Read turkana Akitamunet a Etal 28 Bible Online

Akitamunet a Etal 28 - turkana bible

Akitamunet a Etal 28

¹“Ani kiwap esi Ekapolon Akuj na erai Akuj kus sodi kirichakis dir ngitalio keng, lukadungok ayong esi a akolongit naga, kitiliwori ngesi esi lu kiyenikinitae kidwanga ngibukui luche daang anakwapea.

²Kiwapa ngakiro a Ekapolon Akuj ana erai Akuj kus sodi toliworor apiaro naga daang akus.

³“Epiari Ekapolon Akuj ngirerea kus ka ngamanat kus.

⁴“Kipiari Ekapolon Akuj esi kiinak ngide lukaalak, ka ngikinyam lukaalak, ka ngaatuk nakaalak, ta ngamesekin nakaalak.

⁵“Epiari Ekapolon Akuj ngikinyam kus ka akimuj na iriamunito esi alokinyam kangulu.

⁶“Epiari Ekapolon Akuj ibore daang ni isubete esi.

⁷“Ipiyori Ekapolon Akuj ngimoe kus nakitijikinioto esi. Kitijikinete kesi esi itorunito lowae epei, nakaneni ematarosi anikus kitoro lowaitin daang.

⁸“Epiari Ekapolon Akuj na erai Akuj kus etich kus nabo kileleb ngidulae kus ngikinyam. Kipiari ngesi esi anakwap ana kiinakini ngesi esi.

⁹“Ani kiwapa esi ngakiro a Ekapolon Akuj ana erai Akuj kus sodi tosuba ngakiro daang na edungunit ngesi, kitiliwori ngesi esi ngitunga keng a alope, loger lokolong echikichikar ngesi.

¹⁰Nakaneni ingolikinete ngitunga daang anakwapea atamar kiseu Ekapolon Akuj esi toliworos ngitunga keng, sodi kitokera kesi esi.

¹¹Kiinakini Ekapolon Akuj esi ngide lukaalak, ka ngaatuk nakaalak, ta ngikinyam lukaalak anakwap ana kolong echikakini ngesi taapaakus atamar kiinakini esi.

¹²Eyauni ngesi akiru nakaalan alokai keng ana a adis, sodi topia etich kus, toliwor eareenete ngibukui lukaalak amicha anikus, nakaneni nyiarete esi amicha anikech.

¹³Kitiliwori Ekapolon Akuj na erai Akuj kus iyong ekarikon, meere ekewapan. Eloose ngakiro kon daang ngaren meere naabor, erai kiwap iyong ngitalio keng daang lukadungok ayong esi akolongit naga, nyiisechak.

¹⁴ Wara nyiinger akiwap ngitalio lugu tani wadiochichi, kori nyiilip ka akisub etich a ngakujo anache.

¹⁵“Ani pekiwap esi Ekapolon Akuj na erai Akuj kus, nabo ani pekirichakis dir ngitalio keng daang lukadungok ayong esi akolongit naga, epote ngakiro naaronok nugu daang nikus.

¹⁶“Ilami Ekapolon Akuj ngirerea kus ka ngamanat kus.

¹⁷“Ilami Ekapolon Akuj ngikinyam kus ka akimuj na iriamunito esi alokinyam kangulu.

¹⁸“Kilami Ekapolon Akuj esi kiinak ngide ngidikidio, ka ngikinyam luaronok, ka ngaatuk ngadikidio, ta ngamesekin ngadikidio.

¹⁹“Ilami Ekapolon Akuj ibore daang ni isubete esi.

²⁰“Ani kisuba esi ngakiro naaronok sodi tongero Ekapolon Akuj, kiinuni ngesi esi ngilam, ka ejokopu taanyut ngichan anakiro ana isubete esi kadaang, tanang esi imunyarosi daang atipei.

²¹Itoropuuni ngesi ngidekesinei nikus, tadaunos esi nyiidong tani ipei nakwap na edikino esi ilomarete.

²²Kiinuni ngesi esi ngidekesinei lu etapuununio alotunga aluche, lu ikote abwore a ngawat ka elekes. Eyauni ngesi eron[17] ka ekuwam lo a akamu sodi kinyasut ngikinyam kus. Kiwapete esi ngakiro naaronok nguna tanang ni itoaketa.

²³Nyerami akiru, nabo egogongerosi ngalup kikokis asuat.

²⁴Apua ka ekuwam lo ekusi ngalup kesi eliworosi akiru a akwap kus, todoto nikus kinyasut esi.

²⁵“Einakini Ekapolon Akuj ngimoe kus agogongu na kidwangeta esi. Itijikinete esi kesi itorunito lowae epei nakaneni imatarosi esi anikech itorito lowaitin daang, sodi tobul ngitunga daang anakwapea na ingolikineta ngakiro na esubasi anikus.

²⁶Ani itoakete esi, epote ngikieny ka ngitieng a moding tanyama ngawat kus, nabo emam itwaan iritari kesi.

²⁷Iturupuni Ekapolon Akuj ngilepunae anawat kus loger lo kolong eturupunea alotunga a Misiri. Ijemeikini ngawat kus lokojokon. Ebutari loper ngawat sodi kipii.

²⁸Kitokopori Ekapolon Akuj esi ngikerep, kitumudukani ngesi esi, kibiler ngakies.

²⁹Itwangete esi naparan loger a ngimuduk, nakaneni nyianyunete esi erot lo itorete. Nyejokearosi ngakiro daang na isubete esi. Kiboliare esi jiik tokokoae ngiboro kus, nakaneni emam itwaan kingarakini.

³⁰“Ineri iyong apese isaki, akiut, nakaneni egealakin itwaan iusi. Iduki iyong akai nakaneni nyilomi kai ngina. Itakini iyong amana nakaneni nyinyami ngamusabib keng.

³¹Engolio ngaatuk kon itee iyong ilope, nakaneni nyinyami iyong akiring kech tani nadiochichi. Iurukukorio ngisikiria kon itee iyong nakaneni nyikibuakinio. Ipotorio ngamesekin kon nakinae ngimoe kon, nakaneni emam itwaan kingarakini iyong.

³²Ipotorio talokookon ka tanakookon nakinae ngitunga a ngakwapea anache itee iyong toliworos ngikedalak. Kidong iyong ingolengole akolongit daang ibala kori ebongunete ngide kon.

³³Ngibukui luche kesi elemarete ngikinyam kon daang lu itakini iyong a ngakan kon. Nakaneni emam ibore iriamuni pearai kiboliare jiik kitosubere naaronok.

³⁴Kitokopori aboliaro ngina iyong ngikerep.

³⁵Eburuchiari Ekapolon Akuj ngakejen kon a ngajemei anakariabak ana nyengalekinete. Kibutarete iyong ngilepunae napei anakou tanang nakejen.

³⁶“Ekapolon Akuj kiyaari esi ka ekapolon kus nakwap nagela nakolong nyenanga esi kori taapaakus a ache. Ani inangete inaa tosuba etich a ngakujo ana esubunitae anakito ka ngamoru.

³⁷Anakwapea ana kiealakini esi Ekapolon Akuj, eriangakinosi ngitunga kotere ngakiro na asubasi anikus. Kikianatar kesi esi sodi kimenya.

³⁸“Itakinete esi ngikinyam lukaalak nakaneni inyamete ngidikidio, kainyo irikari emaase ngamanat kus.

³⁹Itakinete esi ngamanat a ngimusabib sodi kiyoko, nakaneni nyilemete ngamusabib kech kori nyimaase emuna a ngamusabib kech, kainyo irikari ekurut ngamusabib nguna.

⁴⁰Erupunete ngikito a akimiet awadaang anakwap kus, nakaneni nyiriamunete akimiet tani nadiochichi, kainyo eraraun ageor a akimiet.

⁴¹Iuriyete esi ngide lusapa ka lupesur, nakaneni nyitingete kainyo erikio kesi alojie toliworos ngirikon.

⁴²Irikarete ngikur ka emaase ngikito kus daang ka ngamanat.

⁴³“Egogongerosi ngitunga a ngakwapea anache daang lu eyakasi nakwap kus, nakaneni ipalagagete esi.

⁴⁴Kiinakinete kesi esi ngaropiyae na iarete nakaneni emam nakus earete kesi. Toliworos kesi ingarenete, kisidioto esi.

⁴⁵“Epote ngakiro naaronok nugu daang nikus kiruko ka esi tanang ni imunyarotor esi, kainyo iwounete esi akiwap ngakiro a Ekapolon Akuj ana erai Akuj kus sodi nyiirichakis ngitalio keng daang lu kidungokini ngesi esi.

⁴⁶Ngakiro nugu kesi idodiunete eriras a Akuj anikus ka ngalesea kus jik.

⁴⁷Kipiari kolong Ekapolon Akuj esi anakiro kus kadaang nakaneni nyesuba esi etich keng a ngitai ajokak iraakasi lu ilakara.

⁴⁸Kotere ngakiro nguna, isubete esi etich a ngimoe alu emeuni Ekapolon Akuj nikus. Kinyami esi akoro ka akure nabo engopi ibore inapete anawat. Iliworosi ngulu ichanasi ibore daang. Kiboliar esi Ekapolon Akuj[18] niaronon tanang imunyarosi.

⁴⁹Eyauni Ekapolon Akuj ngibukui anasalunet a akwap, ngibukui lu nyiyenete esi tani ngabukui kech. Kikoporete kesi esi loger a egole.

⁵⁰Ngibukui luaronok lu nyisieniyete ngitunga lusorok ka lumojong.

⁵¹Enyamete kesi ngaatuk kus ka ngikinyam kus sodi kitoriyo esi erogo. Emam ngikinyam, kori emuna, kori akimiet, kori ngaatuk ka ngamesekin nakiisikineta kesi esi. Nakaneni itoakete esi.

⁵²Eremete kesi ngirerea daang anakwap ana kiinakini esi Ekapolon Akuj na erai Akuj kus, nabo eukorosi nakooyak palem igienosi esi.

⁵³“Ani iriamete ngimoe kus ngirerea kus, kinyami esi akoro lokojokon tanyama tani ngide lu kiinak esi Ekapolon Akuj na erai Akuj kus.

⁵⁴Tani ekile lokapatanan noi anikus lo ejakaanit, engopikini akimuj, nyisieni tani lokaatokeng, kori aberu keng naminat, kori ngide keng lu idongete.

⁵⁵Nabo akiring a ngide keng na enyami ngesi, nyeinakini ngesi tani ipei kech. Eliwor ibore keng daang ngini kotere ngichan lu ianyunete esi ani iriameta ngimoe ngirerea kus daang.

⁵⁶Tani aberu keng nakapatanan na ejakaanit, na nyeloto wache nakanuan ani abaritor, esubi ngakiro na ikote napei nguna. Ani iriamete ngimoe ere keng, engopikini ngesi akimuj, kidaa ikoku tani ni aringa idounio tanyam ka

⁵⁷ angasep keng. Nyemorete ngesi ka ekile keng lominat, kori tani ipei a ngide keng.

⁵⁸“Ani pekiwap esi dir ngakitatamet a Akuj daang na igiritae nakitab naga, nabo ani pekirimasi esi ekiro loajokon tarai lokitimi lo a Ekapolon Akuj ana erai Akuj kus,

⁵⁹eyauni ngesi nikus ka ngalesea kus ngidekesinei lu nyengalekinete, ngidekesinei luaronok noi lu ekeikin wadaang, nabo nyedaunosi.

⁶⁰Kiinuni ngesi esi nabo ngidekesinei lukolong aronok ianyunito esi alo Misiri, nabo nyijokearosi esi jik.

⁶¹Eyauni nabo ngesi ngidekesinei luche daang nikus, lu nyelimunitoe anakitab ana a etal Akuj kana. Kimunyarete kesi esi.

⁶²Tani kilalakearosi esi loger a ngikanyer alu eyakasi nadis, ngidikidio anikus kesi epote toyara, kainyo iwounete kolong esi akiwap ngakiro a Ekapolon Akuj ana erai Akuj kus.

⁶³Loger lokolong kiminakinea Ekapolon Akuj esi kitosubea naajokak, nabo kitalala, loger lopei ngolo, kinyasuni ngesi esi, kitomunya. Kilemario esi anakwap ana tokona edikino ilomarete.

⁶⁴“Kiealakini Ekapolon Akuj esi lobukui luche, napei alosal a akwap tanang losal loche, sodi tosuba kaina etich a ngakujo ana esubunitae anakito ka ngamoru, ngakujo nakolong nyilipa esi kori taapaakus a ache.

⁶⁵Emam ni iriamuneta esi ekisil, emam ngalup eliworosi ngakus. Kitiliwori Ekapolon Akuj esi lu ichanasi, lu ipasakina, nabo toliworos ialolongete.

⁶⁶Eliwor eboyor kus lo kiilitor esi jiik. Iliworosi esi lu kibulit nakwaare ka apaaran, nabo iliworosi iemito jiik akitu.

⁶⁷Ebuli ngitai kus kidongakis kotere ngakiro daang nacha ingolikinete esi. Ani iwalari ataparach, tasaka esi atamar towar atipei. Ani ewari, tasaki esi atamar kiwala atipei.

⁶⁸Kibuari Ekapolon Akuj esi Misiri idokito ngatubwae, tani kolong kelimunit ngesi[19] atamar nyibongete Misiri nabo. Ani inangete inaa isakete esi kitogiala ngimoe kus toliworos ngikedalak kech, nakaneni emam itwaan echamuni akigiel esi.”