Read turkana Akitamunet a Etal 34 Bible Online

Akitamunet a Etal 34 - turkana bible

Akitamunet a Etal 34

¹Torotok Musa anaroatin a Moab tanang moru a Nebo, todoka naita a emoru a Pisiga, alo eyei kide Yeriko. Kidodik Ekapolon Akuj ngesi akwap daang kaina. Kidodik akwap a Gilead tanang lore a Dan alowae alo alokwap.

²Kidodik akwap a Naputal daang, ka ngakwapea a Epiraim, ka Manase, ka akwap a Yuda tanang nanam a Mediterenian alo too,

³ka Negeb, ka aro na isiakinit alo Soar tanang Yeriko lo erai ere a ngingolea.

⁴ Sodi tolimok Ekapolon Akuj Musa tama, “Akwap naga ngesi kolong echikakini ayong Aburaam, ka Isaka, ta Yakobo atamar ainakini ngalesea kech. Kesingolikini ayong iyong akwap ngina nakaneni nyilosi iyong inaa.”

⁵Sodi abu Musa lo arai ekasuban a Ekapolon Akuj totoan a anakwap a Moab, loger lokolong alimunitor Ekapolon Akuj.

⁶Tonukak Ekapolon Akuj ngesi nadipo a Moab, ana ekienyikina ka ere a Besipeor, nakaneni tani akolongit naga, emam itwaan eyeni dir ni eyei aliel a Musa.

⁷Araakasi ngikaru a Musa amiat apei ka ngitomwon-arei na atoanea. Aringa ngesi eyakasi ngikilinga, nabo akienyete ngakonyen keng ajokak.

⁸Apot Ngisirael kigoro Musa tosutonokis a ngirwa a ngitomwon-uni anaroatin a Moab.

⁹ Aos Yochua lokookeng a Nun, kainyo aseuni Musa ngesi kilunyokin nados keng. Apot Ngisirael kiwapa ngakiro a Yochua sodi kirichakis ngitalio lukolong adungokini Ekapolon Akuj kisitoru nia Musa.

¹⁰Nyemino ekadwaran a Akuj eche lo ikoni Musa nakwap a Ngisirael nakanuan. Esuruori Ekapolon Akuj ngesi ikobanakinosi ngakiro.

¹¹Emam ekadwaran eche lo asub ngakitoodikinet nakailiilok ka nakatalarak na ikote nakolong ameari Ekapolon Akuj Musa akisub alongaren Parao alo arai ekapolon a Misiri, ka ngikaweikinak keng, ta ngitunga a akwap kangina daang.

¹²Emam ekadwaran eche lo asub ngakiro naapolok ka naketubulok na ikote nakolong asubi Musa alongaren Ngisirael daang.