Read turkana Akitamunet a Etal 29 Bible Online

Akitamunet a Etal 29 - turkana bible

Akitamunet a Etal 29

¹Eraakasi ngakiro nugu ngaka achamunet ana adungokini Ekapolon Akuj Musa atamar tachamakin ka Ngisirael anakwap a Moab. Iatakin achamunet ngina nachamunet nache kolong achamakin kesi alomoru a Sinai.

²Tochunak Musa Ngisirael tolimok tama, “Ingolikis kolong esi ngakiro nakolong asubea Ekapolon Akuj ekapolon a Misiri, ka ngikapolok keng luche ta akwap keng daang.

³Ipot esi kingolikis ngidekesinei luaronok ka ngakiro nakailiilok ka nakatalarak asubi Ekapolon Akuj.

⁴Nakaneni anang akolongit naga eringa Ekapolon Akuj nyiteyena esi eger ngakiro ana ianyut kadaang.

⁵Kirik esi Ekapolon Akuj ngikaru ngitomwon-omwon anariet, nabo nyedaidauna ngiworui kus ka ngamuk kus.

⁶Amam esi ngamugati inyamete, kori emuna lo epuritoe ka epurot lo imaase, nakaneni abu Ekapolon Akuj kiinak esi ibore ni iitanito daang sodi kitatamea esi atamar arai ngesi Akuj kus.

⁷Ani kiponi ngoni nege, abu ekapolon Sion lo a Echibon, ka ekapolon Ogu lo a Bachan, pot akitijwore ngoni. Nakaneni kipot ngoni edwanga kesi,

⁸atolemasi akwap kech, atotiakisi ngitela a Reuben ka Gad, ta epewae a ekitela a Manase.

⁹ Kiwapa dir ngakiro daang a achamunet kana, tojokearotor ngakiro na isubete esi daang.

¹⁰“Akolongit naga, iwaasi esi daang alongaren Ekapolon Akuj na erai Akuj kus, aapei ka ngikarikok kus ka ngikapolok luche, ka ngikiliok kus,

¹¹ka ngaberu kus, ka ngide kus, ta ngitunga a ngakwapea anache lu irukito ka esi, ikeyenete ngakito kus tookete ngakipi kus.

¹²Iyakasi esi nege akolongit naga taanyuneta achamunet na ichamakinosi esi ka Ekapolon Akuj na erai Akuj kus, tachamut akiwap ngitalio keng.

¹³Sodi kidodiunea Ekapolon Akuj tokona atamar iraakasi esi ngitunga keng, sodi toliwor ngesi Akuj kus, loger lo kolong kichikakinea ngesi esi ka taapaakus Aburaam, ka Isaka, ta Yakobo.

¹⁴Meere esi make kitaanyunit Ekapolon Akuj achamunet ngina ka ngitalio lu iwapio.

¹⁵ Kitaanyunit ngesi ngoni daang lu kiya nege ngaren keng akolongit naga, aapei ka ngalesea yok na eringa nyeuriuna.

¹⁶“Itamunito esi eger a eboyor alo kolong a akwap a Misiri, ka eger lo itorioto esi kiding ngakwapea a ngibukui aluche.

¹⁷Ipot esi kingolikis ngakujo kech nakikadakinete, na esubunitae anakito ka ngamoru, ka ngakwangae, ta egolit.

¹⁸Tochoikisi atamar alotunga alu ewaasi kane akolongit naga, kerai ekile kori aberu, kori ngitunga a awi, kori ekitela, emam lu ibatarosi ani a Ekapolon Akuj ana erai Akuj yok, sodi kilipa ngakujo a ngibukui aluche. Ikote ngakiro nguna ateni a ekitoe na erupuni toliwor ekitoe lokadwaran lo kiari.

¹⁹Warasi itwaan ni eyei nege tani ipei, ni epupi ngakiro nugu akolongit naga, nyiingalai ebala kori emam niaronon eyei tani pekewap ngakiro nugu. Kimunyarete ngakiro nugu esi daang, luajokak ka luaronok aapei.

²⁰Nyerimakini Ekapolon Akuj itwaan ni ikoni neni. Pearai erirauni anyunyura a Ekapolon Akuj anikeng, tanang eanyuni ngilam daang lu igiritae nakitab naga, sodi tomunya Ekapolon Akuj ngesi pil.

²¹ Ipakuni Ekapolon Akuj itwaan ngini toliwor ekitetemes alotela a Ngisirael kadaang. Einuni ngesi ngakiro naaronok daang itemem ka ngilam daang lu eyakasi nachamunet na igiritae nakitab na etal a Ekapolon Akuj naga.

²²“Monan ngirwa ngiche ingolikinete ngalesea kus ka ngitunga a ngakwapea anache eyakasi nikalonan, ngakiro naaronok ka ngichan lu ayau Ekapolon Akuj nakwap kus.

²³Eliworosi ngamanat akwap nakoonon na eburuchiarit etulia ka edoot. Emam ibore itakinio, nyerupuni tani edoan kaneni. Ikokini akwap kus ngirerea a Sodom ka Gomora, Adima ka Seboim, lukolong enyasuni Ekapolon Akuj na angoea noi.

²⁴Sodi ingitakinosi ngitunga daang anakwapea tamasi, ‘Ekoe nyo asubea Ekapolon Akuj akwap kech ngakiro na ikote nege? Nyo engoitor ngesi enyunyurar kona?’

²⁵Nakaneni etachunio tamarae, ‘Asubi Ekapolon Akuj kongina kotere ni angerioto ngitunga a Akuj achamunet na kolong achamakinosi kesi ka ngesi, Akuj a taapaakech, ngirwa lu epudunere kesi alo Misiri.

²⁶Tosuba kesi etich a ngakujo a ngache ana kolong nyilipa kesi a ache, ngakujo nakolong etengerit Ekapolon Akuj kesi akilip.

²⁷Abu Ekapolon Akuj tongoik ngitunga keng, yau nakwap kech ngilam daang lu igiritae nakitab naga.

²⁸Abu Ekapolon Akuj tongo noi tonyunyur. Ani na angoitor ngesi kongina, kitwarak kesi anakwap kech, yaa nakwap nagela, na tokona eyakasi kesi.’

²⁹“Eyakasi ngakiro ngache na imunonit Ekapolon Akuj na erai Akuj yok. Nakaneni esileereu ngesi etal keng, lo kiwapi ngoni ka ngalesea yok jik.