Read turkana Akitamunet a Etal 4 Bible Online

Akitamunet a Etal 4 - turkana bible

Akitamunet a Etal 4

¹Sodi tolimok Musa ngitunga tama, “Kiwapa ngitalio daang lu ketatami ayong esi, nakaneni iyarete esi toloma nakwap nakiinak esi Ekapolon Akuj na erai Akuj kata apaakus.

²Nyiatakis ngakiro ngache nakiro nakadungokinit ayong esi, kori nyiilemasi ngakiro ngache. Kiwapa ngitalio a Ekapolon Akuj ana erai Akuj kus, lukainak ayong esi.

³Ipot esi ngikulepek kingolikis a ngakonyen kus ngakiro na asubi Ekapolon Akuj alomoru a Peor. Abu ngesi tomunya itwaan daang ni elipit Baal kaina,

⁴ nakaneni esi lukolong imunosi Ekapolon Akuj na erai Akuj kus, eringa iyarete tani tokona.

⁵“Ketatam ayong esi ngitalio daang loger lokolong kalimokinitor Ekapolon Akuj na erai Akuj kang. Kiwapa kesi anakwap ana tokona edikino iremete toloma.

⁶Kiwapa kesi imunosi nakaneni idodikinete nugu ngitunga a ngibukui aluche eger lo iosokioto esi. Na iirareta kesi ngakiro a ngitalio kangulu kadaang, etamarete, ‘Etia aosou ka ayenut eyei lotunga lugu ai!’

⁷“Emam ngitunga a akwap a ache tani keyenikinitae kesi kwaani, lu eyei akuj na eapi anikech esaa lo esaketa kesi ngesi, loger lokiapikinitor ngoni Ekapolon Akuj na erai Akuj yok. Kitachanakini ngesi ngoni ngakiro nakinyaraa atamar kingarak.

⁸Emam ngitunga a akwap a ache tani keyenikinitae kesi kwaani, lu eyakasi ngitalio luajokak lu ikote lu ketatam ayong esi akolongit naga.

⁹Tochoikinos! Ngirwa daang lu iyareta esi, warasi nyikimuriakis nguna ingolikis esi a ngakonyen kus. Tolimokisi ngide kus ka ngitatae kus

¹⁰ngakiro a akolongit ana kolong iwaatar esi alongaren Ekapolon Akuj na erai Akuj kus alomoru a Sinai nakalimokinea ngesi ayong tama, ‘Tochunak ngitunga. Asaki ayong kesi kiirasi ngakiro na asaki alimun, sodi kitatamatar kesi akiwap ngakiro kang ngirwa daang lu eyareta, nabo kitatameta ngide kech akiker ayong.’

¹¹“Tolimokisi ngide kus eger lo ilooso esi towaa anakeju a emoru alo aburuchiarito ngidowon a apuru ana aribokinit ka asarae a akim na anangit kidiama.

¹²Tolimokisi kesi eger lo kisurorea esi Ekapolon Akuj anakim, ka eger lo ipupioto esi ngesi iruoro nakaneni nyingolikina akwaan pearai etoil bon ipupete.

¹³Abu ngesi kitolimok esi ngakiro na isubete sodi kirichakineta achamunet nakolong ichamakinosi esi ka ngesi. Ejoikinit esi iwapete ngitalio lutomon lukolong egirakini ngesi namoru nadapal naarei.

¹⁴ Kalimokini Ekapolon Akuj ayong atamar ketatam esi ngitalio daang lu ejoikinit esi iwapete anakwap ana edikino esi iremete toloma.

¹⁵“Mam akwaan ipot esi kingolikis nakisuruorea esi Ekapolon Akuj anakim alomoru a Sinai. Tochoikinos tokona esi noi sodi

¹⁶nyiisecheta tosuba ngakujo nasubuna a ekisikwaane cha kadaang, kerai eka ekile kori eka aberu,

¹⁷kori eka etiengit, kori eka ikieny

¹⁸kori eka ibore ani eliat, kori eka ekolia.

¹⁹Warasi nyiisak akilip ibore daang ni eyei nadis, kerai akolong kori elap, ta ngikanyer. Ainaki Ekapolon Akuj na erai Akuj kus ngitunga luche daang ngiboro ngulu toliworos ilipeenete.

²⁰Nakaneni esi kesi ngitunga lukolong kiyuuni Ekapolon Akuj alo Misiri, ani kiboliare. Kipuduni ngesi esi toliworotor ngitunga keng loger lo tokona iraakatar.

²¹Abu Ekapolon Akuj na erai Akuj kus katongoik ayong kotere esi, sodi kikongok atamar nyadokari ayong ekwakaye angolol a Yorudan ataanyu akwap naajokon nakiinakini esi Ekapolon Akuj.

²²Atoanikini ayong nakwap naga nyadokari ekwakaye angolol, nakaneni aapuu esi adokar ekwakaye toloma nakwap naajokon.

²³Warasi nyikimuriak achamunet nakolong ichamakinosi esi ka Ekapolon Akuj na erai Akuj kus. Kiwapa etal keng nyiisubakis akuj cha daang nasubuna.

²⁴ Ani kona ikonea Ekapolon Akuj na erai Akuj kus asarae nakariran, erai Akuj na nyesaki kilipae Akuj ache.

²⁵“Tani kiloma esi neni nikooyen kidounoe ngide ka ngitatae kus, nyiisech tosuba ngakujo nasubuna a ekisikwaane cha kadaang. Nyejokak ngakiro nguna alongaren Ekapolon Akuj nabo itongoyete ngesi.

²⁶Adis ka akwap kesi eraakasi ngikaanyunak kus akolongit naga, ani pekiwap esi ngakiro kang, ingopiarete esi anakwap atipei. Nyiyarete esi nikooyen anakwap ana eyei ekwakaye Yorudan ana aapuu esi alomar toloma. Kimunyario esi jik.

²⁷Kiealakini Ekapolon Akuj esi lobukui luche, kidongo ngidikidio kus eyarete kaneni.

²⁸Ilipete esi kaina ngakujo na esubunitae a ngakan, ngakujo na ichiatae anakito ka na ekulunitae anamoru, ngakujo na nyiteete kori na nyepupete ngakiro, nyimujete kori nyinguyete.

²⁹Ilomarete esi akisak kaina Ekapolon Akuj na erai Akuj kus, nakaneni ani kisak a ngitai kus kadaang, ianyunete.

³⁰Ani kianyut esi ngichan, nabo tosubakin ngakiro nguna daang anikus, ireeunosi esi ekisidi nia Ekapolon Akuj kiwapa ngesi.

³¹ Erai ngesi Akuj na a ngisien. Nyikiisikini ngesi esi kori nyikimunyari, nabo nyimuriakini ngesi achamunet nakolong achamakin ngesi alope kata apaakus.

³²“Kingitas ngakiro a ngikaru alu kolong aringaakar esi nyeuriuna, jik tanang ngirwa lu asubunea Akuj itwaan anakwap. Kingitas ngakiro a akwap etia ni etia. Asubakin ngache naapolok nakanuan a? Eyei itwaan ni eira ngakiro na ikote nugu nakanuan a?

³³Eyakasi ngitunga eirasi akuj isuruori kesi anakim sodi toyara, loger lo iyareta esi a?

³⁴Eyei akuj ache nakanuan, na alemu ngitunga a ebukut a eche kitiliwo ngikeng loger lo kisubea esi Ekapolon Akuj na erai Akuj kus alo Misiri a? Abu ngesi kidodiu agogongu keng naationon iteete esi ngikulepek a ngakonyen kus. Abu ngesi yau ngidekesinei luaronok ka ejie, tosub ngakiro nakailiilok ka nakatalarak, tosubak nabo ngakiro naketubulok.

³⁵Kidodik Ekapolon Akuj esi nguna sodi toyeneta dir atamar ngesi bon erai Akuj, nakaneni emam akuj ache eyei.

³⁶Kimiek ngesi esi iirarete etoil keng anadis sodi kitatamea esi. Ani kane anakwap abu ngesi kisingolik esi akim keng, sodi nabo kisuruor esi anakim.

³⁷Ani kona kolong aminar ngesi taapaakus, kiseu ngesi esi, sodi kipud alo Misiri kotere agogongu keng a alope.

³⁸Ani na ilooso esi ngaren, kirita ngesi ngitela lu ayenikinitae nabo taraakas lukajwok kidwangito esi, sodi kiyaunea ngesi esi kiinakinea akwap kech na tokona eringa erai akus.

³⁹Kanguna, kitamutu akolongit naga warasi nyikimuriak atamar, Ekapolon Akuj ngesi erai Akuj anadis ka akwap. Emam akuj ache.

⁴⁰ Kiwapa ngitalio keng daang lukainak ayong esi akolongit naga, tojokearotor ngakiro daang anikus ka ngalesea kus. Irubakinete esi ilomito nakwap nakiinak Ekapolon Akuj na erai Akuj kus esi, toliwor akus jik.”

⁴¹Sodi totiaku Musa ngirerea nguuni alo kide angolol a Yorudan

⁴²lu epedori itwaan tamatar todukea erai kear itwaan peiyechakinit. Tarai pearai sek itwaan ngini emoit keng. Epedori ngesi tamatar ni eyei epei a ngirerea kangulu toduk nyearere.

⁴³ Alokitela a Reuben ayei ere a Beser lo ayei lomuria lo a ariet. Alokitela a Gad, ayei ere a Ramos lo ayei nakwap a Gilead. Alokitela a Manase, ayei ere a Golan lo ayei nakwap a Bachan.

⁴⁴Ainakini Musa Ngisirael ngitalio ka ngakitatamet a Akuj.

⁴⁵Lugu kesi ngakitutuket ka ngitalio lu adungokini Musa Ngisirael na arotokinioto alo Misiri,

⁴⁶toringa eyakasi ekwakaye Yorudan anadipo ana ekienyikina ka ere a Bespeor. Neni ngesi ainakinea Musa kesi ngitalio ngulu. Arai neni akwap a Sion alo arai ekapolon a Ngiamor, lo alomit lore a Echibon. Ngesi lokolong edwangete Musa ka Ngisirael na apudunioto alo Misiri.

⁴⁷Apot kesi toloma nakwap a Sion ka akwap a Ogu, alo erai ekapolon a Bachan. Alomito ngikapolok luarei ngulu kide angolol a Yorudan.

⁴⁸Esiakinit akwap naga alore a Aroer, alokeli a angolol a Arinon, tolot jik kwap tanang moru a Sirion[3] ngesi atamar, emoru a Erimon.

⁴⁹Emorikina tani ka ewae alo kide angolol a Yorudan napei alokuju tanang nanam a Amakat. Ani alo kide tanang nakeju a emoru a Pisiga.