Read turkana Akitamunet a Etal 5 Bible Online

Akitamunet a Etal 5 - turkana bible

Akitamunet a Etal 5

¹Tanyara Musa Ngisirael daang tochunak, sodi tolimok tama, “Ngisirael, Topupokisi ngitalio daang lu kainakini ayong esi akolongit naga. Kitatamas sodi kiwapa kesi.

²Alomoru a Sinai, abu Ekapolon Akuj na erai Akuj yok nyeechamakin

³ka taapayok make, pearai ngoni daang lu tokona eringa kiyari.

⁴Alokidiama emoru, abu Ekapolon Akuj kisuruor esi anakim ikobanakinosi ngakiro.

⁵Abu ayong atowo anakidingos kus ka Ekapolon Akuj katolimokinea esi ngakiro na eruoro ngesi, kainyo iemete esi akim, nyiidokasi moru. “Tolim Ekapolon Akuj tama,

⁶‘Ayong arai Ekapolon Akuj na arai Akuj kus nakolong kayuuni esi alo Misiri ani iraakatar ngikedalak.

⁷“ ‘Warasi nyiilipa akuj ache mati ayong bon.

⁸“ ‘Nyiisubakis ekisikwaane a ibore a idio ani eyei nadis kori nakwap, kori ni eyei tooma nakipi, kwap ngalup.

⁹Warasi nyiiredikokis akuj nasubuna kori nyiilipa, kainyo ayong Ekapolon Akuj na arai Akuj kus, arai Akuj na nyasaki kilipae akuj ache. Erirae ayong lu karemokino ayong, nabo erirae ngalesea kech tanang nalesea na ngauni ka na ngoomwon.

¹⁰ Nakaneni amina ayong ngabunge nakaalak alu kaminasi ayong, kiwapito ngitalio kang.

¹¹ “ ‘Nyiilimut ekiro kang a ngakiro anaaronok, kainyo ayong Ekapolon Akuj na arai Akuj kus, erirae itwaan daang ni elimit ekiro kang pas.

¹²“ ‘Kirichakisi akolongit a Sabato sodi kitaleut, loger lokadungokinea ayong Ekapolon Akuj na arai Akuj kus esi.

¹³Tosuba etich daang a ngirwa a ngikan-kapei,

¹⁴nakaneni erai akolongit na a ngakan-kaarei nakiangaret na itegeliaritae toliwor akang. Emam itwaan esubi etich akolongit ngina tani anikus, ka ngide kus, ka ngikedalak kus, ka ngibaren kus, ka ngitunga a akwap anache lu elomito nakwap kus. Ejoikinit ngikedalak kus iangarete loger lo iangaritotor esi.

¹⁵ Kitamutu atamar iraakasi kolong esi ngikedalak alo Misiri, kitamutu nabo atamar ayong Ekapolon Akuj na arai Akuj kus kayuuni esi a agogongu kang anaationon. Ngakiro nguna abalar ayong esi kirichakisi akolongit na Sabato.

¹⁶ “ ‘Toker apakon ka itiokon loger lokolong kadungokinea, sodi tojokearotor ngakiro kon daang, sodi toyarea nikooyen anakwap ana kainakinit ayong iyong.

¹⁷“ ‘Nyiiar.

¹⁸“ ‘Nyiilom.

¹⁹“ ‘Nyiikoko.

²⁰ “ ‘Nyiitingak itwaan niche ngakiro na eraakasi alioko.

²¹ “ ‘Nyikiterekuia aberu a itwaan aniche, kori akai keng, kori amana keng, kori ngikedalak keng, kori ngaatuk keng, kori ngisikiria keng, kori ibore cha daang ni etingit itwaan niche.’

²²“Ngitalio ngulu kesi lukolong kiinakini esi Ekapolon Akuj, na ichunakinotor moru. Na eruoror ngesi ikiarit etoil anakim ka ngidowon, abu ngesi kiinak esi ngitalio ngulu make, emam ngiche. Sodi kigir ngesi ngitalio ngulu namoru nadapal ngaarei, dio kainak ayong.

²³“Na ariraunea emoru wadaang akim, sodi kiirasi esi etoil anaribu, apot ngikarikok kus ka ngikatukok a ngitela kus pot nikang

²⁴tamasi, ‘Kidodik sua Ekapolon Akuj na erai Akuj kosi apolou ka ekipur keng na kiirarea sua ngesi iruoro anakim! Kiyen tokona atamar ikwa epedori itwaan arubakinit eyari tani kisuruor Akuj ngesi.

²⁵Nakaneni tokona, nyo edikino ngoni kitoakea nabo? Kimunyari ngoni akim naaronon ngina. Kitoaki ngoni dir erai kiira ngoni Ekapolon Akuj na erai Akuj yok iruoro nabo.

²⁶Eyei itwaan nakanuan eira Akuj na eyari iruoro anakim sodi toyar a?

²⁷Musa, tobongo kiira ngakiro daang na iruoro Ekapolon Akuj na erai Akuj kosi, sodi tobongu kitolimok sua ngakiro nakilimok ngesi iyong. Kiirari sua ewapa.’

²⁸“Na eirarea Ekapolon Akuj ngakiro nguna, katolimok ngesi ayong tama, ‘Eira ayong ngakiro na iruorosi ngitunga lugu, nabo iyookinito kesi nguna.

²⁹Arai bo kikote kesi jiik dang ne! Arai bo katorimasi kesi ayong jik, ka akiwap ngitalio kang, kejokearosi ngakiro kech daang ka na ngalesea kech jik.

³⁰Kape tolimok kesi atamar tobongosi loeaman kech.

³¹Nakaneni ani iyong Musa, kiboikin nege eruko ka ayong, sodi kainak ayong iyong ngitalio ka ngakiro kang daang. Kitatam ngitunga ngitalio ngulu, sodi kiwapa kesi anakwap ana ainakini ayong kesi.’

³²“Ngisirael, tosuba ngakiro daang nakidungok esi Ekapolon Akuj na erai Akuj kus, sodi kitemokis. Nyiingero ngitalio keng tani epei.

³³Kiwapa kesi daang sodi tojokearotor ngakiro daang anikus, nabo kiboikinotor esi jik nakwap na ilomete.