Read turkana Akitamunet a Etal 6 Bible Online

Akitamunet a Etal 6 - turkana bible

Akitamunet a Etal 6

¹“Ngitalio daang lugu lukolong kadungokini ayong Ekapolon Akuj na erai Akuj kus atamar ketatam esi, kiwapa kesi anakwap ana edikino esi ilomarete toloma.

²Ani cha eringa esi iyarete, esakitae esi ka ngalesea kus irimasi Ekapolon Akuj na erai Akuj kus ka akiwap ngitalio keng daang lu kainakinit ayong esi, sodi toyareta esi nikooyen anakwap kangina.

³ Kiirasi robo Ngisirael ngitalio ngulu sodi kiwapa! Tojokearos ngakiro kus daang, ilalakearosi esi noi, nabo toloma nakwap na ileleba ngakile ka akimiet a ao loger lo kolong kichikakinitor Ekapolon Akuj na erai Akuj kata apaayok.

⁴“Ngisirael, kiirasi nugu! Ekapolon Akuj nakilipit ngoni ngesi bon erai Akuj yok.[4]

⁵Tominakisi Ekapolon Akuj kus a ngitai kus kadaang, ka akiyar kus daang ta ngikilinga kus daang.

⁶Warasi nyikimuriakis ngitalio lu tokona kainakinit ayong esi lugu.

⁷Kitatama ngide kus. Tolimuunutu iyakasi nawiyei, ka na imamakatar anawiyei, tolimuunutu iangarito ka na isubeta etich.

⁸Toinikisi nakan kus ka akinap aloreetin kus, kitamuuneta.

⁹ Kigira nakito a ngidorin a ngakais kus ka lodorin a ngawasea kus.

¹⁰“Kiinakini Ekapolon Akuj na erai Akuj kus esi akwap na a ngirerea aluapolok ajokak, lu araakasi meere esi idukete, loger lokolong echikakinitor ngesi taapaakus Aburaam, ka Isaka, ta Yakobo.

¹¹Ileleba ngiboro lukoajokak nakais lu nyeraakasi esi iwaakinete, epete ngakare na nyeraakasi esi iwadete, ta ngamanat a ngimusabib ka ngikito a akimiet lu nyeraakasi esi itakinete. Nakiyaunea esi Ekapolon Akuj nakwap naga, sodi tanyama esi akimuj na isakete daang kimwoko,

¹²warasi nyikimuriak Ekapolon Akuj nakolong kiyuuni esi alo Misiri ani iraakatar ngikedalak.

¹³Tokera Ekapolon Akuj na erai Akuj kus, kilipa ngesi bon, nabo ani ngakiro na isakete esi akichikakin itwaan niche, tolimutu ekiro keng bon.

¹⁴Nyiilipa ngakujo ngache na eraakasi ngakujo a ngitunga alu irukito ka esi.

¹⁵ Ani kilipa esi ngakujo ngache, kingoikini esi Ekapolon Akuj lokojokon, sodi kitomunya esi anakwap, kainyo Ekapolon Akuj na erai Akuj kus, na irukito ka esi, erai Akuj na nyesaki kilipae ngakujo ngache.

¹⁶“Nyiiningeeneto Ekapolon Akuj na erai Akuj kus loger lokolong isubeta alo Masa.

¹⁷Kirichakisi noi akiwap ngitalio lu kiinakini ngesi esi.

¹⁸Tosuba ngakiro na ebala Ekapolon Akuj itemokino tojokak, nakaneni ejokearosi ngakiro kus daang. Ipedorete esi alemar akwap naajokon nakolong ekongi Ekapolon Akuj atamar ainakini taapaakus,

¹⁹nabo itwarakinete esi ngimoe kus loger lokolong kichikakinitor ngesi.

²⁰“Kingisete monan esi ngide kus tamasi, ‘Nyo kolong kidungokinitor ngoni Ekapolon Akuj na erai Akuj yok atamar ewapa ngitalio lugu daang?’

²¹Sodi ilimokinete esi kesi tamasi, ‘Kirai kolong ngoni ngikedalak a Parao alo arai ekapolon a Misiri, sodi kitoyuu ngoni Ekapolon Akuj a agogongu keng anaationon.

²²Kingolik sua a ngakonyen kosi ngesi esubi ngakiro nakailiilok ka naketubulok alotunga a Misiri ka ekapolon kech, ta ngikasubak etich keng daang.

²³Abu ngesi kitalachu ngoni alo Misiri, kiyau nege ainakin akwap naga, loger lokolong alimokinitor taapaayok.

²⁴Sodi kitodungok ngoni Ekapolon Akuj na erai Akuj yok atamar ewapa ngitalio lu daang nabo atokera ngesi. Ani kisubi ngoni kongina, kiyoki ngesi ngoni sodi kitajakaan.

²⁵Ani kiwap ngoni dir ngakiro daang nakidungokinit ngoni Akuj, elakar ngesi kotere ngoni.’[5]