Read turkana Akitamunet a Etal 7 Bible Online

Akitamunet a Etal 7 - turkana bible

Akitamunet a Etal 7

¹“Kiyauni esi Ekapolon Akuj na erai Akuj kus nakwap na ilomete, nabo itwarakini ngesi ngibukui lukaalak anakwap kangina. Ani iloose ngaren, itwarakini ngesi ngibukui ngikan-kaarei lu elalak ngitunga nabo lu ejwoko noi kidwangito esi. Ngibukui ngulu kesi Ngiiti, ka Ngigirigach, ka Ngiamor, ka Ngikanaan, ka Ngiperes, ka Ngiipi, ta Ngiebus.

²Ani iwaakini Ekapolon Akuj na erai Akuj kus ngitunga ngulu daang nakan kus, sodi kidwanga esi kesi, ejoikinit esi imunyarete kesi daang. Nyiichamakinosi ka kesi kori nyikisieneto kesi esi.

³Nyiuta kesi kori warasi ngide kus nyiuta kesi,

⁴kainyo ibatarete kesi ngide kus ani a Ekapolon Akuj sodi kilipa ngakujo ngache. Ani kesubakin nguna, kingoikini Ekapolon Akuj esi sodi kitomunya atipei.

⁵Aloger kangolo, toyatasi ngikenoi a ngakipeyos kech, tobwangabwangata ngapirio kech na a ngamoru na italeunitoe, totubutuboto ngakisikwaanet a akuj kech anabe Achera,*g** sodi kichunya ngakujo kech nasubuna daang.

⁶ Tosuba kongina kainyo iraakasi esi ngika Ekapolon Akuj ana erai Akuj kus. Abu ngesi kitoseu esi alotunga kadaang anakwapea sodi toliworos ngitunga keng a alope.

⁷“Pekiminakini Ekapolon Akuj esi kitoseu ani ilalaketa akidwang ngitunga luche. Iraakasi esi ebukut lo ekidioko ngitunga anakwapea.

⁸Nakaneni kitominak esi Ekapolon Akuj tasak akirichakin akichikakinet nakolong ainakini ngesi taapaakus. Ngakiro nguna kolong kiyuunea ngesi esi a agogongu keng anaationon, sodi kitalachu ani kolong iraakatar ngikedalak a ekapolon a Misiri.

⁹Toyena atamar Ekapolon Akuj na erai Akuj kus ngesi bon erai Akuj, nabo erai ngesi Akuj na emunoi. Irichakini ngesi achamunet keng nabo idodiuni ngesi amina na nyedaun analesea ana eraakasi abunget apei a ngulu eminasi ngesi kiwapito ngitalio keng,

¹⁰nakaneni nyemamakini ngesi akirirare lu eremito ngesi.

¹¹ Tokona bocha, kiwapa ngakiro nakitatam esi. Kiwapa ngitalio daang lu kainak ayong esi akolongit naga.

¹²“Ani kiirasi esi ngitalio lugu sodi kiwapa iteni dir, erubakini Ekapolon Akuj na erai Akuj kus irichakinit achamunet keng anikus, nabo kidodikini esi amina keng na nyedaun, loger lokolong echikakinitor taapaakus.

¹³Kiminakini ngesi esi kitopia, sodi kiatakinotor esi taanyut ngide lukaalak. Epiari ngesi ngamanat kus sodi toriamut esi ngikinyam ka emuna, ta akimiet, nabo kipiari ngesi esi kiinak ngaatuk ka ngamesekin nakaalak. Kipiari ngesi esi daang anakwap ana kolong echikakini ngesi taapaakus atamar kiinakini esi.

¹⁴Emam ngitunga ngiche anakwapea lu epiario noi loger kus. Emam tani ipei kus kori ipei a ngibaren kus ni ekolupani.

¹⁵Kiyok Ekapolon Akuj esi alodekesinei kadaang, nabo nyikiinun esi tani epei a ngidekesinei alu kolong aronok idekasi esi alo Misiri, nakaneni ititingi ngesi ngimoe kus ngidekesinei ngulu daang.

¹⁶ Tomunyasi ngibukui daang lu iwaakini Ekapolon Akuj na erai Akuj kus nakan kus, nabo tochoito kisieniyete. Nyiilipa ngakujo kech kainyo erikunete ngakiro nguna akitu nikus.

¹⁷“Warasi nyiitamasi be elalak ngitunga lu kidwangito esi, kori nyipedorete esi akitwarakin kesi.

¹⁸Nyieam kesi. Kitamutu ngakiro nakolong asubea Ekapolon Akuj na erai Akuj kus ekapolon a Misiri ka ngitunga keng daang.

¹⁹Kitamutu ngidekesinei luaronok kolong ingolikinete esi a ngakonyen kus, ka ngakitoodikinet nakailiilok ka nakatalarak, ka agogongu naationon kolong kilachunea esi Ekapolon Akuj na erai Akuj kus. Inyasuni ngitunga lu tokona ikerito esi lugu daang loger lokolong enyasunea ngesi Ngimisiri.

²⁰Itubuli[6] ngesi tani kesi nabo emunyari ngulu ematarosi akiduk.

²¹Warasi robo nyieam ngitunga ngulu. Irukito esi ka Ekapolon Akuj na erai Akuj kus. Erai ngesi Akuj naapolon na echamit ekerio.

²²Ani iloose esi ngaren, itwarakini ngesi ngitunga ngulu a ngapei-pei. Nyipedorete esi amunyar kesi amunyaret apei, kainyo ani kisuba esi kongina, iatakin ngitieng a moding, toliwor kitoemito esi.

²³Iwaakini Ekapolon Akuj ngimoe kus nakan kus, sodi kitubul kesi tanang imunyarete esi kesi daang.

²⁴Iwaakini ngesi ngikapolok kech nakan kus. Iarete esi kesi sodi tomunyaros kesi. Emam itwaan epedori aweikin esi. Imunyarete esi itwaan daang.

²⁵Kichunya ngakujo kech nasubuna. Warasi ngakwangae kori egolit lo eyei kidiama kech nyikimina, kori nyiilemasi toliworos ngikus. Ani kisuba esi kongina, erikunete ngakiro nguna akitu, kainyo nyesaki Ekapolon Akuj ilipio ngakujo nasubuna.

²⁶Warasi nyiiyaut ngakujo nasubuna nugu nawiyei kus kainyo ianyunete esi ngilam lu eraakasi ngikech. Echamitae esi iremokinosi ngakujo nguna kimenyasi, kainyo ilamit Ekapolon Akuj kesi.