹Sodi tolimok Musa Ngisirael tama,

¹²“Ani idokarete esi ekwakaye Yorudan, ngitela lugu kesi ewaasi alomoru a Gerisim na epiarere ngitunga. Ewaasi ngitunga a ekitela a Simeon, ka Lawi, ka Yuda, ka Isakar, ka Yosep, ta Benjamen.

¹³Ani na ilamere ngitunga, ewaasi ngitela lugu alomoru a Ebal. Ewaasi ngitunga a ekitela a Reuben, ka Gad, ka Acher, ka Sebulun, ka Dan, ta Naputal.

¹⁴ Esakitae Ngilawi tolimut ngakiro nugu ikeunito ebalasi,

¹⁵“ ‘Ilamit Akuj itwaan daang ni esubuni akuj anamoru, kori anakitoe, kori anasuat, sodi kilip idait. Eremokino Ekapolon Akuj akilipit ngakujo nasubuna.’ “Esakitae ngitunga daang tatachut tamasi, ‘Aamen!’

¹⁶ “ ‘Ilamit Akuj itwaan daang ni nyekerit apakeng ka itiokeng.’ “Esakitae ngitunga daang tatachut tamasi, ‘Aamen!’

¹⁷“ ‘Ilamit Akuj itwaan daang ni isiyotoori ibore ni igerokinitor ekidunyet keng ekukuor keng.’ “Esakitae ngitunga daang tatachut tamasi, ‘Aamen!’

¹⁸“ ‘Ilamit Akuj itwaan daang ni eriki emuduk kitooliyo alorot.’ “Esakitae ngitunga daang tatachut tamasi, ‘Aamen!’

¹⁹ “ ‘Ilamit Akuj itwaan daang ni eboliar ngitunga a ngakwapea anache, ka ngikokiok, ta ngapuseru.’ “Esakitae ngitunga daang tatachut tamasi, ‘Aamen!’

²⁰“ ‘Ilamit Akuj itwaan daang ni itoperi apei a ngaberu a apakeng, kainyo isurumit apakeng ngileech!’ “Esakitae ngitunga daang tatachut tamasi, ‘Aamen!’

²¹ “ ‘Ilamit Akuj itwaan daang ni itoperi ibarasit kori etiengit.’ “Esakitae ngitunga daang tatachut tamasi, ‘Aamen!’

²²“ ‘Ilamit Akuj itwaan daang ni eperete ka nakaatokeng na idounitoe ka ngesi anakook a apei kori nakaatokeng na a aberu anache.’ “Esakitae ngitunga daang tatachut tamasi, ‘Aamen!’

²³ “ ‘Ilamit Akuj itwaan daang ni eperete ka nakamuran keng.’ “Esakitae ngitunga daang tatachut tamasi, ‘Aamen!’

²⁴“ ‘Ilamit Akuj itwaan daang ni eari niche peeyenio.’ “Esakitae ngitunga daang tatachut tamasi, ‘Aamen!’

²⁵“ ‘Ilamit Akuj itwaan daang ni idiauni ngaropiyae sodi taarea itwaan ni nyesechit.’ “Esakitae ngitunga daang tatachut tamasi, ‘Aamen!’

²⁶ “ ‘Ilamit Akuj itwaan daang ni nyiwapit ngitalio a Akuj daang ka ngakitatamet keng.’ “Esakitae ngitunga daang tatachut tamasi, ‘Aamen!’