Read turkana Akitamunet a Etal 33 Bible Online

Akitamunet a Etal 33 - turkana bible

Akitamunet a Etal 33

¹Erai naga apiaro na apiarea Musa lo arai itwaan a Akuj Ngisirael eringa nyetoana.

²Abuni Ekapolon Akuj alomoru a Sinai. Kipiripiru loger a akolong alokidiama Edom, sodi tacha alotunga keng alokidiama emoru a Paran. Arukito ngesi ka ngimalaikae ngabunge ngatomon, toyei akim na arirae anakan keng ana aloteten.

³Emina Ekapolon Akuj ngitunga keng, nabo itee ngesi lu eraakasi ngikeng. Nakaneni kiriediki ngoni anakejen keng, sodi ewapa ngitalio keng.

⁴Kiwapi ngoni etal lokolong kidungokini Musa, ibore niajokon noi a ebukut yok.

⁵Abu Ekapolon Akuj topolok Ngisirael, na achunakinotor ngitela kech, ka ngikarikok kech wapei.

⁶Tolim Musa ngakiro nugu kotere ekitela a Reuben. “Nyetoakete ngitunga a ekitela a Reuben, tani kekidioko ngitunga kech.”

⁷Tolim ngakiro nugu kotere ekitela a Yuda tama, “Ekapolon Akuj kiira akigoro kech, na esaketa akingarakino. Kimorik kesi nabo ka ngitela luche. Tojii kotere kesi, Ekapolon Akuj, sodi kingarak kesi, Ekapolon Akuj, sodi kingarak kesi na itijioto ngimoe kech.”

⁸ Tolim ngakiro nugu kotere ekitela a Lawi tama, “Iyong Ekapolon Akuj, kidodiu echami kon, kotere Urim ka Sumim,*g** ani a ngikasubak etich kon alu emunoi, alu eraakasi Ngilawi, Iroi kolong iyong kesi alo Masa. Kidodiu kolong iyong atamar, eraakasi kesi lu eteniyete anakipi a Meriba.

⁹Apot kesi topupo ngakiro kon dir, akidwang ngikauriak, ka ngikaitotoi, ta ngide. Apot kesi kiwapa ngitalio kon. Nabo tomunokis achamunet kon.

¹⁰Itatamete kesi ngitunga kon akiwap etal kon. Ipeyoote kesi ngakipeyos alokeno kon.

¹¹Ekapolon Akuj, kingarak ekitela kech togogonger. Talakar kotere ngakiro na esubete kesi. Tomunya ngimoe kech daang. Wara kesi nyeenyout nabo.”

¹²Tolim ngakiro nugu kotere ekitela a Benjamen. “Ekitela logo ngesi emina Ekapolon Akuj, nabo itee kesi akolongit daang etia ni etia. Nakaneni ibooyi alokiding kech.”

¹³Tolim ngakiro nugu kotere ekitela a Yosep. “Topia Ekapolon Akuj akwap kech nak akiru, ka ngakipi na alokwap ngalup.

¹⁴Topiarae akwap kech min ageor, na itokonit akolong. Talalaar ageor a ngikaru kadaang.

¹⁵Eburuchiari ageor naajokon ngimukur kech lungorok.

¹⁶Kilelebun ibore niajokon daang nakwap kech. Epiarit ajokis a Ekapolon Akuj, ana kolong eruorikini anamoni ana anoki. Min apiaro naga lotela a Yosep, kainyo ngesi kolong arai ekarikon a talokaatokeng.

¹⁷Eyakasi Yosep ngikilinga lu ikote lu a emong. Ikote ngaamwar keng a ekosowan. Eraakasi ngaamwar keng ani a Manase ngabunge nakaalak, taraakas ani a Epiraim ngabunge ngatomon. Igumi ngesi ngibukui a ngaamwar, kijuka tanang losal a ngakwapea.”

¹⁸Tolim ngakiro nugu kotere ngitela a Sebulun ka Isakar. “Kimiekisi Sebulun tabarak lotich keng, lo esubi ananam. Nabo kiatakin ebari a Isakar anawi.

¹⁹Ipeyounete kesi ngitunga a ngakwapea anache moru kech, sodi kipeyoto ngakipeyos na iyookino kaina. Eanyunito kesi ebarit kech ananam, nabo eanyunito anasinyen ka ekwaas a anam.”

²⁰Tolim ngakiro nugu kotere ekitela a Gad. “Kipuruutu Akuj nakolong etololomi akwap kech. Esadit Gad loger a engatuny, tangarakakia akan ka amuny a akou.

²¹Alemasi kolong kesi ibore niajokon a akwap daang toliwor ikech. Ainakin kesi ibore ni erai ika ekarikon. Ewapete kolong kesi ngakiro na adungunit Ekapolon Akuj, ka ngitalio keng nakolong achunakinitor ngikarikok a Ngisirael daang wapei.”

²²Tolim ngakiro nugu kotere ekitela a Dan tama, “Erai Dan engatuny losorokit. Epori ngesi alo Bachan.”

²³Tolim ngakiro nugu kotere ekitela a Naputal. “Eanyunit Naputal eboyor loajokon, nabo epiarit Ekapolon Akuj ngesi lokojokon. Enangit akwap kech kuju napei ananam a Galilaya.”

²⁴Tolim ngakiro nugu kotere ekitela a Acher tama, “Epiaritae Acher akidwang ngitela luche. Toliwor ngesi lo eminae noi alokaitotoi keng. Talalaketa ngikito a akimiet anakwap keng.

²⁵Togoloi ngirerea keng a ngidorin alu a ngasua. Toliwor ngesi ibooyi jiik emam ibore eemit.”

²⁶Ngisirael, emam akuj ikwaan ka Akuj kus, na elosi anadis esegaana, kitor lodowon ebunit akingarakin iyong.

²⁷Akuj ngesi imecheene iyong jiik. Ngakan keng nakajik kigangito iyong. Etwarakini ngesi ngimoe kon ilosi iyong ngaren, sodi kitolimok iyong atamar tomunya kesi.

²⁸Kotere nguna ibooyete ngalesea a Yakobo nikaalimon, emam ibore eemito anakwap ana ileleba ngikinyam ka emuna, akwap na itapapalito ngakop a adis.

²⁹Ngisirael, ilakara esi noi! Emam ebukut eche lo ikwaan ka iyong. Ebukut lo ayuuni Ekapolon Akuj. Ekapolon Akuj alope erai aupwal kus ka ekileng kus, Kitoik esi sodi kidwanga ngimoe kus. Epote ngimoe kus kimaimaa esi esakete kitorimakin, nakaneni ipudaarete esi kesi.