Read turkana Akitamunet a Etal 30 Bible Online

Akitamunet a Etal 30 - turkana bible

Akitamunet a Etal 30

¹“Abala tokona ayong esi taanyutu ibore iseunete, kerai apiaro kori ngilam. Ani esubakinosi ngakiro nugu daang anikus, sodi toloma esi kiding ngibukui lu kiealakini ngesi esi, itamunete esi ngakiro na abala ayong toseutu nugu.

²Ani kireeunosi esi ka ngalesea kus nia Ekapolon Akuj, sodi kirichakis a ngitai kus kadaang ngitalio keng lu kadungok ayong esi akolongit naga,

³isieniyete esi Ekapolon Akuj na erai Akuj kus. Kibuuni ngesi esi alobukui alu kiealakinit esi, sodi kitojok ngakiro kus nabo.

⁴Tani kiealara esi tanang losal a ngakwapea, kichunakini Ekapolon Akuj na erai Akuj kus esi kitobuu,

⁵sodi tolemareta esi nabo akwap nakolong alomito taapaakus. Kitabari ngesi esi, nabo kitalalae kidwanga tani eger lokolong alalaketa taapaakus.

⁶Itiliwori Ekapolon Akuj na erai Akuj kus ngitai kus ka lua ngalesea kus lu iwapito ngakiro, sodi tominakineta esi ngesi a ngitai kus kadaang, torubakineta ilomito nakwap ngina jiik.

⁷Ereari ngesi ngilam daang nia ngimoe kus, alu kolong kiremokino esi kitoboliatar.

⁸Nabo iwapete esi ngakiro keng kirichakis ngitalio keng daang lukadungok ayong esi akolongit naga.

⁹Itojoki Ekapolon Akuj ngakiro na isubete esi daang. Epete esi ngide lukaalak, ka ngaatuk nakaalak, nabo ilemete ngikinyam lukaalak anamanat kus. Elakar Ekapolon Akuj anikus kitojok ngakiro kus daang loger lokolong etojokea ngakiro daang a taapaakus.

¹⁰Nakaneni echamitae esi iwapete ngakiro keng sodi kirichakis ngitalio keng daang lu igiritae nakitab na etal keng naga. Ireeunosi esi nikeng a ngitai kus kadaang.

¹¹“Nyegogong etal lokadungok ayong esi akolongit naga, kori nyelona anikus.

¹²Nyelona nyeyei kidiama. Nyiingitas ibalasi, ‘Ngae elosi kidiama yau etal nikosi, sodi eirasi sua ewapa?’

¹³Kori nyeyei ngesi ekwakaye anam. Nyiingitasi ibalasi ‘Ngae edokari ekwakaye anam yau etal nikosi sodi eirasi sua ewapa?’

¹⁴ Meere kongina, eyei etal nipei nege irukito ka esi. Iyenete esi, ipedorete tani alimun. Kirichakisi robo tokona.

¹⁵“Akolongit naga, abala ayong esi toseutu kerai naajokak kori naaronok, kerai akiyar kori akitu.

¹⁶Ani kiwapa esi ngitalio a Ekapolon ana erai Akuj kus,[20] lukadungok ayong esi akolongit naga, ani kiminakis esi ngesi, kiwapa ngakiro keng ka akirichakin ngitalio keng daang, iboikinosi esi niajokon nabo toliworos ebukut lo elalak ngitunga. Kipiari esi Ekapolon Akuj na erai Akuj kus anakwap ana edikino esi ilomarete.

¹⁷Nakaneni ani pekiwap esi nabo towout akiirar, sodi kibataros akilip ngakujo ngache,

¹⁸kimunyario esi. Kechikichiki tokona ayong esi kane. Nyilomete esi nikooyen nakwap na a ekwakaye Yorudan na edikino esi ilomarete.

¹⁹Abala tokona ayong esi toseutu kerai akiyar kori akitu, kerai apiaro a Akuj kori ngilam a Akuj. Anyarit ayong adis ka akwap toliworos ngikaanyunak a ngakiro ana iseunete esi. Toseutu akiyar.

²⁰ Tominakisi Ekapolon Akuj na erai Akuj kus, kiwapa ngesi, toliworos lu imunosi ngesi, sodi kiboikinotor esi ka ngalesea kus nikooyen nakwap nakolong echikakini ngesi taapaakus Aburaam, ka Isaka, ta Yakobo.”