Read turkana Akitamunet a Etal 32 Bible Online

Akitamunet a Etal 32 - turkana bible

Akitamunet a Etal 32

¹“Akwap ka adis, kiirasi ngakiro kang. Topupokisi lokojokon ngakiro na alimuni ayong.

²Echakun akitatamet kang loger a akiru, sodi min nakwap loger a ngakop. Echakun ngakiro kang loger a elimlim alo itipitipi lokito luuchik, loger a elimilim alo itipitipi lonyia luchokil.

³Epuruuni ayong ekiro a Ekapolon Akuj, elimorete ngitunga keng eger lo epoloo ngesi.

⁴“Ekapolon Akuj ataaba kon. Eraakasi ngirotin keng daang lu itemokino eriyan. Erai Akuj kus na iteni na emunoi. Esubi ngesi ngakiro na iyookino, kitemokino.

⁵Nakaneni iraakasi esi lu nyikimunoi, lu nyitemokino iraakasi ngitunga keng, ekitela lokasechan tomodeana.

⁶Ngakiro ejoikinit esi isubeta Ekapolon Akuj nugu a? Esi lubaang emam ngitamen a? Erai ngesi apakus, lo kisubuni esi. Kitiliwori kolong ngesi esi ebukut keng.

⁷“Kitamasi ngakiro nakolong ngorok, kolong kanuan. Kingita taapaakus ngakiro nakolong asubasi. Kingita ngikasukou ngakiro nangorok.

⁸ Atiakakini kolong Akuj na Epol Noi ngibukui ngakwapea kech. Toseu ngesi ni elomete ngitunga. Totiakak ekitela daang akuj keng.

⁹Nakaneni toseu ngesi ngalesea a Yakobo toliworos ngikeng.

¹⁰“Toriam kesi ewowooto anariet, alapat ariet ngina apiat ekuwam. Abu ngesi kiyok kesi nabo kirichak, loger lo iyokor ngesi bon.

¹¹Loger a egole alo itatami ngitak keng aporor,[21] kikamuunu kesi a ngabeben keng ana epetara. Eratak Ekapolon Akuj Ngisirael nyeedakarosi.

¹²Ekapolon Akuj bon arikit ngitunga keng, amam akuj ache nagela engarakinit.

¹³“Kitopolok ngesi kesi ngimuriae, sodi tanyama kesi akimuj na etatae namanat. Taanyut kesi akimiet a ao anatabab, ngikito kech a akimiet, tokoniut alokitela.

¹⁴Kiwokis ngaatuk kech ta ngaanei kech . Ajokak ngamesekin kech ka ngaanei, ta ngaatuk. Ajokak tani ngakanoi kech, ka emuna.

¹⁵“Tabara ngitunga a Ekapolon Akuj, nakaneni apot toroketa. Totuma kesi kimuja tanyakut. Toisikis kesi Akuj na erai akasubunan kech, tongero ekayuunan kech lokaagongon.

¹⁶Toting Ekapolon Akuj etereku ani elipitotor kesi ngakujo nasubuna. Tongo Ekapolon Akuj kotere ngakiro naaronok asubete kesi.

¹⁷ Kipeyonokis kesi ngipean, lu araakasi ngakujo napasiek, ngakujo nakiteat nakolong peayenete taapaakech, ngakujo nakolong peewapito Ngisirael.

¹⁸Kimuriak kesi Akuj kech, ataaba kech, lokolong ainakini kesi akiyar.

¹⁹“Ani ingolikini Ekapolon Akuj ngakiro nguna, tongo, tonger talokookeng ka tanakookeng.

²⁰Tolim Akuj tama, ‘Nyengarakini ayong kesi nabo.’ Sodi ataanyu ngakiro na asubakinosi ani a ngitunga alukechanak, nyemunoi kangulu.

²¹ Ketongoa kesi ayong a ngakujo kech anasubuna, ngakujo na nyeraakasi ngaka iteni. Alemuni tokona ayong ngibukui lu itongoyete kesi. Etitingi ayong kesi etereku kotere ngibukui lubaang.

²²Erirauni angoit kang loger a akim, tonomia ibore daang anakwapea. Enangi tani kwap lokatoak, tonomia ngarupunet a ngimoru.

²³“ ‘Etoropuuni ayong ngakiro naaronok nikech, atogumugumia kesi a ngimalea kang kadaang.

²⁴Etoakete kesi kotere akoro ka elekes. Etoakete kesi kotere ngidekesinei luaronok, Ameuni ayong ngitieng a moding tanyama kesi, ka ngimunio luadwarak tokonya kesi.

²⁵Etoakete lukaalak alorotin kotere ejie, epete naaronok nawiyei. Etoakete ngisorok lusapa ka lupesur, nyidongete tani ngide luuchik, kori ngitunga lumojong.

²⁶Kamunyarit ayong kesi jik, sodi nyiitamunere kesi nabo jik.

²⁷Nakaneni nyaachamak ngimoe kech iwogasi ebalasi kidwang ngitunga kang, tarai bo ayong kolong amunyari kesi.’

²⁸“Eraakasi Ngisirael ebukut lokabangaanan. Emam kesi aosou jik.

²⁹Awout kesi akiyen ngakiro kolong edwangere, nyepedorete akiyen ngakiro na esubasi.

³⁰Nyo edwangea itwaan ipei ngitunga abunget apei? Ani nyo edwangeta ngitunga ngiarei ngitunga ngabunge ngatomon? Ekapolon Akuj na erai Akuj ngesi aisikini kesi. Ataaba kech ngesi angeri kesi.

³¹Eyenete ngimoe kech atamar epalag ngakujo kech, nyegogong nyikote Akuj a Isirael.

³²Ngimoe kech luaronok lu ikote Sodom ka Gomora, ikwaan ka ngimusabib lu ekoniunete ngamusabib naadwarak kiarete,

³³loger a emuna alo esubunitae anakisierit a ngimunio.

³⁴“Itamunit Ekapolon Akuj ngakiro na asubete ngimoe a Ngisirael. Idarit ngesi ngirwa lu itemokino kirira kesi.

³⁵ Etachakini Ekapolon Akuj kirira kesi, enangi ngirwa lu edakarotor kesi. Aapuu akolongit na iriraare kesi.

³⁶Eyuuni Ekapolon Akuj ngitunga keng, na ingolikinea atamar adaunosi ngikilinga kech. Isieniyete ngesi ngulu esubete etich keng, na ingolikinea atamar emam eger ingarakinotor.

³⁷Nakaneni ingisi Ekapolon Akuj ngitunga keng tama, ‘Nyaanu ngakujo kech, nangoon araakasi ataaba igienosi esi?

³⁸Itanyamete esi kesi atumes a ngakipeyos kus, nabo nakis kesi emuna tamata. Kimiekisi kesi pot kingarakis esi tokona. Kimiekisi kesi tomotunos kitoyuut esi.

³⁹“‘Ayong nabo ayong bon arai Akuj. Emam akuj ache erai na iteni. Aari ayong, nabo eteyari, ewaakini ajeme, nabo etangalekini, emam itwaan itepegi ngakiro na asubi ayong.

⁴⁰Ani kona araakar ayong dir Akuj na ayari, ekeari ayong akan kang ekongok

⁴¹atamar epenari ekileng kang lokariran, sodi engolik atamar esubio ngakiro na itemokino. Atachakini ayong ngakiro a ngimoe kang, sodi erira ngulu karemokino ayong.

⁴²Eliworosi ngaakot kech idokasi alomalea kang, nabo eari ekileng kang daang lu karemokino ayong. Nyaisikini itwaan ni ketiji ayong tani ipei, tani lu ewanan ka lu nyeenitae, etoakete daang.’

⁴³ “Ngibukui, kipuro ngitunga a Ekapolon Akuj. Irirae ngesi ngulu earete ngitunga keng. Etachanakini ngesi ngakiro a ngimoe keng, sodi torimak ngasechesea a ngitunga keng.”

⁴⁴Apot Musa ka Yochua lokookeng a Nun toeokis eeos ngolo sodi kiirareta Ngisirael.

⁴⁵Ani erumori Musa akisuruor Ngisirael ngakiro a Akuj,

⁴⁶tolim tama, “Kiwapa dir ngitalio daang lukadungok ayong esi akolongit naga. Tobongonokisi itatamete ngide kus sodi tomunokis dir akirichakin ngakiro a Akuj daang.

⁴⁷Nyeraakasi ngakiro nugu ngapasiek, pearai ngaka akiyar kus. Kiwapa kesi talalakearotor ngikaru kus anakwap ana iloose esi akilom, a ekwakaye angolol a Yorudan.”

⁴⁸Akolongit napei ngina, tolimok Ekapolon Akuj Musa tama,

⁴⁹“Tolot lomoru a Abarim lu eyakasi nakwap a Moab, ni ekienyikina ka ere a Yeriko. Todoka moru a Nebo tokienyik akwap a Kanaan na asaki ayong ainakin Ngisirael.

⁵⁰Itoanikini iyong kidiama moru ngolo loger lokolong atoanikinea lokaatokon Aron kidiama emoru a Ori,

⁵¹kainyo nyemunokina kolong esi luarei daang ayong alongaren Ngisirael. Nakolong iyakatar esi nakipi a Meriba diyete ere a Kadech anariet a Sin, ipot nyiiraut lu kirimasi ayong alongaren ngitunga.

⁵² Ingolikini iyong akwap anikalonan, nakaneni nyilomari iyong nakwap na ainakini ayong Ngisirael.”