Read turkana Akitamunet a Etal 31 Bible Online

Akitamunet a Etal 31 - turkana bible

Akitamunet a Etal 31

¹Torubak Musa isuruori Ngisirael

²ebala, “Anang tokona ngikaru kang amiat apei ka ngitomwon-arei. Nyapedori nabo ayong aliwor ekarikon kus. Ani ikoni neni dang, kalimoki Ekapolon Akuj ayong atamar nyadokari ekwakaye angolol a Yorudan.

³Kingarenikini esi Ekapolon Akuj na erai Akuj kus, tomunya ngibukui lu elomito inaa, sodi tolemareta esi akwap kech. Yochua ngesi eliwor ekarikon kus lo alimunio Ekapolon Akuj.

⁴Emunyari Ekapolon Akuj ngitunga ngulu loger lokolong edwangea Sion ka Ogu lu araakasi ngikapolok a Ngiamor, nabo kinyasu akwap kech.

⁵Kisidwangi Ekapolon Akuj esi kesi, nakaneni tosubeta esi kesi ngakiro nakalimok ayong esi.

⁶ Togogongioto nabo totitinyeketo. Warasi nyieam kesi. Irukete esi ka Ekapolon Akuj alope na erai Akuj kus. Nyikingeri ngesi esi ori nyikiisikini.”

⁷Sodi tanyarau Musa Yochua tolimok alongaren Ngisirael daang tama, “Togogonger nabo totitinyer. Iyong ngesi iriki ngitunga lugu tolomareta nakwap nakolong echikakini Ekapolon Akuj taapaakech.

⁸ Ekapolon Akuj alope ngesi kiriki iyong nabo irukete ka iyong. Nyikingeri ngesi iyong kori nyikiisikini. Wara robo nyiimaranik kori nyiem.”

⁹Abu Musa kigir etal a Akuj nak ngimurok a Akuj lu aweikinito asaduku a Achamunet, ka ngikarikok a ngitunga.

¹⁰Todungok kesi tama, “Adaunet a ngikaru a ngikan-kaarei kadaang, na enangea ekaru lo ikisere ngamichae, kisomata etal logo iremasi alosukukuu a ngikalea.

¹¹Kisomata kiirasi Ngisirael na eponeta akilip Ekapolon Akuj na erai Akuj kus ani echamakinitae ilipeenere.

¹²Tochunakisi ngikiliok daang ka ngaberu ka ngide, ta ngitunga a ngakwapea anache lu irukito ka esi alorerea kus, sodi kiirarea itwaan daang, toyenea arima Ekapolon Akuj na erai Akuj kus, nabo kiwapea ngitalio keng dir.

¹³ Kotere eger ngolo, epedorete tani ngalesea kus na kolong sek nyiirara etal a Ekapolon Akuj ana erai Akuj kus akiirar. Nakaneni itatamasi kesi akiwap ngakiro keng ngirwa daang lu elomitotor kesi nakwap na edikino esi ilomarete a ekwakaye angolol a Yorudan.”

¹⁴Sodi tolimok Ekapolon Akuj Musa tama, “Aapuut ngirwa kon lu itoanea. Tanyarau Yochua tolom loeam, sodi atolimokinea ngakiro keng.” Tolomasi Musa ka Yochua loeam,

¹⁵sodi bu Ekapolon Akuj nikech kaneni eyei napir a edou alo awei anakituk a eam.

¹⁶Tolimok Ekapolon Akuj Musa tama, “Itoani iyong atipei, ani kitoana iyong kerumor, kangerete ngitunga ayong kichwangakis achamunet na kichamakin ayong ka kesi. Kaisikinete kesi ayong sodi kilipa ngakujo nagelayek na a akwap ana elomarete kesi.

¹⁷Ani kesubakin nguna, angoikini ayong kesi niaronon. Aisikini ayong kesi kinyasunos. Epote ngakiro naaronok nakaalak nikech, sodi toyena kesi atamar esubasi ngakiro nguna anikech kainyo nyeringa ayong Akuj kech kirukit ka kesi.

¹⁸Awouni ayong akingarakin kesi, kainyo asecha kesi elipa ngakujo nache.

¹⁹“Kigir tokona eeos logo kitatam Ngisirael toliwor ngesi eyenere ngakiro kech.

²⁰Ayaari ayong kesi nakwap na ileleba ngakile ka akimiet a ao ngina, loger lokolong echikakinitor ayong taapaakech. Eriamunete kesi akimuj daang na esakete kaina, nabo iboikinosi niajokon. Nakaneni ibatarosi kesi kilipa ngakujo ngache. Kangerete kesi ayong kichwangakis achamunet kang.

²¹Epote ngakiro naaronok nakaalak nikech. Nakaneni erubakinio eeokinitoe eeos logo toliwor ngesi eyenere ngakiro kech. Tani tokona eringa ayong nyitananga kesi nakwap nakolong echikakini ayong ainakin kesi, ayeni ayong ngakiro na itamete kesi.”

²²Akolongit napei ngina, abu Musa kigir eeos ngolo kitatam Ngisirael.

²³ Sodi abu Ekapolon Akuj tolimok Yochua lokookeng a Nun tama, “Totitinyer nabo togogonger. Iriki iyong Ngisirael tolomasi nakwap nakolong echikakini ayong kesi, nakaneni kiruki ayong ka iyong.”

²⁴Kigir Musa etal a Akuj nakitab, kirichak noi nyeisik akiroit tani apei nyigira.

²⁵Ani erumor, tolimok ngimurok a Akuj lu aweikinito asaduku a Achamunet tama,

²⁶“Tolemasi akitab na etal a Akuj naga, kisibaka ka asaduku a achamunet a Ekapolon Akuj ana erai Akuj kus, sodi kidong neni erai ngesi eyenere ngakiro a ngitunga keng.

²⁷Ayeni ayong atamar ichanaka kesi eroko. Angerito kesi Ekapolon Akuj ngirwa daang lu ayarea ayong, nabo engerete kesi Ekapolon Akuj noi katoana ayong kerumor.

²⁸Tochunakisi ngikarikok a ngitela kus daang ka ngikapolok luche pot nikang, sodi atolimok ngakiro nugu. Adis ka akwap kesi eraakasi ngikaanyunak kang kotere ngakiro kech.

²⁹Ayeni ayong atamar na atoanea ayong, erokearosi ngitunga tongero ngakiro na etatam ayong kesi. Ani ekisidi eanyunete kesi ngakiro naaronok kainyo itongoyete kesi Ekapolon Akuj, ani esubeta ngakiro na etengeritoe.”

³⁰Sodi toeok Musa ngakiro a eeos daang topupokinito Ngisirael.